Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

domingo, 31 de agosto de 2014

El caballu de Prioutu


    Al pocu de llegar, xubimos el camín de Samartín col envís de ver a los nuesos amigos, que yá conocéis: el perru, el burru bermeyu, la oveya que cuntaba que yera xalda y la vaca roxa. Sicasí, nel so prau pindiu, nun taba’l pollín, nin taba’l can, nin siquier la oveya o la vaca; quiciabes por culpa de que los alluguen en dalgún otru sitiu pel branu. Tornamos alloriaos pela peligrosa carretera ─yá se sabe que les carreteres tan pa que pasen los coches y non los paisanos, por eso una montonera d’elles se caltienen ensin cunetes y ensin rozar─; por embargu, sí viéramos al caballu de Prioutu, que tamién ye collaciu. Tuviéramos un bon pedazu afalagándolu y torgándo-y les mosques; asina que, de la que marchamos, nun paraba de reburdiar, magar que yá-y encamenté que p’avientu volveríamos si nun había novedá. Pa finar, namái aclariar a los que nun me conozáis que na semeya yo soi'l que sal a manzorga.

viernes, 29 de agosto de 2014

En Llouru


     Hai bien de xente que reburdia de la Rede. Hai muncha xente que refuga’l Feisbuc. Hai una montonera xente que cenciellamente nun almite lu que nun conoz. Como en too, collacios, hai que peñerar. De la que torné a Asturies esta vegada, tuvi con dalgunos amigos d’esa triba a los que nun conocía en persona y la esperiencia nun pudo ser más duecha. Equí toi con un d’ellos, Cesar, nel so perguapu pueblu. Magar que cuquéis nel cartelu’l nome de Loro, tamién podéis topar na carretera’l topónimu asturianu de Llouru, amás de xente prestosa a trompa talega. D’esta miente, yo que siempres caltengo’l mio maxín n’Asturies, tamién me caltengo averáu a los mios candiales amigos.

miércoles, 13 de agosto de 2014

ASTURIANU


Ximelgando, pequí m'ando,
malapenes, ente penes,
caleyando nesti pando,
amarráu peles condenes.

Enredando siempre enriedo,
arrequexo nos requexos,
arroxando, equí me quedo,
mui bien lloñe, llonxe, llexos.

Trespandando peles cumes,
pero namái d’enguedeyu,
arumando nos arumes,
magar que seya porgüeyu.

Si me quies, toi na to vera,
en maxín, en pensamientu,
enxamás d’escandalera,
adulces, sele, nel vientu.

Soi collaciu, soi amigu,
soi poeta muertu fame,
soi centén escontra’l trigu,
soi un gabitu al algame.

Dime dalgo si m’alcuentres,
dime daqué si me topes,
grítame: ¡chachu!, demientres,
tea agospiando de sopes.

Taré encantáu de falate,
de sorbiatar un culín,
col mio versu, afalagate,
y d’echar un cantarín.

Soi asturianu estrizáu,
voi semando asturianía,
col procuru dixebráu,
y collecho poesía.

lunes, 4 de agosto de 2014

La panadera


A la entrada d'Uviéu y a la salida,
hai una panadera mui presumida.

Na salida de Trubia, pende se xira,
hai una panadera, munchu me mira.

Llamen-y panadera de los tres nomes:
xugadora, borracha y amiga d'homes.

Dime, panaderina, ¿cómo va'l tratu?
La escanda ta mui cara y el pan baratu.

Que yo nun merco escanda, quiero mestura,
muerro, si me refugues, de la gafura.

Aquella panadera del pan menudu,
dicen madre que tien el culu picudu.

Esa panaderina roxa y tan nueva,
esa panaderina, l'alma me lleva.

Seique esa panadera ye bollu preñáu,
nun seyas fatu, fíu, marcha per de llau.