Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

martes, 28 de agosto de 2012

La Gaita


De la sala nel requexu escuru,
del so amu quicias escaecida,
silenciosa y cubierta povisa,
cucabes la gaita.

¡Cuánta nota dormía en roncón,
como'l páxaru duerme na caña,
esperando la mano de ñeve,
que sabe ensalmala!

¡Ai, -pensé-, cuántes veces el xeniu
apingaya no fonderu l'alma
y una voz, en San Lázaru, aguarda
que-y diga: "Llevántate y anda"!

lunes, 20 de agosto de 2012

P'AMBÁS ya TUENDA


Ye la voz del informante,
ye la voz de los cantares,
como él, nun hai quien cante,
célebre en tolos llugares.

Afamáu pol so nomatu,
per cualquier pueblu que vas,
lu conoz hasta’l más fatu,
de xuru, falo d’Ambás.

Lu mesmo toca’l panderu
que presenta un festival,
si cuadra, fai de gaiteru,
esti rapaz ye mundial.

Defensor del asturianu,
la llingua d’un gran país,
la que fala mui ufanu,
la que sintiera’l malvís.

Iguó un archivu sonoru
de vezos y de cultura,
que tien más valir que l'oru,
la tradición ye bayura.

Mas, va pruyime la güenda
y quiciás m’arderá l’untu,
si nun vos falo de Tuenda,
los mozos del so conxuntu.

Con Pepín de Muñalén
y con Elías García,
vais pasalu enforma bien,
son la sele melodía.

Asina, al cabu y al fin,
dedico esti cuentu a Ambás,
pa qu'aporfie nel Camín,
deprendiendo los demás.


                                                                      Pindesierra

martes, 14 de agosto de 2012

Xixón



     Xixón, siempres Xixón, espluma de mar y sidra arrodiando Cimavilla, volcán qu'arrama la so llapada d'allegría sobre les cais. Escribayo a la vera la sabla’l Poniente trés un esguetu recibu del Palaciu Merás qu'atopé nel mio bolsu. Allúgome nun afayadizu bancu au espero a la mio parentela que ta sintiendo a Chenoa. Pasien vieyos, mozos y nuevos; paisanos y foriatos. Delles moces baillen al son de la bulla que remanez y esbarien la so guapura. Un rapazu anecia al altu la lleva que ta llantao xunto a la escalera 7. Una pareya asitia a manzorga y cúcame de regüeyu. El vientu afalaga adulces y l’afamada aporfia en berrar aquende. Pela mar, restallen lluces blanques y verdines; a la escontra, la maxa de Xixón abluca. Tornen más seliquino, los que llegaron al cabu’l paséu. Les faroles duchen lluminaries que faen espeyar les sorrises. Nada manca cola gayola, los males arrequexaron nel intre. Bien seguro qu’enxamás hai que rindir cola fiesta.