Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

martes, 31 de octubre de 2017

Dellos apuntes sobro les verdures de Bruseles

   
     Les verdures de Bruseles pertenecen a la gran familia de les Crucíferes.

     Anque les verdures de Bruseles tán disponibles tol añu, la so meyor dómina s’alcuentra nos meses de seronda ya iviernu, dende ochobre hasta avientu.

     El conteníu de fibra que nun eslle ye eleváu, lo que favorez la sensación de fartura ya'l tránsitu intestinal, colo qu'ameyora l'estriñimientu. Pue provocar cagalera.

    Estes verdures son les que más caloríes apurren de la so triba.

    El tastu amargoso de les verdures de Bruseles se debe al so conteníu en goitrina.

   Contienen magnesiu, qu'ameyora la inmunidá y tien tamién un nidiu efeutu laxante.


    Destaca la presencia de potasiu, fósforu y yodu, asina como cantidaes discretes de cinc y calciu (de probe absorción). El potasiu participa na tresmisión y xeneración del impulsu nerviosu. El yodu ye un mineral indispensable pa que furrule bien la glándula tiroides. Ésta produz les hormones tiroidales, qu'intervienen en numberoses funciones metabóliques como'l caltenimientu de la temperatura. Coles mesmes, el yodu ye esencial na crecedera del fetu y nel desenvolvimientu del so celebru.

lunes, 30 de octubre de 2017

¡BRUSSALEM!

(L. Digital)

Nesti “moment en Brussel·les somiarem”
como nel “temps de les pel·lícules” mudes.
Ye “le moment en què Brussel·les” pescudes,
ye “le moment en qu’en Brusselles, ¡BRUSSALEM!”

Tol mundiu riendo del so pelo
mientres él lo toma a tol mundiu.

domingo, 29 de octubre de 2017

El xarabe

     
     Mientres la Segunda Guerra Mundial, el Jägermeister tuvo gran sonadía pente les tropes alemanes al ser emplegao como anestésico y como desencetante. Agora, dalgunos lu echan nel frascu del xarabe para no ser reñíos pola muyer. D’esa miente, chumen una bona cuyaradona pa la tos ficticia y dempués vienen les amarraces –como nel anunciu de la televisión–: “¡Ah, güelu!, ¿visti l’Inistón?”. Equí, na mio casa, cuadró que taben l’un a la vera l’otru.

     Namái cinco persones conocen la so receta. Nicole Gütte, una de les privilexaes sabedores, cunta que la llave del cuartu colos 56 ingredientes ta en manes d'un únicu paisanu. El so escoyíu logotipu (la tiesta d'un venáu con una cruz en mediu) guarda rellación cola lleenda de San Huberto, afitada na hestoria d'un repunante rapazu que dedicaba gran parte de la so vida a aniquilar cuantes especies–y salíen al so pasu. Un día en monte crucióse con un ablucante venáu blancu, pero cuando se disponía a disparar reparó que nel cornín tenía una perguapa cruz y los sos deos quedaron petrificaos nel gatillu de la escopeta.

jueves, 26 de octubre de 2017

Si'l mio poema valiera...


Si’l mio poema valiera,
tanto como la escopeta,
nel disparu floreciera,
una rosa d’escoyeta.

Si algamara to sorrisa,
por bien pagáu quedaría,
que me l’aporte la brisa
que llega al riscar el día.

Si esfrutas colo variáu
y si te presta l’encople,
el mio versu encadenáu
va ser llibre cuando sople.

Escríbolos n’asturianu,
la primer llingua romance
que, tres el llatín romanu,
tuviera España al so alcance.

Te lu apurriré col cuentu y
lu franquiaré col calmu,
pa que cuando sople’l vientu
seya pa ti por ensalmu.

Mañana al algame tuyu,
pues lleelos nel escañu,
pues lleelos con arguyu,
na to llingua de raigañu.

Refuga al ranciu que diz
que ye de llaboratoriu,
nun teo probeta en Madrid,
namái lletra ya abaloriu.

Nun ye de tubu’l mio ensayu,
son muestres en versu o prosa,
anque–y cafie al más payu,
el so arume nun escosa.

Semiente de mano y coldu
espardo al mar, cielu o sable,
brotará sobro’l rescoldu
qu’armen cola viesca y bable.

Si’l mio poema valiera
pa siempres el to afalagu,
bon pagu correspondiera,
correspondiera bon pagu.

miércoles, 25 de octubre de 2017

El gatu El Espín

(Garráu d'Ángeles Rodríguez)

Nunca viera un gatu verde,
en nengún país d’Europa
ya ellí onde’l sol se pierde,
lu vi tres d’un cestu ropa.

Como un cactus con espinos,
igual qu’un espín gayeru,
el más guapu los misinos,
el gatu más gayasperu.

Alcontrélu en El Espín,
nel conceyu de Cuaña,
magar que ye mansulín,
pincha, pero nun araña.

Natural d’Espinaréu,
garró la color verdosa
por vivir pente un fayéu,
onde’l llentu nun escosa.

El so espín ye d’escoyeta,
si nun lu yes a salvar,
el gatu l’espín espeta
y pue que seya a encetar.

Ye’l casu que nin afuña
y que tampoco ronronia,
arriendes, nun esgatuña,
paez xeláu en Laponia.

Duldo sía de verdá,
porque nun sentí si miaga,
anque a la mio vera ta,
nin siquier come la maga.

Lu teo llantáu de tope,
pa que nun zarre la puerta,
nun creo qu’a un ratu cope,
yá que lu merqué d’ufierta.

martes, 24 de octubre de 2017

El día la biblioteca

(Semeya, Mis pueblos)

Pa tolos mios amigos bibliotecarios/es, que yá teo bien d’ellos, y, como non, pa tolos ñeños.

Güei ye día 24,
traxo ochobre cola seca:
la poesía y teatru.
¡Ye’l día la biblioteca!

Esa guarida del magu,
onde s'ufierten los suaños,
onde nada ye de pagu,
pa xente de tolos años.

Toa clas lliteratura,
too aquello que cariares,
la novela d'aventura,
los sones de mil llugares.

La ciencia colos inventos,
la melicina del Huca,
una montonera cuentos,
la isla de Tacatuca.

Dellos diversos idiomes:
inglés, francés, italianu…,
la gramática y les comes,
y, como non, l’asturianu.

Onde Interné se fai fueya
daprendiendo afalagando:
onde naz el ríu Seya,
onde tan Pingón y Pando.

Con tola xeografía
d’Asturies y l’Universu,
cualesquier biografía;
arriendes, la Biblia en versu.

Aportó ochobre la seca,
pero tamién l’esconxuru,
buscalu na biblioteca,
ye la lluz del to futuru.

domingo, 22 de octubre de 2017

¡MESSI al MADRID!

(Semeya, Estadiodeportes)

     Ante les caberes declaraciones de Bertoméu nes que manifestaba que’l Barça anecia col so sofitu a les instituciones de Cataluña, el Gobiernu decidió esta mesma mañana intervenir ya aplicar tamién l’alverbiu 155 al C.F. Barcelona. De resultes, el xugador Lionel Messi deberá incorporase provisionalmente a la plantía del R. Madrid C.F. Los equipos asturianos tampoco salen mal paraos d’esti alcuerdu yá que Lluis Suárez fora asignáu al Sporting de Xixón y Xerardu Piqué al Real Uviéu. D’otra miente, Shakira pasará’l miércoles qu’entra a la disciplina del coleutivu “Muyeres”.

jueves, 19 de octubre de 2017

Fíu d'un poeta en Nueva York



Esi que guarda entá buelgues y bastiu del monte.

¡Sollerte!, ¡sollerte!, (encamientu al que–y pete).

Ye un rapaz que nun sabe la intención de la ponte.

Naide dormi. Naide ensin gafes va ser a vete.


     Tornara’l fíu de Nueva York. Nada sabía de la revesosa intención de la ponte de Brooklyin, como nada sabía'l guah.e del que falaba Lorca. Por embargu, la moza ya él enredaben n’ayén sobro ella y les sos gafes cayeron a les repunantes agües del Hudson. Yeren unes gafes de ver y de marca. Nada vía cola marca, magar que sí a traviés de los cristales ya agora nada podría ver mientres la so estancia. Si dalgún va a Nueva York a faer somarinismu nes insensibles agües d’esi ríu ya atopa esos lentes, fágamelu saber per un priváu que son del fíu d’un poeta en Nueva York.

    Sí, tornara’l fíu de Nueva York, y yá en casa nun tris va y m’entruga: “¡Ah pá! ¿anduvisti restolando col candáu de la maleta?” Darréu, yo–y retruqué que non y de la que foi quien a abrila s’atopó col avisu de la semeya. Pa los que nun seyáis de les brigaes anglófones antibable y nun sepáis un plizcu inglés, vos voi resumir lu qu’espeta:

“Pa protexer a vusté ya a los sos collacios, l'Alministración de Seguridá focicó nel so maletu. Si fora’l casu que tuviera dalgún dispositivu de seguridá –la suya con minúscules–, l'oficial pudo chingar el so piesllu. De resultes, nun somos responsables del dañu causáu. Tamos mui agradecíos pola so comprensión".

     Yo, qu’enxamás salgo de turismu per Foriataland, pruyo por dir a Nueva York cuando la cotización del dólar baxe a l’altor de les víes del so metru al envís d’escuclar les rates que s’afayen sobro elles.

martes, 17 de octubre de 2017

Les llárimes del cielu desanicien, otra vegada más, el siniestru total…

(Semeya, La Vanguardia)

A un tiempu, col mio xeitu, Asturies quema,
tolos años anecia’l mesmu cuentu
que nes serondes fina col llamentu,
pero ensin solución, impune’l tema.

Camuda la color, la Verde Xema,
ensuga ensin razón el mantu llentu,
por culpa del envís del avarientu
que col mistu na mano de fueu sema.

Caleyando n’ayén, p’alzar cabeza,
anubre’l mio maxín ya anubre’l día,
nun pueo discurrir m’entra pereza

per acio de qu’amburo na poesía,
porque otra vez quien manda lu escaeza
y puea más que la Llei la fechoría.

Asina l’autoría
prendió Asturies y llibra en so llocura,
remanez col rescoldu l’amargura.

jueves, 12 de octubre de 2017

Aquisgrán


     Nun sabía que coime yera lu d’instagram, magar que cada vez que lu vía cuntaba que yera Aquisgrán ya eso nos socede a la xente que llee namái perriba. Yá sabéis que nel mio casu ye por culpa que, como carezo de tan mala memoria, teo abonda llectura con repasar lu qu’escribiera hai unes selmanes y que yá escaecí. Tornando a instagram, bien seguru que dende allí vas a ser a escuclar semeyes d’Aquisgrán y per ende del restu de Colonia en Renania. Pa los que nun teais estudiaos, esclariar qu'a Aquisgrán tamién–y llamen Baños d’Aquisgrán y, de resultes, tienen la colonia bien afayadiza. ¿Garrarais la fatada? Aquisgrán tien tamién la so guapa catedral y nun soi quien a alcordame sí tuviera nella en suaños (yá sabéis, pola mio mala memoria). Onde toi bien seguru que nun calcara ye nel Elisenbrunnen, porque con esi nome abúltaseme que si m’alcordaría. Namái, amestar que nun voi abrir cuenta n’instagram porque nun–y voi mandar nada.

miércoles, 11 de octubre de 2017

IBI, comparanza


Arriendes de pagar más en Grau qu'en Madrid, no que toca a los servicios públicos de la cai…

• L'allumáu públicu nun furrula davezu ya una farola ta ensin el so globu dende hai más d'un añu.

• Pol recibu del agua y l’alcantarelláu, magar que nun gastes un gotu, manguen un mínimu de más de 50 euros.

• Cuando llueve, l’agua –que ye del mesmu Cubia– sal con cierta frecuencia revuelto pel cañu.

• Dacuando en vez, si llueve o xaraza fuerte, inúndase la faza.


• D’otra miente, bien de coches aparquen enriba l'acera.

martes, 10 de octubre de 2017

Alvertencia


     Quería alvertir que’l mio feisbuc lu abrí hai cuantayá col envís de sofitar la llingua asturiana, aportando los mios cuentos, poemes y rellatos curtios, venceyaos a los mios blogues: “Pimpiruladas de Pin” y “Figos en Courias, cagalera en Cangas”. Cola páxina de “Las vaqueiras y la tonada asturiana…” pruyo por otru tantu, arriendes d’agabitar tolo que se refier a cantares asturianos. Nesi feisbuc, aceuto toles solicitúes d’amistá de xente asturiano o interesaos pola nuesa cultura. A naide estremo poles sos idees polítiques y, de resultes, rogaría que naide colingue proclames o comentarios que foran a enfocicar a los otros, por un elemental respetu y pa que nengunu s’amarre por culpa d’ello. Sicasí, faigo una esceición pal refugu d’estes solicitúes y ye nel casu de que dalguna d’estes persones asoleyen na so muria imáxenes o semeyes de cualesquier triba de maltratu animal o seyan páxines de publicidá. Munches gracies a toos pola vuesa comprensión y por caltenevos a la mio vera andechando nesta xera.

lunes, 9 de octubre de 2017

DERECHU


La pensión contributiva ye un derechu de toos aquellos que contribuyeron toa una dómina cola so cotización al envís de crear un remanente que-yos permita, cuando-yos llegue la so xubilación, poder vivir dignamente d’alcuerdu colo cotizáu. Como nun se trata d'una llimosna o una sovención caprichosa qu'apurran los políticos, sinón daqué particular d’esos trabayadores, estos nun tienen derechu a retayala nin a disponer d'esa caxa pa otros conceutos, debiendo atender estos con cargu a otres partíes. Por embargu, dicha vergoña se parafitó mientres los últimos años, quiciabes orixinada por ser esti'l sector más feble de la nuesa sociedá. Güei, en Madrid, los xubilaos –gran parte d’ellos asturianos– aldericaron escontra d’esta ofiensa pa qu’enxamás se repita, se recupere lu tosquiláu nestos caberos años y s’actualice, d’agora en adelantre, d'alcuerdu al I.P.C. como s'aporta tienen “DERECHU” al marxe del partíu que mangonie nel poder.

domingo, 8 de octubre de 2017

¡–Y DIMOS AL VOLTAREM!


Por sorpresa, nós tamién,
–y dimos al “voltarem”,
a pesar de lo que cuesta,
ficimos la macroencuesta.

Al haber xurisprudencia,
nada nos torgó l’Audiencia.
Nel Feisbuc foi la consulta,
pa que naide pague multa:


¿QUIER UN PAÍS ASTUR INDEPENDIENTE
CON PINDESIERRA COMO PRESIDENTE?

Sobro un censu d’un millón,
votaron “SÍ” tres millones,
mil, “NON” desconexón,
en blancu, diez carbayones.


¿Y SÍ FINEN LA VARIANTE,
PA XINERU’L PRIMER DÍA,
DESANICIEN EL CAFIANTE
PEAXE DE L’AUTOVÍA
YA'L CÉNTIMU SANITARIU
DE COMPARATIVU AGRAVIU,
L'ASTURIANU COOFICIAL,
PA QU’A NAIDE PAEZA MAL,
Y SOMOS A ECHAR LA UÑA
AL PASTEL DE CATALUÑA?

Toos somos españoles, españoles,
españoles, españoles,
arguyosos pola gloria
de ser primeros na hestoria.

miércoles, 4 de octubre de 2017

De muerte ya amor eternu


Un cura ingresáu tres espertar el muertu nuna parroquia de Compostela

Taben xugando a baraxa
na puerta del cementeriu,
riendo xunto a la caxa,
solo'l muertu taba seriu.

Al sentir tantu glayíu,
el muertu se llevantó,
dio a les veles un soplíu
ya’l veloriu se finó.

Na dómina los apostoles,
los homes yeren barbaros,
xubíense pelos arboles
y papaben los paxaros.

Voi mandar que me sotierren
sentáu de la que me muerra
pa que toles que me berren
sienten conmigo na cuerra.

L’albarda que yo montaba
la ensiella'l mio compañeru,
el preste que me quedaba
foi que la monté primeru.

El gallu en so gallineru
abre les nales y canta.
El que s’echa n’otru ñeru
mui bien ceo se llevanta.

Te quiero tantu vidina,
vidina tantu te quiero
que, si me cai la retina,
mírote pel aguyeru.

lunes, 2 de octubre de 2017

HABÍA...


Había murnia na parede
y tristura naquel cuartu;
magar nin fame nin sede,
nun s'algamaba a tar fartu.

Había un tiempu que finara,
munchos xuegos, pela cai,
 una madre que t'ampara,
había lu que nun hai.

Había munchos militares,
banda de guardia civil,
sientediscos nos billares,
 había corte y non, cubil.

Una radio que cuntaba
cuentos y publicidá,
a les tres, el parte daba
la mentira y la verdá.

Un afalagu melgueru,
una cocina carbón,
ratos dientro'l sumideru
ya un fardelín d'ilusión.

Dellos llibros y cuadernos
atropaos naquel cabás,
había fríu nos iviernos,
garabuyos, que nun gas.

Lluz a cientu venticinco,
 la puerta con calaviya,
tres de la sapada, un blincu,
piocampu o pilla pilla.

Un dineru que nun llega,
que foi precisu espurrir,
la pila na que se frega
y los formigos pa frir.

La casa que nun había,
si nun pagabes la renta,
namás queda poesía,
que les alcordances cuenta.

domingo, 1 de octubre de 2017

¿Y si nós tamién-y diéramos al “voltarem”?

Ufiertaben aínda más perres pa Cataluña si reculaben los de la dixebra. Abúltaseme que ye mui grave que n’España furrule lu de “el que nun llora nun mama”, pero entá peor ye que s’afite’l xantaxe. Na primer nacionalidá tenemos la llingua en refugable diglosia, la Variante de Pepe Goteres en clara tomadura de pelo, el desaniciu de les tases de l'autovía, que prometieron hai una montonera d’años, en repunante trola ya otra riestra temes n'agraviu comparativu como’l seyescéntimu sanitariu. Mentanto, nos espeten que-ys robamos y que na dómina la Reconquista equí nun había más que cabres mientres añalmente se retayen les pensiones de los xubilaos. Cuento que, si nós tamién finxáremos una data de votación d’autodetermín, bien seguru que tamién nos diben a tomar más en seriu.