Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

sábado, 28 de mayo de 2011

NUN YERA ÉL


Topéime nel Centru Asturianu de Madrid con un paisanu que l.levaba puesta una camiseta de Superman ya diba con un brazu encanáu, asina que púnxome a güevu entruga-y: ¿Qué ho, mancóse cola kriptonita? Magar que me decatara de que nun sabía de que-y falaba, marché ablucáu cola constancia de que nun yera'l verdaderu Superman.

lunes, 16 de mayo de 2011

¡VE A QUE TE FAIGAN UNA COLONOSCOPIA!


La vesícula biliar es un órgano que forma parte del aparato digestivo de todos los seres humanos y animales cuadrúpedos... (Wikipedia).

¿Daisvos cuenta los cuadrúpedos?

Seique, a fuercia de componer versos, surtiéranme piedres na “versícula”. Asina que, danme cólicos de lletres y allanzo idees que s’escaecen. D’esta miente, y como toi quedando mui ruin, mándanme prebes nel hospital y va haber una selmana, fixéronme una colonoscopia ente una mélica y dos enfermeres. D’entamu, mandáronme esnudar. Ys-entrugué qué si quitaba’l calzonciellu, a lu qu'una d’elles me retrucó: home, ¿como-y vamos a embocar la goma si nun lu quita?, y darréu echaron a rir. Dempués, punxi un mandilón que m’ufiertaron y surdí pala sala. Entós, preguntáronme peles calces. De secute, ys-alderiqué qué si yera una prenda verde que taba enriba la tayuela, cuntaba que yera un gorru. Aína, celebraron la biscatada más a gustu. De la que paró la comedia, allugáronme a la rebalguina nun xergón. Escapao, garráronme’l furabollos con una pinza y nel intre sentí que me trescalaben. Nuna pantalla que taba asitiada a la mio vera, anicié a ver imáxenes como de “Venti mil llegües de viaxe somarín” y camentaron que taba mui curiosu —anque de mozu yera mediu guapu, taba perclaru de que nun yera por min, sinón porque nun taba puercu l’estantín—. De reflundiu, entamó a mancame la faza’l pubis. Entóncenes, encamentóme la doctora que ciscara. A causa de tener más vergoña que ganes, de la que finara, y ensin ciscar, colé pa la mio casa cola empachadura d’aire. En tou casu, deprendí dalgo fino daquella pa refugar falar mal: cuando seya a cafiame daquién, VOI MANDA-Y A FACER UNA COLONOSCOPIA.

lunes, 9 de mayo de 2011

LAFU, EL JAZZ N'ASTURIES


Xandro Lafuente “Lafu” xuntu con Rebeca Velasco xestionen y dirixen la Escuela Municipal de Música de Grau. Siente la mestura del jazz cola música asturiana nesta perguapa páxina http://www.lafuyrebeca.net/escuchanos.asp

Amás, Lafu con dellos de los meyores músicos d’Asturies componen “Cuatro Perros” un grupu de jazz fusión d’abonda calidá. Val d’amuesa’l so discu: El Cementeriu d’Elefantes. Fai tan sólo unos díes —na Selmana Santa—, finara’l so primer taller de música moderna y jazz, asina como un aula de jazz pa neños nel auditoriu de Grau. ¡Nun lu escaecer pa otros años!