Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

jueves, 30 de enero de 2014

Pende la tierra tresvierte


L’iviernu llanta nes cumes,
nidios caxellos de nata,
ente esperteyos d’arumes,
fumu de cocina en cata,

a la cata del cumal,
a la gueta de la gloria,
qu’acuta la prunacal,
qu’esbaria de la memoria.

Allá enriba, nel altor,
onde nun fadia l’humanu,
au marcha’l resquemor
y ye cenciellu lu ufanu.

Auquiera que'l ferre esnala,
ayuri que’l sol aguanta,
en finxos de muria rala,
so borrina que llevanta.

En regatos cantarinos
que ruempen ente’l silenciu,
bien d’acordes seliquinos,
del son d’agua del vertenciu.

Benditu ye aquel que vive,
pende la tierra tresvierte,
si la muerte lu recibe,
de la claridá, sollerte.

miércoles, 29 de enero de 2014

Pola fema poesía


     En Rusia, un discutiniu sobre lliteratura na nueche del día 20 del presente mes de xineru acabó n'asesinatu. L'homicida, un exprofesor aficionáu a la poesía, finó cola vida d'un amigu que-y espetó que tola obra de verdaderu valir ta en prosa.
     Yo, anque tea más d’alcuerdu con esi antiguu maestru, nun cavilgo matar a naide; sicasí, nun m’andéis cafiando munchu qu’ando dalgo mal de los ñervios.

lunes, 27 de enero de 2014

Futuru


     Hai un futuru d’abonda xente preparada que remanez nel presente d’unos “antepasaos que calaben la boína y calzaben madreñes y s’espresaben n'asturianu”, qu’aporfia n’espresase nesa llingua tan nuesa, tan nuesa, que ye la nuesa.


domingo, 26 de enero de 2014

Voltures



     Hai bien d’años, la xente del campu empobinaba a los fíos a la ciudá pa qu’estudiasen y asina  pudieren refugar lu esclavu de la so xera. Güei, que poco camudó la tema, esos mozos finen una carrera y la metá les veces nun alcuentren trabayu. Hai delles empreses que s’abastecen namái que de la so parentela y collacios. Ye, cuasique, too una gran mentira. L’Alministración debía espublizar nes facultaes les salíes d’esa carrera o cenciellamente, si nun tien salida; pero talamente dexaría de cobrar les correspondientes tases. Quiciabes interesa garrar llicenciaos en práutiques, calteniéndo-yos trabayando en xornaes ensin llende, pa nun-yos pagar un perru o, si acaso, dalguna refugaya pa qu’aporfien en medrar los que siempres espolletaron. Sicasí, dalgunos de los más preparaos algamen esi tayu alloriante, dempués de media vida estudiando, y na so contorna camienten con pelusa la suerte que tuvo. Mentanto, los menos “afortunaos” comen de la pensión de los sos vieyos ca vegada más retayada. Pue ser que lu meyor seya tirar p’alantre ensin cavilgar munchu, nun seya qu’además nos dean les voltures, o pueque tornar pa esi campu d’au escurque enxamás debiéramos surtir la xente de la nuesa clas.

viernes, 24 de enero de 2014

¡Qué-yos lleven los malinos!


ASTURIES ESNALA

Venti mil ventiladores,
Venti mil ventiladores,
¿por ventilar que sacasti?,
vais esnalar al infiernu,
mira lu qu'adelantasti.

Mentanto qu’esnalaremos,
mentanto qu’esnalaremos,
seliquín y mui despacio,
con Asturies llantaremos,
mui penriba nel espaciu.

La xente de Brañaseca,
La xente de Brañaseca,
tien que lu moyar, el cuchu,
pos por culpa de la seca,
lu esparden enforma ensuchu.

Brañaseca quedóu seca,
Brañaseca quedóu seca,
y a La Bordinga-y xinga,
Rondie!!a como una teca,
y tol monte taraminga.

Por culpa de los molinos,
por culpa de los molinos,
molinos ventiladores,
que-yos lleven los malinos,
de Busfríu y los altores.

martes, 21 de enero de 2014

A S T U R I A S


Non, nun escaecí espublizar daqué en castellán…

Caninos de cordillera
guardan tu piel esmeralda,
lágrimas de primavera
  resbalan sobre tu espalda.

Atesorando lagunas,
fluyendo venas riadas,
 entre verdes sombras brunas,
a la mar de marejadas.

Agua, monte, mar y viento,
cavernas de tus entrañas,
donde sofoca el lamento,
ese umbral de las Españas.

Donde la piedra es historia
y la lluvia, sinfonía,
con la Cruz de la Victoria,
conmemorando aquel día.

Sarpullido de tejados,
de hórreos, paneras y casas,
entre grises y encarnados,
fauna y flora en biomasas.

Negra mina, nieve blanca,
azul que la nube atrapa,
niebla que en el valle estanca,
rebaño que se agazapa.

El recuerdo en el ambiente,
el ambiente en el recuerdo,
la hermosura es insolente,
y en su regazo me pierdo.

Mitos, tradición y lengua,
ese etéreo paroxismo,
 asola el humano y mengua,
con su feroz egoísmo.

Mantengámonos alerta,
 defiende esta maravilla,
no dejes que se convierta
en infecta alcantarilla.

Fiesta, labor y paisaje,
que la beldad  precipita,
es mi verso un homenaje
a nuestra Asturias bendita. 

sábado, 18 de enero de 2014

Ensin novedá


     El parque acuáticu de mayor llargor del mundiu ─25 kilómetros per furacu─ a cuenta de la montonera cabuerques qu’españaron peles muries. Mentanto, los cazurros ensin agua y los asturianos con hora y media más de trayeutu en tren. Sinón, a paga-ys en “Adardineru” y na autovía la “Duerna”.


     L’AVE a la Galiza de don Mariano, ensin novedá,

viernes, 17 de enero de 2014

San Antón


     Güei ye San Antón, el patrón de los animales. San Antón-yos quería muncho y sobre too, a los gorrafinos; asina que tomái nota y guardái bien de procuru con ellos. D’otra mena, felicidaes a tolos animales, sobre manera a los más gochos.


Si sal con barbes, San Antón, sinón la Purísima Conceición.

Per San Antón, en Xineiro, entra’l sol pelos regueiros.

La pera y el podón, per San Antón.

Per San Antón, la pita pon; la del ricu, la del probe, non.

Per San Antón, la pita pon, y pela Candelera, la nueva y la vieya.

Per San Antón, la yerba, a mediu montón; pero la cebera, non.

miércoles, 15 de enero de 2014

Grau



    Retrucando a los que m’entrugarais sobre la Reina del Cubia de la cabera entrada nel Feisbuc, namái camentavos que ye verdá, la maxestosa berza esiste ─siquier fai un par de selmanes─ y ta llantada nel mediu del ríu Cubia del llau norte de la ponte en Grau. Siento nun habe-y fechu una semeya, como siento nun haber algamáu a pañar dalguna de les sos fueyes p’acarretar a Madrid. Y ya que tamos falando de Grau aporfiemos na llabor, magar qu'agora n’occidental…


     La puerta que nun tranca Trubia nun la pies!!a Grau, dexando abiertu’l pasu a esi benditu occidente. Grau ía’l mercáu, los sos guapos palacios ya casonas, la capiella Los Dolores, las súas cais ya plazas, el sou escelente muséu etnográficu, el modernu auditoriu, la fértil veiga, el paséu’l Cubia, el sou gayasperu parque, la súa afayadiza contorna, los sous abondosos comercios, las súas prestosas xentes ya las repetías fiestas. Tamién los almuerzos del Exprés o de cualesquier restorán o cafetería na qu’amiestan la baraxa ya’l parchís. Los sabrosos pasteles de las súas afamadas pastelerías ya'l toucinín de cielu. Amás, esi queisu d’Afuega’l Pitu que vas poder mercar a Marta de Ca Sanchu d’Ambás, de la qu’abandones l’autovía ya caleyes per Grau los días de mercáu (miércoles o domingos). Garra esa autovía o’l FEVE ya esfruta de Grau, paga la pena. Na mesma cruz del Camín Real de la Mesa col Xacobéu del Interior, Grau te recibe encantáu.

martes, 14 de enero de 2014

La reina del Cubia


(Gracias Roque Soto Soto,
sin haber pagado nada,
ya he troquelado la foto,
─la foto está troquelada─.)



Surtiera verde; non, rubia,
na vera la ponte en Grau,
brotó nel centru del Cubia,
nel mediu de cada llau.

La so planta ye graciosa,
el so tueru bien derechu,
lluz la cadarma curiosa,
y tien abondosu’l yechu.

Nunca vi brotu tan guapu,
nunca viera tal cadornu,
salió ensin semar, de papu,
asemeya ser d’adornu.

Acuta ente regodones,
refuga plagues de cocos,
de morugues y pulgones,
ente los rabiones llocos.

Si esnalara cada fueya,
de la so verdura fina,
empabusaría della,
pol noxu, la caparina.

Escontra dalgún vertíu,
pueda ser qu’incontroláu,
restalla nel mediu’l ríu,
nel mediu de cada llau.

Nun ye moza, que ye berza,
esa bercina, ensin dubia,
pente agües, sobre llerza,
paez la reina del Cubia.

domingo, 12 de enero de 2014

Nueva llei


Un coleutivu de cazadores propunxo al Ministeriu d'Agricultura, Alimentación y Mediu Ambiente que na nueva Llei de Montes, anguaño en procesu de redacción, incluya’l primir  de caminar pelos montes a la xente qu’esguile y demás veceros, nes zones y díes en que s'entamen batíes o monteríes. Dicen qu'asina s'evitaríen accidentes, lléase disparos a “inocentes”. La futura llei podría incluyir sanciones d'hasta 1.000 euros por caminar per estes fasteres na celebración de monteríes. D’esa mena, nun se torgaría l’actividá peligrosa, sinón que se multaría a los ciclistes y caminantes. El muérganu “Senderismu per España” ta recoyendo firmes al traviés de la web  Change.org, nuna ciberaición escontra na que n'apenes una selmana recoyó casi 50.000 robles indignaes  


Comentariu númberu 1:


Paezme munchu bien la nueva llei y qu'al par desalluguen tamién nos parques de les ciudaes cola fin de poder entrenar, que’l campu ye de toos (Torrente).

sábado, 11 de enero de 2014

Trabucando


     Una empresa española afita al aviesu los brazos de la primer ponte llevantadiega de Chile...

     Agora’l trabucalu too ta a la orde del día. En Asturies se furó una variante pal Ave que nun pue furrular como variante por culpa de que ye “esbariante”.

viernes, 10 de enero de 2014

En persona


     Güei, equí en Madrid, a pocu me pilla nun pasu cebra ensin resalte de protección escontra cafres, un rapaz que garraba’l móvil con una mano, comía una bolla cola otra y seique conduciría con una pata. El casu tráxome alcordances de Grau, onde tampoco suelen parar nestos pasos y yá llevaron una guah.a na Mata; una paisana conocía, na ponte de salida a Peñaflor; otra moza, na baxada del ambulatoriu; xente que taba a la vera l’antiguo Narcea, asina como dellos paisanos pela carretera Pravia, que como otres munches nun tien nin arcén pa que los que nun van en coche puedan movese. Nel conceyu vecín de Les Regueres, el Camín de Santiago tamién escurre pela calzada, colo que ye otra ufierta turística más de la nuesa Ruta Xacobea, yá que dalgunos pelegrinos van poder conocer al santu en persona.

jueves, 9 de enero de 2014

Nin xuego nin m'amarro.




     Perdonái que nun retruque a les solicitúes de xuegos nel Feisbuc. Nun ye que seya ranciu dafechu, ye que nin acarreto un móvil nin me presten los xuegos eleutrónicos. De la mesma mena, que nun calque nel “me gusta” de páxines polítiques, de derecha o de manzorga, nesti casu ye por respetu a los mios amigos y collacios que seyan quien a nun pensar como yo.

sábado, 4 de enero de 2014

Tenéi un bon añu


     Fino de tornar de Grau, onde pasé’l fin d’añu. Tuvi un tiempu alloriáu por culpa de que morriera’l mio ordenador y nun sabía si me llevara tolos archivos pala so sepultura. La llaceria diba a ser bien gorda pos desta vegada diben desaniciase unos dos mil, namái qu’entre poesíes y rellatos curtios; magar que nesta ocasión hubo más suerte que na del branu y un ciruxanu informáticu estraxo’l discu duru del fináu, que cuento que vien a ser como un cerebru crioxenizáu. D’esa miente, el mio fíu, que tamién ta mui preparáu, afayóme un portátil al que nun-y mando nada al que trespasó un bon plizcu de la memoria del otru. Mentanto nun seya quien a recuperar el restu, vos echo voz d’esto pa que sepáis que yo nun morriera con esi aparatu y qu’aporfiaré en colingavos caxigalines.


     Tenéi un bon añu y que vos traigan munches coses los reis.