Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

lunes, 14 de agosto de 2017

L'allegría de la feria

(Tresmonte, 78)

Yes la solombra del branu,
yes l’ablugu del iviernu,
yes el sobráu, yes el vanu,
siempres l’afalagu en ciernu.

Yes atecháu na seronda,
arume de primavera,
yes l’amoríu de ronda,
yes la flor de la fastera.

Güeyu d’agua pa la sede,
yes llacuada pa la fame,
de la escoyeta, yes rede,
yes la llocura al algame.

Yes del monte, la nublina,
arrullu del ríu’l valle,
yes la fonte cantarina,
yes la señal pa que calle.

Yes estrellina del cielu,
de la sablera, la fola,
rosada de carambelu,
el perder de la cachola.

Yes de la mar, el marmullu,
yes el tastu de la zreza,
yes de la viesca, l’arrullu,
el mesmu airín cuando meza.

Del riscar yes el restallu,
de la qu’escurez, la lluna,
yes el rescamplar de mayu,
la ensuga la mala zuna.

Yes la perda del procuru,
yes l’entibar de la seria,
el verdín qu’esbaria en muru,
l’allegría de la feria.

viernes, 11 de agosto de 2017

Van reconoceme...


Vien de la entrada anterior…


     Esta mañana foi más granible que la d’ayeri, pos camín del centru médicu p’anovar el carné m’alcontré unes gafes Converse modelu Chuck Norris que nun son pa nada sospechoses, al ser más de la triba de los aliaos. Yá dientro la clínica, una moza me dixo que me reconocía y la otra, que non. Esta cabera m’espetó que si pasaba unes prebes cola primera y nun taba pasáu me diben a apurrir una autorización temporal pa conducir. Sicasí, amestaron que nun podíen aportar nengún llibramientu p’amosar en Tráficu por culpa de lu de siempres: “la inorancia d’una llei nun torga del so cumplimientu al inorante”. Asina que, de la que despache equí, voi treslladame a la facultá de Derechu de la Rei Xuan Carlos p'apuntame pal cursu qu’entra.

jueves, 10 de agosto de 2017

PRINDARON A PINDESIERRA


     Esta mesma mañana paróme un beneméritu y mangóme 200 beneméritos euros pol mio maleméritu despiste de nun decatame que m’anovaren el carné per 5 años en llugar de per 10, como correspondía, y de resultes tar caducáu. Arriendes, llevaba unes gafes prietes ya oblicues que me mercara la muyer ya abúltaseme que con elles teo cara de sospechosu, yá que l’axente –que nun quitara les sos lentes arredondiaes– nun detuvo a los que pasaren delantre. Como consecuencia, pagué la multa por culpa de que toi avezáu a pagar y porque nesti país cada vegada hai más tases coles que cebar a más golfones. Sicasí, yá nun voi llantar más les gafes prietes oblicues que me faen paecer sospechosu en sentíu creciente y, de la qu’escucle lluminaries azules nesa retonda, voi escapar pela tanxente d’enantes. Asina que me perdonen los golfos de toa triba por nun querer andechar más en mantener los sos vicios.

domingo, 6 de agosto de 2017

Y si m’alcuentro con un cabezaleru del Principáu, ¿qué faigo?


     La MANCOMUNIDÁ D’OSOS PARDOS de la CORDELERA tamién asoleyara 25.000 trípticos y milenta cartelos esplicativos sobro que faer nel casu d’atopate pel camín a un cabezaleru del Principáu o a un conceyal o al mesmu alcalde d’una casa conceyu de les faces oseres. El decálogu, tien tamién namái qu’ocho encamientos, talamente como’l qu’asoleyara al aviesu LNE:

1ª Magar que t’anden cafiando davezu, nun dai-yos voces nin facéi-yos esparabanes.

2ª Facéi-yos entender qu’hai que rozar les carreteres y los caminos pa que puedan pasar los paisanos ya’l so ganáu pa qu’asina nun priendan fueu.

3ª Facéis-yos garrar qu’hai que camudar les lleis pa que nel terrén amburáu de la la viesca namái se pueda repoblar con viesca.

4ª Facéis-yos comprender que deben desaniciar les autorizaciones a les mines d’oru pa que nun seyan a furar tol occidente d’Asturies a la gueta d’esi metal y pa que nun entafarren el Paraísu con balses de metales pesaos.

5ª Encamentái-yos qu’hai yá una montonera xente que vive del turismu y que munchos turistes vienen gracies a nós, aparte de qu’Asturies nun ye un prau de so.

6ª Que vos espliquen porque multen por cortar una flor y non por quemar un monte. Arriendes, esclaria-yos que pa prindar al qu’atiza hai que poner vixilantes que detengan.

7ª Que castiguen de manera exemplar al pirómanu qu’atenta escontra la vida de toos, implicando más a les fuerces d’orde.

8ª Los canadienses tan como llocos por fincar el diente a SALAVE. Si los paisanos yá dixeron “NO” a la llaceria de la mina, que vos digan que ye lu que nun entienden. 

miércoles, 2 de agosto de 2017

Nunca fui peritu en llunes


Nunca fui peritu en llunes,
nun me llicenciara en soles,
nun me graduara en dunes,
nin fui tituláu en foles.

Escribo lu que me peta,
voi refugando’l diploma;
los deleres, d’escoyeta,
nun m’adoma quien adoma.

Valoro, taso o perito
aquello que se m'ocurre,
por eso’l citar evito,
por eso aneciar m’aburre.

Xamás sigo direutrices,
nengún me calla la boca,
soi feliz ente infelices,
lu qu’a min procuru toca.

Nun m’abluca l'afamáu,
nin, padrín; nin, presidente,
nun arramplo lu ganáu,
nin gano nada a la xente.

Cuando viro per avante,
nun ye por culpa del vientu,
ye qu’atopo a un repunante
o, si acaso, a un esperpentu.

Nun xuego a xuegu floral,
pos xuego a manga escolada,
qu’a naide-y paeza mal:
los ases, d’estrapallada.

Soi poeta muertu fame,
nun saco nin pa la cama,
teo la musa al algame,
faime fumu, afarta fama.

martes, 1 de agosto de 2017

Despacino

     

     “Despacito” de Luis Fonsi tien nel intre, ¡zumba la calaviya!, 2.931.909.286 visites y siguen esguilando; mientres que “Despacino” del nuesu amigu Nandu Corujo, que colingara “Río Guillón” nel “YouTube”, namái que 382 y tres calcaos nel deu del “me presta”. ¡Coime, esto nun pue ser!...