Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

jueves, 29 de enero de 2015

¿UTHLEPÍA?



     Sieglu tres sieglu, llaceria tres llaceria, la ilesia San Antón de Bilbao foi perdiendo'l so patrimoniu. La ponte del mesmo nome, que t’afitada a la so vera, camudara delles vegaes fasta qu’en 1937 foi volada y sustituyida pola actual. Dambos son mui emblemáticos y asoleyen garbosos nos escudos d’esta ciudá y del Athletic Club. Por embargu, esti club fundáu en 1.898 se caltién dende siempres fiel a unos vezos que como desplica l'afamáu periódicu deportivu francés L'Equipe: " –y faen un casu únicu na hestoria del fútbol mundial". Por culpa d’ello, l'Athletic nun ye namái un club que compite en clara desventaxa nel mundiu del futbol, ye una manera dixebrada d’apreciar el deporte, ye una filosofía de vida, arriendes d’un sentimientu imposible de definir, pero bramente prestosu de vivir.


     Caleyando per Bilbao, aliéndase’l fútbol, la so hestoria y esi sentimientu tan abegosu de concretar que cautivara tamién a bien d’aficionaos d’otros llugares.

martes, 27 de enero de 2015

lunes, 26 de enero de 2015

¡LOS CABOS XUNEN!


Syriza algama un alcuerdu cola derecha nacionalista p’afayar Gobiernu (Na prensa de güei).

De sópitu, nos alcontramos con esta noticia dempués de la representación eleutoral de Grecia.


No qu'a min toca, nun me pilla de sorpresa nenguna comedia. Yo, por respetu al mou de pensar de los mios collacios, seyan de manzorga o de derecha, enxamás llanto un comentariu políticu. Sicasí, imaxinái qu’en pasando les nueses eleiciones la casta pauta cola Susana y nos monten la Verbena’l Palombu, pagando la folixa los pardiellos de siempres. 

domingo, 25 de enero de 2015

El baille


      Allá una vezona que pintaba daqué, pero agora yá nun pinto nada. Hai bien de tiempu de la que baillaba dalgo, magar qu'agora yá tampoco baillo nin siquier a lo bolero. Anguaño, bien de xente depriende a danzar nos cursos de bailles de sala na casa conceyu o nesos centros que llantaron cada cuatro cases; sicasí, enantes nun los había y naide t’enseñaba. Alcuérdome una vegada que saqué a baillar a una moza mui curiosa nuna fiesta prau y, namái alvertir como espernexaba, de secute m’entrugó que si sabía baillar. Darréu-y retruqué que non. Aina, la guah.a, que yera mui atrevida —les moces curioses siempres fueron mui atrevíes—, aldericó qu’entós pa que baillaba y, como a min enxamás me prestó contar troles, -y espeté que por arimame a ella. D’otra miente, yá hai unos años que la mio mesma muyer y la mio cuñada s’apuntaron a un cursu d’esos tan granibles. Caltuviéronse n’activu unes selmanes, anque dempués colaron por culpa de  que’l maestru aneciaba a farto col chachachá. Eso me valió bramente p’anda-ys fadiando de contino col cuentu de que marcharen por mor de que nun toparon de pareya a nengún mozu que pagara la pena.

sábado, 17 de enero de 2015

Rindo


     Son les 11 de la nueche de cualesquier nueche; magar qu’aportara na de güei. Fino de tornar pa casa de caleyar col envís de baxar la cena y foi’l casu qu’al torcer una esquina d'otra cualesquier cera m'atopo col cuerpu d'un home tiráu nel pisu y dellos cuerpos argutos qu'arrodien pela calzada pa nun pasar a la vera'l valtáu. -Y entrugo por lu que-y pasa y por si necesita que-y eche un gabitu. Me retruca que non y malapenes algama a ponese de rodíes. –Y ufierto llamar a una ambulancia y anecia cola negativa. Marcho, de la que cola a tatás, y los otros cuquen dende lloñe encarpazaos perbaxo la ringlera de lluces aforcaes. Reseño ablucáu lu que m'asocediera qu’aporfia en ser repunantemente habitual, mentanto —de nuevu— alcuérdome de lu qu’espetaba Kafka al respeutu:

“Cuando unu sale a caminar de nueche per una cai, y un home, visible dende bien lloñe —porque la cai ye pindia y hai lluna llena—, cuerre escontra nós, nun lu detenemos, nin siquier si ye ruin y andrayáu, nin siquier si daquién cuerre detrás d'él glayando, dexámos-y pasar. Porque ye de nueche, y nun ye culpa nuesa que la cai sía empinada y tea la lluna llena; amás, seique esos dos entamaron una cacería pa enredar, seique fuxen d'un terceru, seique'l primeru ye escorríu a pesar de la so inorancia, seique'l segundu quier matalu, y nun vamos ser cómplices del crime, seique nengunu de los dos sabe nada del otru, y diríxense corriendo cada unu pola so cuenta escontra la cama, seique son nocherniegos, seique'l primeru lleva armes...”

     Y, al tiempu que vomito les voltures sobre’l tecláu, cavilgo que siempres foi asina, que naide quier saber nada, que nun ye culpa nuesa. ¡Gandaya de pantasmes andariegues!, ¡refugaya de cadarmes ensin espíritu! Arriendes, empiezu a tar mui cansáu, mui cansáu d'esta especie humana y amodo, mui adulces, voi rindiendo.

viernes, 16 de enero de 2015

L'ENEMIGU EN CASA



     Güei,  l’enemigu en casa reburdió a los sos deleres nos comentarios de LNE. Mentaben a l’Academia y a los que cobren a cuenta l’asturianu; sicasí, naide aldericó nada. Yo diba colingar esta poesía retrucando-ys nel nome de la nuesa llingua, magar que m’alcordé de que sal espublizáu malcurioso y con un cuadrín nel llugar del apóstrofu —nun sé si arrémente— y refugué la xera.  Toi yá mui cansáu d’esta refugaya; por embargo, esta ye la mio rempuesta a la so repunancia:

Reburdia, reburdiador,
anecies cola actitú,
llimpia, fixa y da esplendor,
y a lo tuyu, probitú.

A tol mundiu presta Asturies,
la so historia y so cultura,
y  tu esbarrumbando muries,
y falando con debura.

Tu yes el peor enemigu,
tu yes el ranciu y cafiante,
el que refuga’l so nigu,
un duviesu repunante.

Presumes del castellán
y fales en chapurriáu,
nunca respetó’l manguán,
lu qu’espoxiga al so llau.

Si la nuesa llingua muerre,
va ser pola mala zuna,
qu’equí esnala’l que nun cuerre,
y ambura la vuesa bruna.

Apátrida qu’arreniegues,
asturianu de cachopu,
abre los güeyos, nun ciegues,
que valtes de puro popu.

Farfulles que nun esisti,
ves menos que’l Pataricu,
neso que nun deprendisti,
nun metas el to focicu.

jueves, 15 de enero de 2015

¡Norabona!



     Norabona a tolos que tengan un rebañu neños. Na Comunidá de Madrid, van poder viaxar de baldre nel tresporte públicu lu que-ys pete tolos guah.es que tengan menos de 7 años. Los que tengan más, que se colen, tamién. D’otra miente, tolos vieyos y frayaos pueden recargar les sos tarxetes ensin contautu cualesquier día nes máquines habilidaes pa ello.

martes, 13 de enero de 2015

Faltosos

(Faltosos-logo)

     Tengo dellos collacios de los qu’andechen na mio xera  qu’escriben abondo bien y a los que davezu-yos reburdia dalgún pabardu encumáu. Nun esmolezáis y decatavos que:

     La inorancia la sufren los probes inorantes; pero namái l’amuesen los faltosos.

domingo, 11 de enero de 2015

Amos


Nel fútbol, naide reburdia escontra los xefes, que faen lu que-ys peta; amás, se-yos paga una burricada. Malu un ricu aprobetáu, peor un probe arriquecíu.

viernes, 9 de enero de 2015

¡Fala!

Nun sé que coime tien que ver la llingua asturiana con un vasu papel y non, con un cachu; sicasí, andecha y...

¡Fala!

Falen, falo, fala Falu,
pero aquellos que nun falen,
reburdien y dan col palu,
reburdien porque nun saben.

Nun son cuentos, nun son cancios,
la llengua d’esti País,
ta llaceriada por rancios,
por rancios de mal envís.

Reburdia reburdiaor,
¿por reburdiar que ficisti?,
dir escontra del llabor,
de lu que nun deprendisti.

Voltures tendrá’l to güelu,
voltures nel campusantu,
voltures quiciás nel cielu,
por neciu, cago en mio mantu.

Nun te val el tar calláu,
vas refugando lo tuyu,
además de renegáu,
yes repunante y capullu.

Que nun ye prioridá,
qu'a los sos deleres cuerra,
fechu una calamidá:
¿vas esperar a que muerra?

Otros que reciben más,
s'alcuentren toos xuníos,
mentanto al aviesu  vas,
asina tamos perdíos.

Nun seyas fatu y andecha,
que la xera ye bien dura,
nun ye manzorga o derecha,
mirar pola to cultura.


jueves, 8 de enero de 2015

LA VENTA L'AIRE



Aire que me lleva l'aire.

Aire que l'aire me lleva.

Aire de la boca un flaire.

Aire pa ganar la ceba.



Aire qu'anecia bien d’años,

colos trenes paralíticos.

Aire de los desengaños,

qu’endilguen tantos políticos.


     Asturies va quedar a cuatro hores de tren de Madrid antes del branu. La llegada del AVE a Llión, en pruebes pa marzu, emburria les comunicaciones rexonales, entá ensin la “Cafiante” de Payares.

(LNE, güei 8 xineru de 2015 —lu de la Cafiante ye de la mio collecha—)

martes, 6 de enero de 2015

MÁS D’UN CENTENAR DE NEÑOS DETENÍOS EN MADRID.


     Un ampliu dispositivu policial detuvo güei, día de Reis, a más d’un centenar de neños por ocupar cais y parques de la Capital, xugando colos sos trebeyos, en aplicación de la recién aprobada “Llei Mordaza”. D’otra miente, foron entrugaos dellos miles más, asina como los sos correspondientes padres. Mesmamente, prindóse un amplio alixu d'armes curties simulaes. La suma de la montonera multes llantaes a los sos proxenitores paez ser qu’algama los trescientos millones d’euros, que van sirvir pa soliviar un rispiu la delda soberana.

lunes, 5 de enero de 2015

Feliz día de Reis.


     Cualesquier día, vais topavos con dalgún neñu del colexu o del equipu fútbol d’esa semeya qu’acoricáis n’estoriu ensin lu reconocer por culpa de que pasara bien de tiempu d’aquella y porque yá va ser mayor y camudara d’aspeutu; sicasí, nun lu vais creyer,  pero aquellos neños colos qu’enredarais entós, enxamás van morrer nin dexar de tar ehí porque se caltienen afitaos pa siempres, tal y como yeren, nel vuesu maxín.


     Feliz y máxico día de Reis,  de trebeyos y d’alcordances, amigos.

domingo, 4 de enero de 2015

Nos Aguilandeiros


Dedicada al mio bon amigu Xosé Antón pol so procuru en recuperar tradiciones.


Pariera la vieya,
na paya’l corral,
seique, una corneya,
vieno’l nenu mal.

Pariera darréu,
dempués de cantar,
cruciando Acebéu,
antes de xantar.

Xera casariega,
cuasique en xineiru,
tuviera una pega,
d’un aguilandeiru.

La vieya Maruxa
bien taba preñada
y al maruxín duxa,
nun sabía nada.

Esti casu noriu,
voi date una pista,
pasóu nel Casoriu,
xunto a l’autopista.

Tras setenta años,
parióu outra vegada,
tornan los raigaños
a Villapañada.

Finóu en bon estáu
ya va a parir más,
en conceyu Grau,
la vieya d’Ambás.