martes, 30 de mayo de 2017

L'alma se serena


So dos bancos solitarios
esbariaba la seronda,
la flor perdió los ovarios,
la fueya nel pisu abonda.

Nublina qu’auquiera pinga,
el día compón de gris,
cimblando cala la blinga,
anda arrequexáu’l malvís.

Amiesten el verde y cielu,
n’invisible y sele xugu,
d’otoñu l’ambiente y suelu,
l’ensugo nun topa ablugu.

Mentanto l’arbol perenne
desgüeya de la risión,
peles sos cañes, per ende,
col aire, col ramascón.

Ye la humedá arrechada
que pinga en solhorru y vanu,
qu’aporta na tambascada,
que fina con otru branu.

L’alma l’home se serena
escucla nel corredor,
la llaceria torna a pena,
asela murnia en mugor.

Naide prenda más la yesca,
pa esfrutar siempre esta calma,
si anecia n’arder la viesca,
cola vida, ambura l’alma.

viernes, 26 de mayo de 2017

¡NUNCA MÁS, NAIDE AMARRÁU!


Falsu amor a la guapura,
nun hai afeutu ensin ciñu,
miremos pa la llocura,
que nada s’igua ensin piñu.

Nun ye solo en siquiatría,
ye tamién na residencia,
s’escucla nel día a día
y se pierde la decencia.

Ayeri foi la mio ma,
pueque seyas tu, mañana,
cuando la salú se va,
la vida ye a teyavana.

De la qu’algames a vieyu,
suel asoceder davezu:
si lu alviertes, ruempe’l reyu,
al topar col escaezu.

Boques abiertes al cielu,
esnudos aforfugando,
nin gabitu, nin consuelu,
mientres la fin va averando.

Futuru de caricós,
amarráu pela moñeca,
somos víctimes de nós
que tamos como una teca.

¡NUNCA MÁS, NAIDE AMARRÁU!
más respetu colo humano;
si precisa más curiáu,
s’aporta sofitu a mano.


martes, 23 de mayo de 2017

Nel requexu claru



Del mio cuartu nel requexu claru,
onde fixo furacu'l taladru,
colingando de muria al so amparu,
yá víase'l cuadru.

¡Cuántes perres me llevara l’amu,
y nun sé nin quien ye esi paisanu,
que-y merqué de la que punxi’l ramu,
güei escucla ufanu!

¡Ai!, ¡madiós!; ¡si yo escribo la ruina
qu’asoleya del fondu la mio alma,
so la voz d’un gruñíu de cuina:
<<tu de fatu bien lleves la palma>>!

lunes, 22 de mayo de 2017

¡Nun quexiquéis!




     Non, ¡nun quexiquéis!, nun hai porque remanecer en casa viendo telebasoria n’horariu de guah.es por mor de que la ufierta de bienes culturales sangrinos ya otros repunantes espectáculos ye bien bayurosa… A min, préstame más deprender daqué, escribir, caleyar, sentir sones o echar un cantarín. En reduñes d’ello, decatárame de que nel YouTube amuesen una montonera de karaokes del cantar de la Llibertá de Labordeta, pero nun atopé nengunu del que diz que dende tiempos a esta parte vamos camín de nada.

jueves, 18 de mayo de 2017

Evidencia


Entá más célebre se m’abulta esto, Natacha…


–¿Quies dicime, si te plaz, qué camín debo garrar pa salir d’equí?

–Eso depende munchu d’a ónde quieras dir –retrucó’l gatu.

–Poco m’esmolez au dir –aldericó Alicia.

–Entós, poco importa’l camín que tomes –aneció’l muxu.


Vien tamién a cuentu de la entrada anterior, collacios, por culpa de qu’eso mesmu nos pasa a nós.

miércoles, 17 de mayo de 2017

¡Qué coime pasa equí!

–SE TORGA de CANTAR, BAILLAR y TOCAR LA GAITA–

     Tenemos un trazáu ferroviariu a traviés de Payares del sieglu XIX. Hai qu’aguardar al tren que xube pa que l’otru puea baxar ya en Llión vamos sero y de culu. Arriendes, col ramu de la variante, cada añu nos cuenten una trola nueva.

     Cola seca, tolos años quemen media Asturies y cuasi que nun prinden a naide.

     Autoricen a furar per tol occidente col envís de que llanten más mines d’oru y balses contaminantes y nun consulten nin siquier a los vecinos.

     La nuesa llingua, el padre del castellán, qu’esistía enantes d’este y enantes de qu’esistiera España, en pura diglosia, a la trágala pol artículu 143 y en agraviu comparativu coles llingües d’otres nacionalidaes.

     Equí, los paisanos soporten l’impuestu de socesiones que nun carecen n’otres autonomíes; mentanto, delles saquen porgüeyu fasta pa roblar los presupuestos.

     Dexábennos tocar y cantar na Gascona ya entamar concursos de tonada pa que seyamos a escaecer, pero agora multen a una banda de gaites por tocar al albentestate. ¿Qué va ser lo qu’entra, desaniciar les fiestes de prau?

     Pa dalgunos ta perclaru que toos somos iguales; magar qu’unos más iguales qu’otros y nós talamente echamos pelo, yá que somos malapenes: NAIDE.



martes, 16 de mayo de 2017

N'estinción

      
     Hai quien diz que los colexos madrilaños ya otros de delles ciudaes españoles tan enllenos de foriatos. Los qu’esclarien que los neños son neños tienen abonda razón; arriendes, la mayor parte son españoles. Los que son foriatos son los sos pás; magar que munchos yá tean nacionalizaos. Yo, que crucio Madrid davezu, veo que ye asina. Por culpa d’ello, presta ver dacuando en vez a los fíos –o fíes– de dalgún castizu de raigañu que, como nós, quiciabes s’alcuentre en procesu d’estinción.

lunes, 15 de mayo de 2017

De comunión per Granada


     Va ser verdá lu que dicen de que’l mundiu ye un pañuelu, Viri (Llar de Viri). Tuviera na comunión del fíu d’una sobrina en Granada ya’l día siguiente xintamos nel Oleum, ¿qué te voi dicir d’ehí que tu nun sepas? Sí t’esclariaré que’l to bon collaciu, Gregoriu García, al que yá conocía, ye un bon amigu del mio hermanu mayor, arriendes de vecín de la cai San Antón d’esa ciudá. Pa quien nun lu conoza, Gregoriu, l’amu del Oleum, ta mui venceyáu a Asturies a onde vien davezu y suel mercar productos asturianos qu’acarreta pal so restorán, sobre too del rodio de la faza de Grau. Amás, tolos años igua unos afamaos alcuentros gastronómicos onde amiesta lu meyor de les cocines asturiana y granadina.

jueves, 11 de mayo de 2017

El gatu con madreñes


    Ello foi una vez que morriera’l molineru’l reinu y dexara como heriedu al redrueyu de los sos fíos un cabañu esbarrumbáu ya un gatu malcuriosu, mientres que'l restu de los sos hermanos tuvieren muncha más suerte. El fíu pequeñu quixo abandonar al gatu o si acaso comelu como cachopu mixín, pero pa la so sorpresa’l gatu fala y siente ensembre. El gatu–y pide’l so sofitu, un par de madreñes ya un sacu, perxurando que–y fairá salir de la probitú. De secute, calzáu coles madreñes, pañó pal sacu les meyores fabes y berces de la contorna, y gracies a la so astucia ya arremangu ye a coneutar col rei, al que cocina’l meyor pote que papara na so vida. De resultes, quedara tan agradecíu, que–yos invitó al so palaciu, onde’l rapaz conoz a la princesa cola que se casa. Pa que seya a aguantar a esta, yá que yera abondo fata, y marche lloñe con ella–y nomen Marqués de Santarvás, algamando a vivir ricu pa siempres; mentanto’l gatu s’axunta cola gata del madreñeru’l monarca ya anguaño yá gasta madreñes ensin tasa. 

miércoles, 10 de mayo de 2017

Alderique d’un infeliz


Si te presta lo qu’escribo,
calca nel deu’l “me gusta”,
yá t’apurriré un recibu
por esa cuantía xusta.

Y, si acaso nun te presta,
te voi tornar tol dineru,
cola factura qu’amiesta
el reembolsu de cero.

Si mires pol asturianu,
en nome del titular
voi llantar que yes paisanu,
pa que puedas desgravar.

Si tas escontra l’inventu,
d’esti inventu milenariu,
esclariaré que lo siento
ya aportaré: “ye contrariu”.

Si ye porque nun lu sabes
y nun quies más que l’inglés,
qu’arrevientes coles fabes,
por refugar lu que yes.

Si sólo ye que te chinga
que daquién saque tayada,  
afaya la to gandinga,
que yo enxamás saqué nada.

Pueque seyas un bergante
y teas contra’l raigañu,
nun tien igua’l repunante
que manca por faer dañu.

El padre del castellán
aforfuga cola historia,
por culpa dalgún manguán
qu’anoxa la so memoria.

martes, 9 de mayo de 2017

viernes, 5 de mayo de 2017

¿Ónde y por qué?


¿Por qué tornasti a Granada?
¡L’amada!
Dende l’ablugu Madrid?
¡Cerviz!
Cuando aniciara la guerra
¡qu’aterra!

Ansí’l mio “ovillejo” berra
escontra’l sangre inocente,
por gritar Granada: ¡vente!
–L’amada cerviz aterra–.


Aterráronte en Granada,
pente oliva y amargura,
al pie de Sierra Nevada,
¿aú tará la sepultura?

miércoles, 3 de mayo de 2017

Fechoría


Enantes del Telecable,
enantes d’Álvarez Cascos,
falaben yá en nuesu bable,
una montonera vascos.

Magar s’escribe la historia
como al que manday peta,
la gloria pela memoria
ye un asuntu d’escoyeta.

Pero na tema’l llinguaxe,
nun viera tal burricada,
sacante la d’esta imaxe,
pola llingua trabucada.

Amosó la fechoría,
l’Actual (enciclopedia);
vos l’aporto en poesía
ente’l dolcu y manta media.

Afayái la reflexón
que si’l mapa fora real,
netu al de la ilustración,
sedría’l bable oficial.


martes, 2 de mayo de 2017

Nun fui yo.

    
   Esta foi de Bretón de los Herreros, que naide piense que foi una de les de Pindesierra...

     El doctor D. Pedro Mata, afamáu mélicu y poeta del sieglu XIX, tenía como vecín a unu de los poetes románticos más bohemios y candongueros de la dómina: Bretón de los Ferreros. De cutiu, los collacios de Bretón diben buscalu a altes hores de la madrugada y davezu trabucaben de puerta, picando na del honorable mélicu. Mata, fartu de que-y fadiaren el suañu, asitió un cartelu na puerta l’edificiu, qu’amosaba asina:

<<Nun vive nesta “mansión”
nengún poeta bretón>>

     A lo que Bretón retrucó con otru cartelu qu’asoleyaba d’esta miente:

<<Vive nesta vecindá,
ciertu mélicu poeta,
qu'a la fin de la receta
robla Mata y ye verdá>>