Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

domingo, 6 de diciembre de 2015

Mal de güeyu

 

Escribo dende la ciática
que me detién y tortura,
en mancadura iniciática,
mentanto la nalga ambura.
 
A un tiempu'l todiellu espeta,
al par, la mesma caniella.
La rodía nun respeta,
l’aporfiadora restiella.
 
Que me baxa pela zanca,
dende’l mediu del cadril,
me fraya’l procuru y manca,
y me pon el xeitu a mil.
 
Y pa cuelmu de los males,
duel entá más cuando m’echo,
axorizo de costales,
de velea ando al acecho.
 
Y asina van dos selmanes,
paez una maldición,
pa nada val que t'afanes,
nin sollivia la indición,
 
nin el fervinchu nin l’untu,
nin frega, fríu o calor,
tienes que fadiar y puntu,
y esmolecer de dolor.
 
Rindiendo de tar sentáu,
siquier aguantes argutu,
arrevientes de valtáu,
titiritiando ensin cutu.
 
Magar de naide reniego,
ye mal de güeyu, de xuru,
ruégovos anque zuniego
m’apurráis un esconxuru.

No hay comentarios:

Publicar un comentario