Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

jueves, 30 de noviembre de 2017

A mou de Martín Fierru…


Fino d’abrir la mio muria y m’alcuentro con una solicitú d’amistá na qu’ufierten centros de difuntu. Entamara la mañana fría y macabra, mesmamente como la nueche, yá que de la que me fui pal trubiecu acabara d’escuclar un capítulu d’Histories de la Cripta. 

<<Nun me vengan, –retruqué–,
con retafila difuntos:
qu’esos son otros asuntos;
vei si me sois a prindar,
que nun me voi a entregar,
magar vengáis toos xuntos>>.

Yá nun aguardaron más,
se m’echaron a montón;
como a perru cimarrón
m’arrodiaron ente tantos
que m’encamenté a los santos,
empuñando’l mio rozón.

Y ansí los fui despachando,
según diben averando.
Yera tal la rozadura
que–yos saqué l’asadura,
finando’l benditu mes,
a un tiempu de San Andrés.

Si a dalgunu más–y peta
colar a ver la so güela,
–y espero nesta tayuela
pa satisfacer so meta.
Nun penséis que busco guerra,
ye un cuentu de Pindesierra.

lunes, 27 de noviembre de 2017

¿Por qué nun tomen midíes?


    Paez qu’esti mes de payares, cola seca y l’airón, aneciaron en atizar l’arboláu. Lu que nun quemen esti añu lu van quemar pal qu’entra y nun van parar fasta que quede too amburáu; mientres, esos cientos de pirómanos se crecen ensin castigu somorguiaos nesos intereses creaos. ¡”Too” güel a podre y naide fai nada! 

    Tolos díes alluguen a cientos d’axentes peles crucies y carreteres españoles que multen a los automovilistes ya al tiempu prenden fueu a les bayuroses viesques asturianes y gallegues qu’amburen añu tres añu por falta de vixilancia.

—Mire vuesa mercé —retrucó Sanchu— qu'aquellos qu'ellí apaecen no son xigantes, sinón cientos de molinos eólicos ensin nenguna mala torre de vixilancia antiquemes. ¿Por qué será?


     D’esta miente, la conciencia nos rique: ¡Nenguna llárima más, van afogar a los nuesos heriedes, andái sollertes y dai parte!, sinón, dempués, la cebada al rau y a quexicar.

domingo, 26 de noviembre de 2017

Mirando pa los ánxeles


     De la que pasáramos per Málaga, montaben la decoración navidiega na cai del marqués de la xinebra. Les muyeres miraben nel cabu la cai pal altor de la cadarma metálica qu’imitaba la pedresa de la catedral y qu’esguilaba faza’l cielu. Paecía como si tuvieren escuclando pa los ánxeles. A la escontra, los homes agüeyaben pa la semeya de los otros ánxeles del comerciu que la Vitoria de los secretos diba a inaugurar esquina cola plaza de la Constitución. De resultes, toos chisbaben pa los ánxeles; elles dende l’entamu la cai y ellos al so mesmu entamu, y toos albidraben una Navidá que yá s’atopa mui bien cerca.

sábado, 25 de noviembre de 2017

La ratina presumida

La ratina presumía (cuentu colingáu por Rafael Castillejo). ¿Y vós cómo coime facéis pela nueche? “Porque tu nun me la das”, anecia la ratina mientres refugaba a tolos pretendientes, fasta que viniera’l Ratu que yera quien tenía una tarxeta Black. Ye que les femes siempres fueron mui interesaes. Toa esta montonera cuentos de los años 50 sintiéralos yo bien de vegaes pela radio. Por culpa d’ello agora soi tan cuentista. Amestar que la voz tan afalaguera del narrador yera la del asturianu Xosé María Oviés Morán, que tamién punxo voz a Groucho Marx en Una nueche na opera, a Spencer Tracy, James Mason y Walter Pidgeon.

jueves, 23 de noviembre de 2017

Zamba de la soledá, a los mios deleres.


Al cayer la oración,
col so mantu de gris na ciudá,
asolombra nel mio corazón
l’avesida murnia de la soledá.

L’alcordanza de paz,
de mios hores felices d'ayer,
va golpiando en maxín y renaz
como un ríu de suaños al alborecer.

Yo tamién árbol fui,
qu'al pasar pela vida frutié nel llugar.
Pero en tiempu y llonxanza rindí,
fendiendo’l mio tueru, quiérenlu arrincar.

Namái quiero al partir
nun llevar na mio alma un rancor.
Que lo amargo qu’aportó’l vivir
fue más duce y prestosu, xuníu al to amor.

Y si acaso, tal vez,
col recuerdu pudiera ablugar,
si una copla al so ritmu entemez,
xuntu a ese alcordanza la seya a cantar.

Yo tamién árbol fui,
qu'al pasar pela vida frutié nel llugar.
Pero en tiempu y llonxanza rindí,
fendiendo’l mio tueru, quiérenlu arrincar.

miércoles, 22 de noviembre de 2017

Siete trenes y milenta pasaxeros afeutaos pola avería d’un Alvia (EC, 20.11.17).


El cuentu de la Variante
y del AVE esi d’ADIF
sé qu’entamara en Madrid,
¿cuándo finará?, ¿quién sabe?

Total, si atranca un paletu,
ye por culpa una avería
que se resuelve nel día,
qu’acarrete col maletu.

Yo cubriera una vegada,
la fueya reclamación,
de la que diba a Xixón
y nun retrucaron nada.

Ye que somos de segunda,
por eso naide dimite,
xugái col móvil ya’l bite,
que la medrana nun cunda.

Cuando iguemos lo del restu,
yá furrulara lo vuesu,
ye qu’esa obra ye un güesu
y naide paña pal cestu.

La lladera ye inestable,
pingó un diluviu en furacu,
arriendes del fondo’l sacu,
tien el so aquel, como’l bable.

Nun quexéis más de la cuenta,
sabéi qu’aneciamos nello:
el puertu a pasu camellu
ya’l ramu en 2050.  

martes, 21 de noviembre de 2017

Ente conflictos


Teo l’alma ente conflictos,
pente conflictos la mio alma,
a veces pierdo la calma
ya otres gano veredictos.

Decatéme pol cartelu,
que colinga d’una espita
na mesma muria de Lita,
y m’afitó’l desconsuelu.

Cuento que ye d’Arxentina,
lu asoleyó l’otru día,
güei encoplo esta poesía,
ensin querer meter pina.

Ye qu’agora s’amarraron
la mio alma col mio ego,
siendo yo abondo zuniego,
vaya cuestión que m’armaron.

El problema ye abegosu,
voi precisar de l’astucia,
magar que nun tea agucia,
amestando bien de posu.

Ye qu’a cuenta la engarrada
valto per una polea
nes mios nueches de velea,
pos nun dexen meter baza.

Allorio pol mio maxín
y nun soi a discurrir;
si daquién sabe salir,
que m’apurra otru pasquín

instruyendo la ocurrencia,
qu’enfotaron alma y ego,
y bien de golpes me pego,
entá ingresáu d’urxencia.

lunes, 20 de noviembre de 2017

Sobro la velea de Marta G. Eguidazu


     Vi alborecer, sí, ya’l trescurrir de bien d’hores de la madrugada. Lo peor de la velea ye que tienes demasiáu tiempu d’avagar. Colo cenciellu que ye abandonase nos suaños, mesmamente cuando nun yes a recordalos al espertar o nun fueron especialmente prestosos.

    Remanecer colos güeyos abiertos na escuridá, cuando yá tan abondo cansaos pa lleer, te procura asomate a la fondura d'un mundiu silenciosu ya arrayante, escuchar al tiempu los llatíos del to corazón y fasta oyer el murmuriu de les tos penes, como si un rumor de foles batiera nuna sablera solitaria. Tu yes la propia sablera, quies sentir como esi mar llambe les tos firíes, pruyes por tresvolar, zarres los güeyos pa imaxinar que ye de día, qu'un sele sol afalaga la to cara y que nin siquier esiste'l rabión.

     Desfilen amodo intrescalable los minutos, tentes a reposar y sabes como lu faer: aliendes fondamente, aventes l'aire adulces, intentando desdexar el to maxín; pero la to mente va por llibre y nun quier aselar. Pensamientos positivos –te dices–, imaxes formoses, remembrar momentos felices... Nun hai mou, sonsonia na to cabeza afarto fuerte'l ximir de la to alma; si acaso afluyera en forma de llárimes, apangaría la congoxa y desamarraría esi nuedu que prime'l to corazón. Eso ye: concéntrate nos llatíos, déxate taramingar al son del so compás.

     ¡Ah!, escaecíaseme, el mio corazón valta descompasáu; sicasí, nun m'esmolez, nun lu atiendo, de día déxo-y dir a los sos deleres, namái dalguna vegada teo que posar ya esneldar fondo. Pero agora, nesta nueche escura, esi valtar espareyu enoxa bramente. Aguardes al viniente llatíu; cuando afustia, cuasi que nun yes a respirar.

    ¡Venga, que nun se diga, yá valió! Priendo la lluz, llevanto, voi fasta la cocina, bebo un vasu d'agua y torno pa la cama. Cueyo'l llibru que taba lleendo ya intento embaecer, somorguiar nel so argumentu.


     Güei, acarreto'l pesu del mundiu a recostines: pesa, ablaya, espreceta…

sábado, 18 de noviembre de 2017

Nueva téunica


     La téunica de la escritura llibre (del brexinglés freewriting) ye mui cenciella: consiste en escribir ensin parar mientres unos diez minutos…

     La del torbolín d'idees (del brexinglés brainstorming) ye asemeyada. Equí, en vez d'escribir frases allugues pallabres o idees…


     Sicasí, naide fala d’encoplar ensin parar coles frases o les idees que te peten. Ye una ocurrencia que m’acabo d’inventar cola fin maurecer idees y d’avezase a componer a un tiempu. Foi’l casu que fino d’algamar los 3.333 amigos, puesto qu’ayeri m’unviaron ocho solicitúes, y nun cuntaba con ello fasta la selmana qu’entra. De resultes, vamos a ver –al rodio d’ello– como resulta esa nueva téunica. Perdonái si nun vos presta, pero yá sabéis que refugo’l clixé y l’aburrición nos poemes. Arriendes, aprovecho pa davos les gracies a tolos de la riestra treses por caltenevos a la mio vera.

Esti ye’l cuentu del tres,
la suma de dos más un,
ye un númberu como ves,
tres servos son de betún.

Como tres nel to zapatu,
cuando andes a disgustu
ya entá va y te pisa un fatu
ya arriendes te mete un sustu.

De tres vienres, la selmana,
seique va ser enxamás,
si bocexes con galbana,
nun mui sero dormirás.

La selmana de tres xueves
va ser talamente al tal,
si tres campanos te bebes,
quiciabes te sientas mal.

Tres son tres, les tres Maríes,
estrelles del Sietestrellu,
qu’acarreten enganíes
d’afatase nel to cuellu.

De tres, tamién el muñuelu,
el muñuelu de sartén,
que siempres fría’l mio güelu
ya espoxigaba a mamplén.

Acaso, nun ser tres dioses
ye ser malo y pocu honráu,
asoceden estes coses
al que s’alcuentra arruináu.

¿Xugasti a les tres en raya
col vecín de la to vera?,
xugaba hasta la más paya
p’asitiar tres en ringlera.

Tres marinos a la mar
xueguen a l’esconderite,
equí fina esti cantar,
tres en tres, de fite en fite.


viernes, 17 de noviembre de 2017

Los cuentistes del poyu


     Como davezu, nun yera quien a abrir enforma los güeyos por culpa del sol que me pegaba a la escontra; magar qu’al bellume percibía ensembre bien la figura del paisanu que taba asentáu nel poyu a la mio vera. Yera un home altu con acentu foriatu, gastaba sombreru tamién d’altor, dábame un aire a naftalina y se m’abultaba abondo educáu. De la que nun pasara naide pela redolada, entamó a falame d’un coríu feu, d’una serenina, d’un soldadín de plomu, d’una princesa ya un arbeyu y d’una montonera cuentos de fades. Yo–y retruqué que caltenía cientos d’ellos de toa triba ya esclarié qu’otros milenta finaron na basoria, nel fogón de la económica o nes coraes d’un ordenador que los desaniciara pa siempres. Nel intre, encomendóme perafitar too en dellos llibros o en cualesquier otru llugar seguru. Darréu, entrugóme pol mio nomatu y, cuando yo–y pregunté pol suyu, tornaba la muyer y yá nun quixo dicir más nada. Ella, por embargu, aína m’aldericó: “¿qué faes falando solu?”.

martes, 14 de noviembre de 2017

Les llaves del cielu


     ¡Por fin fixera’l tratu la mio vida! Yá naide me va a endilgar que namái faigo negocios ruinosos. Foi’l casu que la muyer llevóme unos díes a onde la torre s’amiesta colos molinos y l’AVE, que nun son quien a trayer p’Asturies, nos tresportó a Málaga en dos hores y media. Tuviéramos enredando pela faza ya’l domingu pasáu nos allegamos a un mercadín, mui bien cerca d’un centru asturianu que s’asitia nel llugar, nel que quedé escuclando ablucáu pa un manoyu llaves vieyes qu’asoleyaben nuno de los puestos. Decatárase al instante l’amu y nel intre m’espetó: “Son les llaves del cielu”. Yo, que d’entamu nun yera a créelo, saqué aína dineru del bolsu col envís de paga-y lu que me pidía per elles enantes que dalgún espabiláu se m’adelantara. Agora, que fino de tornar, vos les amueso mui fachendosu: ¿qué vos paecen? Tai tranquilos los amigos y collacios que de la que morráis vos voi abrir de secute. A los mediu afamaos a los que-yos espublizó un par de cuentos l’Academia, que namái fociquen pela mio muria pa dacuando en vez sacar porgüeyu ensin dexar buelga, vos voi tener nel purgatoriu delles selmanes. De resultes, si nun queréis qu'eso asoceda, yá vos tais materializando y, cuando vos preste daqué de lu qu’escriba, calcái tamién nel “me gusta”. 

miércoles, 8 de noviembre de 2017

Bécquer a los mios deleres


Magar davezu la sorna
s’alcuentra ente les mios xeres,
nun preciso de la torna,
versiono a los mios deleres.


Cendal flotante de la gurriana,
rosada cinta de mariñana,
cimble sonoru
de gaita d'oru,
besu de brisa, rala de lluz:
flor de la uz.

Solombra aérea, que bien de veces
al falagate desapaeces
¡como la llama, como'l soníu,
como la ñebla, como un ximíu
xunto a Contrueces!

Na mar sablera onda tremante,
yes nel vacío cometa, mante,
llargu llamentu
del foscu vientu,
ansia perenne d'algo meyor,
¡yes tu’l mio amor!

Yo, qu'a tos güeyos, na mio agonía,
los güeyos vuelvo de nueche y día;
yo, qu'incansable cuerro yá inxente
¡tras la solombra, tras la fía ardiente
d'esta poesía!

martes, 7 de noviembre de 2017

Chapuza

https://www.elconfidencial.com/tecnologia/2017-05-29/variante-pajares-teneles-ave-chapuza-fuentes-secas-leon-asturias_1389772/

Mayor chapuza nun quepe
qu’esta obra de teatru
qu’entamó nel 2004
y nun fora escrita en Lepe.

La fonte de la Brimbera
Reguerales, Veiga y más,
nun ensugaben xamás
nesa acuta la biosfera.

L’agua foi a tunelones,
inundación y fiascu,
sin furrular, con atascu,
esbarrumbu y más millones.

Cada añu un nuevu ramu,
les promeses incumplíes,
desdexen les compañíes
y muertu murnia tol tramu.

Equí nunca pasa nada,
quien venga detrás qu’arree,
que del burru nun s’apee,
el que cayó na trampada.

Si dalgún quier la tarxeta:
Pepe Goteres ya Otiliu
“chapuces ensin auxiliu”,
con aniciu ya ensin meta.

Ye tema d’hidroloxía,
que van saber los paisanos,
qu’aneciaron n’avisanos
d’aquello que pasaría.

Ye que somos de segunda,
de segunda división,
Adardineru y Negrón,
paga tasa aguanta tunda.

Ansí que’l que nun se muera
verá circular esi AVE,
¿pa que llustru?, ¡nun se sabe!,
n'otra dómina o era.



domingo, 5 de noviembre de 2017

Formentor


       Llegara la carta de Formentor del 55. Paez qu’últimamente'l corréu vien con abondu retrasu. Llamé a esi cenciellu teléfanu 9 de Puertu Pollensa, pero naide descolgara. Ye verdá que yo daquella tenía namái dos añinos, magar qu’agora empondero sobre manera la to carta. L’hotel sería mui guapu, anque se m’abulta que’l mesmu papel pa correspondencia nada–y tien qu’envidiar. Esclarias que la poesía de la vida s’alcuentra en nós mesmos: munches gracies por me lu confirmar. Sicasí, ¿A ónde va dir de la que nós faltamos? Nun quiero asoleyar más detalles por culpa que lo privao tien que caltenese asina. Allegrándome de qu’esfrutaras de la tranquilidá d’esa isla que se perdiera per acio de l’ensamadura xentes, pruyo porque sigas esfrutando ellí onde tes.


     Recibe un candial abrazu a traviés del nuesu atayu temporal, la Rede, la maxa de la escritura y, como non, de los suaños. 

miércoles, 1 de noviembre de 2017

Sobro'l valir de les coses


     Malapenes dormí na Nueche les Ánimes ya anduvi abondo apuráu'l Día los Santos. De resultes, acabé matáu. Facía tiempu que nun díbamos pelos montes de Gredos, na raya de Madrid con Ávila. A la xubida, quedé mirando como siempres pal colexu seminariu de "Rozas". Mientres restolaba pela tarde, cavilgué en que tamos tan pendientes de lu que facemos que nun vemos la guapura que nos arrodia. De la que baxé a tirar unes fueyes al contenedor me crucié con trés mozos con cara de bona xente que baxaben del puertu. Aína, saludáronme mui cordialmente, amestando: “Tienen munchos gatos per equí”. “Sí, son del vecín”, retruqué entrugándo-yos por sí nun-ys paecía mui guapu'l llugar. Darréu, comentáronme que sí y qu'amás había un seminariu pela contorna. Estrañóme sobre manera lo que repostiaron, por embargu despidíme d'ellos tan candialmente como ellos me saludaran. De nueche, yá en casa, el fíu me llanta la película d'El Ritu, na que tamién apaecen una montonera gatos y falen de contino d'un seminariu. Ye'l casu que pasen bien de díes o selmanes ensin que sientas esa pallabra que, como los gatos, nun signifiquen nada p'abonda xente. Escribo esta reflexón sobro’l valir de delles coses ya’l so contestu, yá nel Día los Muertos, ensin saber bien el porqué.