Adulces

 Cataluña asume la mayor liberación de peajes en plena operación diálogo

La autopista con mayor tráfico de España y la más antigua pasan a ser gratuitas este miércoles. (El País, 30.8.21)

¡Mialma, cómo furrulen los xantaxes! Zapatero yá nos prometió nes eleiciones del 2004 el desaniciu del peaxe de la d'AUCALSA, pero, como equí nun amenazamos cola dixebra, la promesa quedó en cuentu. Arriendes, pa dir o venir de Madrid, tamién carecemos lu d’Adardineru. D’otra miente, van apurrir 1700 millones pal aeropuertu del Prat, mientres el ramu del furacu del Tren del Añu que Vien, se retrasa agora pal 2023. Siguimos más “despacín” que’l Fonsi.

(Semeya, El País)

Pancín

 

Ayeri foi’l Día’l Gatu,

mañana será’l del Fatu,

al naide dicime nada

nun llanté yo esta encoplada…

___________________

Soi fíu de Rufina,

vivo onde Pin,

mexo nuna esquina,

soi mui menudín.

 

Nun llavé’l focicu,

porque entá nun sé,

al ser pataricu,

polo que se ve.

 

Tampoco, los güeyos,

ando llagañosu,

refugo trafueyos,

carezo d’anoxu.

 

Soi pardu, soi pintu

y tamién mariellu,

anque non retintu,

blancu en pata y cuellu.

 

Soi de colorinos,

como arcu la vieya,

gusto a los neñinos,

a tola reciella.

 

Duermo nun requexu,

cúriame mio ma,

nun probara’l quexu,

de mamar me da.

 

D’entamu, nun platu,

güei m’apurrió Pin:

croquetes de gatu,

mestura y pancín.

La nota

 

     Siguiera dando la nota por llibre. Acarretábanos el Metro de Madrid a esaminanos a un llugar estrañu con caderalgos desconocíos ya aventábemos la medrana cantando cantares de los guah.es d’aquella dómina. Como tampoco calteníamos odiu nin xacíu pa odiar y en casa naide t'esclariara lu que se careciera nun pasáu recién fora quien a sobresalir na asignatura del espíritu de los otros. La ilesia encomendábate  la so doctrina ya arriendes nun me torgara de sacar una matrícula d’honor na so relixón. Esa educación que mamara de los mios pas me consintiera falar con xentes de dambos bandos y nun refugar a nengún paisanu por culpa de la so tendencia; sicasí, fui yo mesmu’l que rindiera de los radicalismos y separtara de les andeches cuando se falaba de política porque cavilgo que nun xenera más qu’esi odiu que nunca amosamos nel nuesu llar.

La condición humana

 

¿Sois a creyer qu’allá pel añu de 1965 yera alumnu llibre? Pa mio idea, yo, enxamás tuviera esa condición, nin siquiera la de notable que m’endilgara’l Secretariu del Tribunal que debía ser abondo importante yá que s’imprentaba con mayúscules. Daquella había muncha xente importante, armada y poderosa. Nós nada nun teníamos por culpa qu’al mio pá−y pañaren tolos cuartos qu’aforrara por allugase na faza contraria a la de los ganadores de l’amarraza.  Yéramos probes de solemnidá y por nun tener nun teníamos nin envidia; sicasí, a naide pidíamos nada. Nin que dicir tien que nós, escontra forga, tampoco robábamos. Anguaño tol mundiu pide o envidia y cuasi tol mundiu roba o ocupa. Hai probes que yá nun son de solemnidá, sinón que son d’oficiu. Ye’l casu que s’enteraron n’otros países nos que nun tienen nengún respetu pa colos lladronos o pinxonos y se vienen pa equí a arrampuñar en cuadriella. Ta perclaru qu’a la bonaz. De resultes, la xente honrada paez que nunca será quien a espolletar, ensin querer referime a los idealistes y políticos que camuden los sos ideales y el so odiu pol puestín o'l dineru, o por dambes coses a un tiempu. Esta ye la “so” condición: la condición humana. Podéis caltenevos argutos.

Corquiéu y Ribeseya

 

Taba tancáu’l Corquiéu,

el Corquiéu taba zarráu,

col so chigre ensin xaréu

y el paséu del cai cambiáu.

 

Nin siquiera un xaponés

cantaba Ribeseyana,

ye un mal añu, ye un mal mes,

col andanciu na solana.

 

Hai bien d’años que nun diba,

calteníase La Guía,

cola virxe ellí enriba

ya allá lloñe, Guadamía.

 

Equí corrí la noviada,

d’equí colara a Cuadonga,

aguantamos la boriada

y xubiéramos a Ponga.

 

Cavilgamos ente peñes,

pela faza del Infiernu,

qu’escaecimos Tereñes,

Vega y el Camín en ciernu.

 

Tornaremos otra vez,

como’l ríu pela oriella,

onde cola mar se mez,

afayando en Ribeseya.

 

Pa entós tocará Corquiéu,

anque seya n’Atalaya,

Lluci entonará d’abéu

y Pin esfrutará a esgaya.

Al presidente de Perú

Tando yo la selmana pasada pel monte sintiera que’l nuevu presidente del Perú de los peruanos espetara a los convidaos de piedra españoles na so toma de posesión que “mientres los tres sieglos que pertenecieron a la corona española esta dexó esplotar los minerales que sofitaron el desenvolvimientu d'Europa”. Ye’l casu que, como la nuesa delegación nun aldericó nada, voi retrucar yo a esi cabezaleru de tan escomunal sombreru…

Sr. Castiellu Tarrones: Los romanos, munchos sieglos enantes, yá llevaben l’oru del noroeste d'España por tonelaes ya enxamás reclamamos nada nin a los italianos nin a los suevos nin a los vándalos nin a los alanos. Anguaño, una compañía del norte del so continente páñanos l’oru y contamina la faza per onde estraye n’Asturies ya arriendes quier meter mano a la mayor reserva d’Europa occidental d’esti metal, que tamién s’alcuentra nesta comunidá, ensin que la nuesa alministración tampoco lu refugue. D’otra miente, repostia−y –por si nun lu sabe− que n’España (con cuasi 4 millones de paraos) viven más d’un cuartu de millón de peruanos ensin colonizar, más otros dellos milenta nacionalizaos españoles. Por aciu d’ello se m’abulta que, dacuando en vez, l’ala del sombreru nun nos dexa ver la viesca.