Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

miércoles, 28 de junio de 2017

A mores



     A min nun m’asocede que “dacuando veo coses”, por culpa que ye davezu cuando veo coses y darréu m’aporten cuentos y poesíes.  Esta tan atristayada foi por cuenta de la guapa semeya  qu'asoleyara María Rosa Serdio…


Vas a mores, vas a mores,
vas a mores ya escayesti,
tamién espeten les flores
y tamién pinchara ésti.

Que la vida tien escayos,
amás d’ espinos gayeros
y que nun lleven los bayos
per caminos espineros.

Magar nos aporte’l mangre,
nos dexa col miel na boca,
de la qu’asoleya’l sangre,
de la que la murnia toca.

Aprovez entós l’arume,
porque sume nun instante,
que lo qu’espoxiga, sume,
igual qu’esi amor amante.

Folixa peles mañanes,
que dempués vendrán les tardes
pente tristures y canes,
cuando coles coraes ardes.

Que se maurecen les mores,
de la que’l bardial escosa.
Esfruta tiempu ya amores,
qu’ensuchen como la rosa.


martes, 27 de junio de 2017

Sofitu

PP, FORU, C’s y PNV voten en contra d'invertir na llingua asturiana.

http://www.asturiasmundial.com/noticia/93621/pp-foro-crs-pnv-votan-invertir-lengua-asturiana/#.WVIsd-hqiFo.twitter

     Dende la dómina de Fonsu X, a la nuesa llingua–y llovieron les hosties. Cola Dictadura tuvo nel cantu’l desaniciu. Güei, son una montonera de políticos demócrates los qu’agabiten la so perda. Nun hai qu’escaecer a los repunantes, que van de filólogos, que davezu reburdien al aviesu a traviés de la prensa nin a los inorantes qu’entá cavilguen que ye aldeana. Sí, el más tarrecible peligru s’alcuentra ente nós. Pola mio parte nada van algamar refugando cualesquier triba d’inversión pos hai unos 55 años que la sofito escribiendo de baldre ya agora, cola posibilidá d’espublizar na Rede, abúltaseme que nun me van callar fasta’l postrer aliendu, si nun rindo enantes. Por mor d’ello, pueden siguir gastándolu en fartures.

lunes, 26 de junio de 2017

CONTENTOS

     
     Y milenta arcos de la vieya remanecen per bien de requexos de Madrid ya ensin asomar nenguna ñube. Y la xente de toa triba se quier de bigotes y s’amuesa enforma arguto. Y los chigreros y los hosteleros, que llenen a arreventar, tan contentos a rabiar cola folixa que s’arma. Ya yo aínda m’alcuerdo de la qu’acarretaba’l certificáu del mio casoriu p’abellugar en cualesquier hotel. Ya acolumbro cartelos colingaos peles muries y me vien a la memoria’l d'Arosa ya’l caleyu’l Gatu y los sos espeyos cóncavos. Y los veceros del metru andamos tamién abondo encantaos porque punxeron mayor serviciu pal Arguyu ya agora nun vamos apeguñaos. Ya equí me caltengo escribiendo la novedá, mientres que yá pasaren diez minutos, a la espera de qu’asoleye nel semáforu’l paisanu que me representa pa poder cruciar la cai. 

miércoles, 21 de junio de 2017

El cantar de Willy

    

     El cantar de Willy yera’l que falaba de los siete mares. Lo de los siete mares yá vien del sieglu XXIII enantes de Cristu y se refier al conxuntu de los mares del mundiu conocíu daquella. Foi’l casu qu’un repunante día Willy s’aventurara nuno d’ellos a bordu del Meniscu Rotu, que yera’l pequeñu barcu del so pá, ya enxamás volviéramos a saber d’él. Ye por ello que, anque nun me disguste esi cantar, dame abonda tristura. D’esta miente, si dalgunu sabe de so paradoriu, o si acaso del mar pel que salea, quey diga que’l mio fíu ya yo siguimos a la so gueta pos nuny escaeciéramos. 

martes, 20 de junio de 2017

Centenariu


Arriendes, n’asturianu, pa que quede claru...

Foise de centenariu'l Ventisiete,
patrocina Mejías el viaxe,
por fin s’empondera n'homenaxe,
la culta poesía del Agrete.

Al so versu rimáu nun hai quien rete,
brínda-y el versu sueltu vasallaxe,
 escuende'l versu blancu del ultraxe,
 llibre: plega angariyes, upa y vete.

Góngora ye'l recursu y la letrilla,
Góngora ye'l llinguaxe lliterariu,
el gongorismu reciu y sorprendente.

Marcha Lorca a paraxes de Sevilla,
s’amiesta a celebrar el centenariu,
cola Xeneración, tamién la xente.

domingo, 18 de junio de 2017

Centenario


    ¡Una cisguada tres otra! Valta ún col propiu xeitu; sicasí, asoleyo la que toca en castellán. Encoplar en castellán ye más cenciellu: –y sobren tantes pallabres como a nós nos desaniciaron…

Se fue de centenario el Veintisiete,
patrocina Mejías el viaje,
por fin se reconoce en homenaje,
la culta poesía del Calvete.

A su verso rimado no hay quien rete,
le brinda el verso suelto vasallaje,
se esconde el verso blanco del ultraje,
libre: recoge tu camilla y vete.

Góngora es el recurso y la letrilla,
Góngora es el lenguaje literario,
el gongorismo recio y sorprendente.

Marcha Lorca camino de Sevilla,
se suma a celebrar el centenario,
con su generación, lo hará la gente.

miércoles, 14 de junio de 2017

L'aproximación

     
     Sí, daquella los neños teníamos munchos pás. Non, nun lu garréis mal, ye qu'a los curas–yos llamábemos padres y había una montonera. Pela nuesa cai pasaben bien d’ellos y los rapacinos diben a besar la so mano, sobre manera a uno mui vieyín que más que padre se m’abultaba güelu. Del que guardo más bones alcordances ye d’ún que taba mui estudiáu y daba clases nun centru d’artes ya oficios. Yera’l casu que siempres se paraba a la mio vera ya espetaba: “alcordáivos qu’esti chaval va ser bien afamáu”. Darréu, yo marchaba pa casa argutu y cavilgaba que sedría un gran carpinteru, yá que con seis años quería ser carpinteru de mozu. Güei, recuerdo la so predicción y sonrío por acio de que namái trabucara una sola lletra pos algamé a ser un poeta “afamiáu”. D’esa miente, me caltengo cola aproximación.


     Perdonái que pa ilustrar el cuentu vos asoleye una semeya que nada tien que ver conmigo, yá que naquella dómina nun teníamos cámara nin perres pa fotos. Por culpa d’ello, amueso una del fotógrafu qu’había na mesma cera, que ye d’unos guah.es d’entós, ya arriendes constitúi otra aproximación.

lunes, 12 de junio de 2017

Anda y zumba


Anda a cutir la llueca,
que suena a lluezo,
tiemblo como una teca,
 nun t’escaezo.

Xubi y tanxe’l campanu
del campanariu,
yo carezo nel vanu
vete a diariu.

Sopla y sufla la xipla,
que nun al tueru,
el mio xeitu cacipla
pol to saleru.

Zumba la pandereta
y la payella,
marcho siempre a la gueta
por culpa d’ella.

Toca les tarrañueles
o’l to tambor,
testes en taragüeles,
muerro d’amor.

La gaita, la zanfoña,
ya’l xirimbáu,
pastelín de boroña
vente al mio llau.

Garra y tira del filu
del riquirraque,
tiénesme abondo en vilu,
faigo almanaque.

Voi picar na ta puerta,
cuento llevate,
debes dexala abierta,
n’albentestate.

viernes, 9 de junio de 2017

La Llei de Murphy

     
     Estimando ensembre a toos el vuesu sofitu, quiero confesavos qu'enxamás pensé que diba finar intoxicáu por culpa de papar mal a gustu activos tóxicos. Sicasí, yá me gustaría a min vivir en dalgún activu tóxicu de los que voi sovencionar al Bancu de Santander. D’otra miente, nun me prestaría facelu nos otros munchos qu'ocuparon de baldre ya ensin  nenguna triba de rempuesta xurídica y qu’a lo cabero tamién vamos a pagar nós. Amestar, qu'esta mañana, de la que caleyaba pa esfrecer el maxín, cavilgué en si nun tará yá institucionalizáu’l furtu nesti país y yo nun soi más qu'una presa afayadiza. Foi'l casu que nun debía andar mui escamináu, cuando Murphy –qu'asina llamábase'l perru de manzorga– taragañóme un mordigañu na pantorría drecha al pasar pela so vera. Nun podía ser d'otru mou, los perros tienen un olfatu bien refináu y la famosa Llei de Murphy espeta que "si daqué pue salir mal, va salir mal". Dempués m'entrugaron que si diba a denunciar al can y retruqué que non, que nun diba a facer recayer el pesu de les mios miseries sobro un probe animal, talamente como faen nes places de toros col inocente herbívoru. Arriendes, si pa la qu'entra me reencarno, voi gastar en vicios tolos aforros como fai la mayoría la xente pa nun carecer más a sangrinos.

miércoles, 7 de junio de 2017

¡Intentáilu!


    Non, nun ye verdá lu que diz esti cartelu. La mala xestión y la peor supervisión emburrien a un rápidu desenllaz a escondidielles de los amos del bancu, los aicionistes. De sópitu, la comisión reutora del FROB anuncia un eufemismu: “resolución”. D’igual miente, el Bancu Central Européu asoleya otru más ruin: “inviabilidá”. De resultes, mengüen el capital social a “0” euros cola amortización, por imperativu llegal, de toles aiciones en circulación. Al tiempu, alcuerden una ampliación de capital de 684 millones d’euros n’aiciones de 1 euru. Darréu, van tresmitir toos esos títulos a Bancu de Santander. Mentanto, los aicionistes queden ensin un céntimu. Si daquién cree que podría puxar con 1 o con 20 euros por esa entidá, que lu intente.

    Polo qu’a min respeuta, trabayé una montonera d’años nesi bancu y gran parte de los mios aforros me los van pañar. Dalgunu podrá reburdiar lo que seya, pero muncha xente cavilga que’l dineru onde meyor ta ye na propia empresa. En resultancia, güei ye un mal día pa min y nun sé nin como saqué xeitu pa espublizar esti comentariu col envís de que nun me refuguéis por ser un poeta más probe entuvía.

lunes, 5 de junio de 2017

Na Residencia d'Estudiantes.


       Güei tuviera con Federicu na Residencia d’Estudiantes. Amosárame’l so cuartu ya’l pianu col que tocara enantes de l’amarraza y qu’agora lu caltienen nel silenciu de l’alcordanza. Dambos dos escurrimos que les guerres nun aporten arte nin solución a nada nin a naide. Xugáramos un bon pedazu a los encoples ya a les ocurrencies; magar qu’a pocu nos sotripamos por culpa les metáfores. Lleera embaecíu dalgunu de los mios poemes n’asturianu ya aína alcordóse de lo bien que lu pasara en Grau cuando s’allegó con La Barraca. Arriendes, mentárame a Severo Ochoa, que tamién tuvo de residente. Esclarióme que bien d’ensayos de la so compañía teatral desendolcábenlos nel propiu auditoriu de la residencia. La mañana trescurriera amodo, como cualesquier mañana de la vida y de la muerte. Darréu, tornamos a la realidá del pinar a mediudía. “Too yera cultura y folixa daquella”, mermuraba cuando nos despidiéramos ente llárimes…

RECUERDOS

La música siempres tuvo amestada dafechu a los recuerdos. Enantes, nes fiestes de prau, apurábase a baillar fasta la pava por culpa que tenía que trescurrir tou un añu fasta la siguiente verbena y se trabayaba enforma esclavu. Mui bien antes de qu’Albert Hammond interpretara “Échame a min la culpa”, ese afamáu cantar yá sonaba pel mundiu y tresformóse nuno de los más célebres del repertoriu de les orquestes daquella. Seique a dalgunu–y traerá más qu’alcordances o sinón que–y lu digan a Rafa Lorenzo de la que cantaba nos “Jekes”. Sicasí, que seyan pa suañar escurque y nun pa fender a naide’l banduyu.

viernes, 2 de junio de 2017

Un maletu poesía

(foto: exoterismo)

Camín, camín del futuru,
qu’enantes lu vía claru
qu’anguaño se tornó escuru,
con menos perres, más caru.

Trabayara media vida
nel meyor bancu del mundu,
atropando una partida
pa nun finar vagabundu.

Agora tien valir nulu,
de pocu sirvió aforrar,
nin val pa llimpiar el culu,
ese papel Popular.

Lu que nun gasté aforrara,
foi’l mio mou de vivir,
pa nun vivir pola la cara,
yo nun pido repartir.

Dicen qu’a lo fecho, pechu,
nin siquier la tinta debo,
colo qu’asoleyo a trechu,
nin pago l’agua que bebo.

Encamentóme un collaciu,
que meyor mercara obres,
magar lo pensé despacio:
mientres yo escribo, tu cobres.

Y me dediqué a la ruina,
anque cola tiesta alta,
llixeru como la fuina,
una fuina que nun valta.

Nada val esmolecer,
si ta ún predestináu;
si acaso vuelvo a nacer,
nun pondré cebada al rau.

Y cuando me llegue’l día
del mio caberu viaxe,
un maletu poesía
llevaré por equipaxe.