El babayu

"Es muy fácil vivir haciendo el tonto. De haberlo sabido antes me habría declarado idiota desde mi juventud, y puede que a estas fechas hasta fuera más inteligente. Pero quise tener ingenio demasiado pronto, y heme aquí ahora hecho un imbécil."

"El idiota", Fiodor Dostoievski.

    Asina siguimos: Los más fatos del mundiu viviendo a cuenta de los más preparaos; los que fuelguen, a cuenta de los que trabayen; la xente guapo, a cuenta del refugayu; los lladronos, a cuenta de los que desocupen. Les puertes xiratories entá voltien como turbines mientres los padrinos emponderen al afiáu y los cabezaleros miren pa otru llau.

      Si vuelvo a ñacer, yo tamién seré entuvía más babayu, Fiedor.

     “N'España'l méritu y la cultura nun se premien. El vividor apremia y vive del eméritu colo que nun paga la pena estudiar” (Pin Estrella).

La boda de Milia

Hai unos díes que recibí la invitación pa la boda de Milia

La moza más fea

del nuesu llugar

vive na mio aldea

y se quier casar.

La menos galana

de tola parroquia

nun sal por galbana,

fala con un Nokia.

La menos curiosa

del nuesu conceyu,

arriendes ye sosa

y cortexa a un vieyu

qu’atropa millones

y nun tien familia.

Dende Reis los dones

apurren a Milia.

Al tar afitada

la fecha’l casoriu,

se verá casada,

anque ensin amoriu.

Vistirá de blancu,

él con tarabica

y cuenta nel bancu

que la fairá rica.

Cola fanegada

va ser atrayente,

ella va ensin nada,

él ensin un diente.

Seduz el dineru,

qu’aporta guapura,

al finar xineru,

–yos bendiz el cura.

AVISU

ESTI YE UN AVISU P’AVIADOR DRO:

• Si nun se desanicia aína’l peaxe’l Güerna como prometistis.

• Si nun furrula l’AVE d’equí a 5 meses pela Variante Payares.

• Si nun s’oldea l’impuestu de socesiones col de Madrid.

• Si nun s’obliga a la retirada inmediata de cualesquier contaminante de balses o escombreres de les mines d’oru.

• Si d’equí a un añu nun ta en funcionamientu la totalidá de l’autovía Uviéu – La Espina.

• Si a tol que se garre atizando na viesca nun se–y meten diez años replantando.

• Si l’asturianu nun ye cooficial yá...

Me voi proclamar presidente d’Asturies pal añu qu’entra y pueque al to Xabel–y dea una amnistía.

En El Peligru, a 28 díes andaos de xineru de 2019

Prioridá

A la vera’l ríu Nora,

contárame’l Pataricu,

diendo camín de La Puela,

que cuerre más priesa agora

andar metiendo’l focicu

en comuña en Venezuela.

D'oca a oca

¡D'oca a oca

y tiro porque me toca!,

voi pasiando pel paséu,

pos llevantéme bien ceo

al ser la murnia preséu,

que pon la cabeza lloca.

¡D’oca a oca

y tiro porque me toca!,

que me toca a min la carga,

por ser la tristura amarga,

mala cubierta de sarga,

cola que tapar la boca.

¡D’oca a oca

y tiro porque me toca!

Cielos de maraña

Cielos de maraña,

sol a esconderite,

xelu pela braña,

na vega, convite.

Xuega cola tiza,

el que pinta’l cielu,

azul d’engañifa,

finxu a carambelu.

Ñubes d’algodón,

rastros de farapos,

povisa y cotón,

axuntando trapos.

Nublina al riscar,

ralu al mediudía,

si entama a orbazar,

posa en casería.

El monte con capa,

nun aguardes más,

cola tuya escapa,

mira a onde vas.

Tayu en avesíu,

mocu en solanera,

malva pal sufríu,

miel pa la mormera.

Ñeve n’antoxana,

nun salgas de casa,

si puedes, mañana,

carga cola rasa.

Cielos de maraña,

café y marañueles,

bollos per Cuaña,

preñaos en Quintueles.

¡Qué naide me mande!

Daqué de frixuelu,

seique abondo d’horru,

fadio y doi asuelu,

ensin el mio aforru.

Peñero farina,

zucre, sólo un plizcu,

¡echa–y güevos nina!,

de llimón, un mizcu.

Soi amás beleñu,

arriendes d’argaña,

magar como un neñu

al que nun s’engaña.

Soi cuetu, boroña,

güelga ya abeduriu,

nun trago la goña,

nin me torga’l muriu.

Nun pido gabitu

nin detién el matu,

nun como cabritu,

me repuna’l fatu.

Asoleyo brenga,

anque seya vieyu,

nun farto de penga

y sí del arreyu.

Enllordio col barru,

avezo al pigazu;

pero para’l carru,

si garro l’angazu.

Qué naide me mande

d’un llugar llonxanu,

porque–y monto’l tande

falando asturianu.

Esparates

     Echéme cavilgando en que, si los vehículos diésel contaminen, que torgaren de vendelos y non primeru vendelos y dempués llantar una burricada tases a los probes (los coches de gran cilindrada de los ricos gasten gasolina). Foi’l casu que darréu soñé que falaba con Kafka y conviniéramos en que nos traten talamente como a los sos propios inseutos. Espetárame qu’España tenía qu’españar per dalgún llau al imponenos l’esparate de sovencionar tanta ayuda a foriatos qu’enxamás cotizaron –munchos de países de los que nos aventaron– mientres conxelaben dellos años les pensiones amenorgando’l so poder adquisitivu y faen trabayar a los d’equí como verdaderos esclavos.  Prevía un futuru ensin identidá aneyáu de trabayu y de perda derechos nel que los vieyos amorrentaben na mesma xera. De la que m’esperté, comentárame’l fíu que quieren retresmitir los partíos de fútbol de segunda división n’abiertu pa tol mundiu mundial y qu’equí los van caltener de pagu.

D'horros y frixuelos

Pablo Casado, sobre el asturiano: «Quiero una educación de calidad en la que los niños asturianos no estudien solo los hórreos y los frixuelos» (El Comercio, 12.1.2109)

Amás d’horros y frixuelos,

educación calidable,

falando como los güelos,

porque falamos en bable.

Como faló Xovellanos,

ensin un enfrentamientu,

nun vengáis los castellanos

a lleldar ensin formientu.

L’asturianu nun ta en riesgu,

nin apurre beneficiu,

a los güeyos d’un biliesgu

de la que fala de viciu.

Lleva años aforfugando,

yá que tuvo prohibíu,

que lu prohibiera un bandu,

¿o nun lu tenéis sentíu?

Vos lo cuenta un apolíticu:

ye meyor documentase,

anque los del paleolíticu

aínda tuvieren pase.

Col asuntu la variante,

el reclamar güei’l ramu

nun queda mui elegante,

porque tabais vós d’entamu.

Ave, horros ya’l frixuelu,

col peaxe l’autovía,

nos tomáis toos el pelo

y nos amargáis el día.

La caxa gatos

Mercara una caxa gatos,

nun m’entraren más que tres,

ún más llistu, dos más fatos,

y nengunu siamés.

Siamés, que nun ximielgu,

pos l’asturianu ye asina,

rescatara otru d’un pielgu

y yá acuartia la caxina.

Nun son coses nin mascotes,

que son cuatro seres vivos,

nun lu garren los más zotes,

nin tampoco los furtivos.

Nin el que mata na plaza

cuntando que ye cultura,

nin el que–y presta la caza,

nin daquién que–yos tortura.

Tienen derechu a vivir,

como lu tien el paisanu,

naide saque a rellucir:

civil, penal o romanu.

Que los redautara l’home,

ensin consideración

pal ser qu’esclaviza o come,

la tema ye de caxón.

Son animales amigos,

compañeros de miseries,

sienten, como nós, respigos

y carecen les llaceries.

Ronronien, enxamás bufen,

miaguen cuando pidigañen,

mexen en sable, nun tufen,

nin esgatuñen si bañen.

Mercara una caxa gatos,

paecerá esparate

qu’arriendes de ser sensatos,

coman conmigo tomate.

El cuentu que nun foi

Ello yera una vez… Asina comencipiaría si fora un cuentu; pero nun lu foi.

     Davezu merco achiperres y mierdines que más p’alantre la muyer acaba basculando na basoria. Foi’l casu qu’un domingu cualesquiera merqué un oxetu cualesquier en cualquier mercadín. Namái acarretalu n’embueza, entamó a confiame callandino la so murnia historia. Tuviera delles selmanes ensin vender por culpa qu’a la xente se–y abultaba que nun valía pa nada. Foi iguáu pa festexar los 66 años trescurríos dende un gayoleru casamientu. Pocu dempués morrió la indixebrable pareya ya unos meses más sero a un pariente se–y ocurrió que yá caltuviera l’alcordanza per tiempu abondo. Daquella, la guapa piedrina cola so cruz enllastrada visitó por primer vez el calderu de les borrafes. Pela nueche un balanchín la recuperó del contenedor ya’l restu del drama yá lu conocéis.

“Los cuentos siempres finen bien; la vida siempre acaba mal” (Pachu’l de Tubongu)

La Rexenta

     Acabo de volver d’Asturies onde me caltuvi malapenes diez díes, magar que yá conocéis que d’Asturies enxamás fino de tornar. Perdonái los que nun felicité o nun retrucara nesi tiempu, pero yá sabéis qu’ellí toi incomunicáu. Arriendes d’axuntame con una montonera d’emponderaos amigos, xinté cola mio hermanina, Ánxeles. Ye’l casu qu’aínda síguenme entrugando pola nuesa conexón y güei quixera esclarialu a traviés d’un cuentu…

     El xueves pasáu tuviera caleyando per Uviéu y de la que la muyer mercaba nun comerciu yo anduvi escuclando pelos escaparates de la faza. Na cai Miliu Alarcos quedé mirando pa un llibru qu’ufiertaba una llibrería. Yera “La Rexenta” que Vitor Suárez tornara a la nuesa llingua. Nun lu merqué por culpa que teo cientos de llibros por lleer y dellos de mio que l’Alministración coles sos lleis me torga d’espublizar. Al otru día, dempués de la comida –mientres la heroica ciudá echaba’l pigazu–, la mio pariente m’apurrió un afayadizu regalu nun percuriosu paquetín mariellu que fui desendolcando adulces. De dientro, ente los mellones de llibros qu’esisten imprentaos nesti abegosu mundiu, remaneciera la obra de la semeya.