Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

miércoles, 31 de agosto de 2011

QUEISOS D'AMBÁS


Nel mercáu de Grau, inda nun fai tantu tiempu, las paisanas vendían el queisu d’Afuega’l Pitu. Güei caltiénse la venta de productos de güerta y casería per aciu de particulares, sicasí esi sabrosu queisu cuasique namái lu amuesa Ca Sancho, la quesería artesana d’Ambás. Cualquiera, ensin saber que’l guapu pueblín d’Ambás esiste, cavilgaría que’l comerciu ye del afamiáu músicu, etnógrafu ya presentador de Camín de Cantares, ya la verdá que nun trabucaría yá que Xosé Antón garró’l nomatu de la so parroquia, onde ta la quesería que ye de la so parentela. De la que xubía a la Tambaisna y Fosdelayegua, nel Marabiu, paré n’Ambás ya falé con dalgunos vecinos. Al outru día, per casualidá, alcontré al pá de Xosé en Grau ya tamién tuvi falando con él. Presta a mamplén conocer a xente tan candial como esti paisanu. Amás, aprovecho pa porfiar nas gracias pol par de queisos que me regalara ya esclarar que puen mercase los domingos nel mercáu de Grau, nel puestu de doña Filomena o nel mesmu perguapu !!ugarín d’Ambás au merez la pena allegase. ¡Bon provechu!

martes, 23 de agosto de 2011

Gardel


Confieso que nun escucho la radio, de la mesma mena que presumo de nun ver la televisión. Lo cierto ye que, cuando nacía ensin clarixes aquel primer miércoles d'agostu, coneuté'l mio vieyu transistor Cadox rescatáu del escaezu y lo primero que sentí, con evidente perplexidá, foi la voz del mio propiu primu al traviés de les ondes. Tengo alvertir qu'esti familiar nun ye llocutor nin profesional de la radiodifusión. Aconceyaba nun documental monográficu sobre Carlos Gardel en calidá de recopilador. Los sos comentarios amestáronse colos d'otros menos espertos en la tema y, como non, colos cantares del Maestru. De xacíu, nun faltó “Por una cabeza”, la preferida'l mio fíu. La maxa de la nueche y los mios recién y amenorgaos estudios de solféu procuráronme alteriar la perspeutiva sol tangu. Gardel, nun canta con voz aterciopelada, ye'l terciopelu y la mesma seda nel timbre. El xiru los vieyos discos, seique al igual que cualesquier otra perantigua danza circular ya iniciática, consentía la so audición cuayando una particular ablucada. Los grillos, por cenciella cortesía, dexaron de resgar el silenciu y la sotileza la nueche —orbayara la cabera xornada— amosaba un fondu encantamientu. Gardel nun ye un artista de cine, como quedó claru nesi documental; naide-y rica pos una xenial interpretación nes sos películes. Gardel ye la camudancia maraviyosa ya increíble de la so espresión oral nun xeitu propiu y mundial. Gardel ye la voz eterna y el magu del tangu.

Pa finar, déxenme faer dos aclaraciones que se m'abulten innecesaries, túvi-yos falando en presente porque l'inmortal francu-arxentín vive, namái fuelga'l so cuerpu y, de segundes, constatar que'l mio pariente, Menel Llanos, nun ye recopilador de Gardel sinón “el” recopilador de Gardel.