Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

lunes, 29 de noviembre de 2010

VELA O REYU


En xineru d’esti añu, los xubilaos nun recibieron paga compensatoria nenguna. Pal añu que vien, tampoco, por culpa de que tan conxelaos. Agora van xubir pola esviación de la inflación un ruin 1,2 %; mentanto que les tases, la lluz, el gas o los carburantes xuben una burricada. Asina, van poder mercar una vela p’allumar l’escusáu mientres caguen o un reyu pa colingase d’un rebollu. D’otra miente, los qu’armaron la crisis nun van tornar nada de lu que garraron.

lunes, 22 de noviembre de 2010

LAS PANOYAS DE TINA


Colingando d’una esquina,
enriestrando’l so maíz,
tan las panoyas de Tina,
que colaron pa Madrid.

Antes taben na panera
de la so casa en Sorriba,
dexanon esa fastera,
mentanto que yo me diba.

Ablucáu quedó’l raitán
que nel cielu da’l rabil,
pel pandu “Nuevu Baztán”,
nel casar de Vi!!aouril.

Camudaron corredor,
tamién, finxu cardinal,
l’orbayu pola calor
ya la xelada ivernal.

Amarie!!an nel riscar,
encaldien n’atapecer;
albentestate, el pingar,
de la qu’entama a !!over.

Nortiando los olivares,
sofiten la renombranza,
pente xineiru y payares,
distrayen la so folganza.

Asina, dende aquel día,
a la vera la Santina,
amuesen asturianía,
repolitando esa esquina.

lunes, 15 de noviembre de 2010

De cote


Una vegada, traté d’acolumbrar el mio perfil Facebook; pero, nun fui quien a ello, yá que me proyeutaba de frente y, si m'allugaba de llau, nun me vía.

jueves, 11 de noviembre de 2010

EL MARTIELLU TEXAS



Topáronlu fosilizáu en 1934, a la vera la localidá texana de London. Taba encualláu na roca. La madera'l mangu fosilizada y la tiesta fierro fundida cola peña. Esto quier dicir que'l martiellu yera ¡más vieyu que la roca!

Mentanto, enforma tiempu, el martiellu crió povisa nun pequeñu muséu local, fasta que daquién fizo un analís detalláu. El mangu de madera petrificada quier dicir que tuvieron que pasar siquier 140 millones d'años pa esi procesu. Cuando los primeros homínidos nun surdieron hasta fai 7 millones d'años y fáense ferramientes fai namái 2 millones. Tocantes a la cabeza fierro ye d'una pureza cuasi total, daqué que pue llograse seique con avanzaes téuniques metalúrxiques.

¡Madiós!, yá sabemos que tamos en crisis; sicasí, ye una vergoña qu’un muséu americanu nun seya a mercar un martiellu Palmera d'esos más curiosos por si tien que cabruñar dalgo.

domingo, 7 de noviembre de 2010

ABURRÍSE N’ALDEGA


Domingu, comercios abiertos, vezos de ciudá, idees fixes: “la vida nos pueblos pequeños ye mui aburrida, sobre too pela seronda y pel hibiernu...”

Esguilar los cuetos, andar pelos cordales, agüeyar riscares, columbrar animales, sentir los páxaros, galguiar nos caminos, amagostar castañes, calecer nel llar, xintar de lleña con fogaza mestura, saboriar un café puru, char la partida nel chigre, dir de filandón, cantar cantarinos, apingayar nun escañu...

Asomo al corredor de la mio casa, la xente se distraye faciendo “Alcamping”, quedo ablucáu, ye qu'a min préstame tar aburríu.

viernes, 5 de noviembre de 2010

L’AMARRE POLOS APELLÍOS


(Escudu del apellíu “Castrón”)

ASTURIAS
La polémica de los apellidos divide a los asturianos
LNE (5-11-2010)

Yo conozo un fíu puta que quier siguir calteniendo, d’entamu, l'apellíu’l so pá.

miércoles, 3 de noviembre de 2010

¡MEDRAN LOS INGRESOS (HOSPITALARIOS) POL “TURISMU”!


“Vinimos a España pa un casoriu y pa que la fía pariera nesti país tan afayadizu” —camienta la ma de la mociquina que tuvo un neñu con 10 años—. La xente queda ablucada porque ye mui nueva; agora que, yo sentí pela cai que’l padrín va ser un güelu de 15.

martes, 2 de noviembre de 2010

DEPRENDI ASTURIANU


ALVERBIOS D’AFIRMACIÓN

sí, claro, tamién, daveres, mesmo, mesmamente, escurque, seguro, masina, etc.