Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

lunes, 30 de enero de 2017

Filosofando


Quedé pa filosofar
y Platón me dio plantón,
Sócrates me vio pasar
en xubiendo al Partenón.
 
Diba a ver a Sofroniscu,
Sofroniscu yera’l pá,
que taba amarráu col fiscu,
que-y reclamó la verdá.
 
Demócritu ellí n’Atenes,
nel mesmu templu Atenea,
cuntárame les sos penes
y qu’andaba con velea.
 
Colé col fíu Parménides,
el del ser que ye inmutable,
diba a cortexar hespérides,
yos pretendimos en bable.
 
Aristóteles nos viera,
aquel del quintu elementu,
nos montó la escandalera
col rollu’l conocimientu.
 
Torné p’anguaño, nel día,
al puru materialismu,
refugué la teoría
y afinqué nel paraxismu.
 
La verdá nun l’atopé,
nin ella m’alcontró a min,
sicasí, filosofé
que vamos per mal camín.


sábado, 28 de enero de 2017

¿Atrapáu nel tiempu?

¡Feliz añu, gallos! Nun sé si taré entamando a perder la pota yá qu’abúltaseme que celebré la entrada del añu habrá un mes en Grau y güei deseáronme “feliz añu nuevu” nun comerciu nel que merco dacuando en vez dalguna mierdina. Pueque talamente tea atrapáu nel tiempu o que quiciabes güei nun seya Santu Tomás d'Aquino y seya’l Día de la Marmota porque tamién m’endilgaron el “feliz añu nuevu” de la que baxe a por naranxes de la china. Arriendes, punxi la televisión y la quité darréu por causa de qu’igualmente lu andaba festexando una montonera xente peles cais. Por si acaso, vos encomiendo desconeutar los despertadores.

viernes, 27 de enero de 2017

¡Que llueva, que llueva!


Que llueva, que llueva,
la Virxe de la Cueva. 
Los peperinos canten,
los vieyos nun llevanten.
Que llueva yá tol día,
la Virxe de la Guía.
Los rampiñeros glayen
pa que toos se callen.
¡Que sí, que non,
 que caiga yá un bastiazu!
¡Que sí, sinón,
vien otru tarifazu!
 
Qu’orbaye, qu’orbaye,
la Virxe del Oteru.
Que tol mundiu se calle,
si queda ensin dineru.
 Los rampiñeros canten,
otra xubida llanten.
los vieyos retayaos
tan eleutrocutaos.
 
 Qu’avente, qu’avente,
válganos San Vicente.
Que tol mundiu tremez
que xuban otra vez.
¡Que sí, que non,
 que caiga yá un bastiazu!
¡Que sí, sinón,
mangan un tarifazu!
¡Que sí, que non,
que ñeve tol iviernu!
¡Que sí, qu’alón,
que vayan pal infiernu!


miércoles, 25 de enero de 2017

RECONOCENCIA


Con gran ciñu a ti, mio amigu,
–mediu sieglu al taranTrump–,
al mio padrín don Rodrigu
y a los qu'a mio vera tan.

Lu recibí esta mañana,
yo, que nun trío un concursu,
lu apurrieron de Lloriana,
tarifa últimu recursu.

lunes, 23 de enero de 2017

La neña de porzolana

 
     Hai dalgunes fotos antigües onde, arriendes del paisax o de la persona, paez que tamién quedara trescaláu pa siempres el so mesmu xeitu…
 
La neña Alicina
nun carez galbana,
la so melecina
ye de porzolana.
 
Ye la so moñeca,
papiellos de lloza; 
y dan a la llueca,
con ella retoza.
 
Cuando naide mira,
el xuguete fala,
la neña l’almira,
nun vio cosa tala.
 
Si s’avera xente,
la pon al so oyíu,
yá que nun la siente,
pos finó’l sentíu.
 
Ye qu’ese trebeyu
refuga’l falar
a nuevu o a vieyu,
namái al so par.
 
Pueque se frayara
esa compañera,
nunca más topara
otra tan melguera.
 
Magar qu’en los suaños,
enrieda con ella,
nun pasen los años,
caltiénse a so oreya.
 
Tamién Alicina
foi de porzolana,
cuando rapacina,
pequeña y galana.


Nel caberu númberu de Les Fueyes del Foru en Grau…


viernes, 20 de enero de 2017

¡PAPEN TAMIÉN EL MIO ALMUERZU!

        Non, nun procuro convida-yos, ye que nos primeros díes del añu qu’entra, cuando retayaron de nuevu'l valir de la mio pensión un 1,25%, xubiéronme 10 céntimos el café y 20 un ruin churru qu’ataragañaba, polo que m'obligaron a refugalos. Deseo esclaria-yos que dicha paga constitúi un derechu adquiríu a lo llargo de décades cotizando pa ello, polo qu'igualmente tán tarazando los mios derechos. Coles mesmes, afitaron un copagu sanitariu del que los xubilaos tábamos escusaos; arriendes d’esniciar una riestra de melecines del ámbitu de prescripción de la Seguridá Social. De mano, en 2011, conxeláronnos la mentada renta, cuando la inflación algamó'l 2,4% y, en 2012, cuando esguiló al 2,9%, namái nos aportaron un 1%. El so enfotu llevóme a cavilgar en que deben d’escurrir Uds. que, como somos capaces d'agabitar a les nueses families, tamién debemos de ser quien a cuadrar les sos cuentes, en tantu se xuben Uds. mesmos cuatro vegaes más, rescaten bancos, amonten un 8 % otres partíes, sofiten a persones de fuera o perdonen 1492 millones d'euros a Cuba, pero créanme señores del Gobiernu qu'eso nun ye posible. Tocantes a la oposición, a unos debemos d'estima-yos apautar con Uds. ensin tener pa nada en cuenta esta fechoría y a otros el que nun-yos pague la pena, nesti casu, salir a la cai o a arrodiar el Congresu. Mientres, encarécense una burricada servicios como la lluz, el gas o'l combustible y de secute lo van facer los productos de primera necesidá, el tresporte y fasta la mesma cuota de la nuesa comunidá. En resume, déxenme qu'anecie n'ufierta-yos el mio almuerzu y queys empapice a toos yá que nos tán emburriando a tornar al pan moyáu en chicoria ya a dexar d’alleganos a les urnes.
 
¡TÓMENSE TAMBIÉN MI ALMUERZO!
 
        No, no pretendo invitarles, es que en los primeros días del presente año, cuando recortaron de nuevo el poder adquisitivo de mi pensión un 1,25%, me subieron 10 céntimos el café y 20 una exigua porra que me desayunaba, por lo que me han obligado a suprimir su ingesta. Deseo aclararles que dicha retribución constituye un derecho adquirido a lo largo de décadas cotizando para ello, por lo que igualmente están cercenando mis derechos. Asimismo, establecieron un copago sanitario del que los jubilados estábamos exentos, amén de excluir una serie de medicamentos del ámbito de prescripción de la Seguridad Social. Previamente, en 2011, nos congelaron el mencionado emolumento, cuando la inflación alcanzó el 2,4% y, en 2012, cuando se elevó al 2,9%, sólo nos incrementaron un 1%. Su reincidencia me ha llevado a reflexionar en que Uds. deben de considerar que, como somos capaces de ayudar a nuestras familias, también debemos de serlo para cuadrar sus cuentas, en tanto se suben Uds. mismos cuatro veces más, rescatan bancos, acrecientan un 8 % otras retribuciones, favorecen a personas de fuera o condonan 1492 millones de euros a Cuba, pero créanme señores del Gobierno que eso no es posible. En cuanto a la oposición, a unos debemos de “agradecerles” el haber pactado con Uds. sin tener para nada en cuenta esta afrenta y a otros el que no les merezca la pena, en este caso, salir a la calle o rodear el Congreso. Mientras, se encarecen descomunalmente partidas como la luz, el gas o el combustible y a continuación lo harán los productos de primera necesidad, el transporte y hasta la propia cuota de nuestra comunidad. En resumidas cuentas, permítanme que insista en ofrecerles mi almuerzo y que se les indigeste a todos ya que nos están obligando a volver al pan mojado en achicoria y a dejar de acudir a las urnas.

 

 

jueves, 19 de enero de 2017

Trasgu

 
     Punximos tol enfotu ya ilusión nél pa velo volar de nuevu y voló.  Dende va seis años yá formaba parte d'una nueva colonia d'utre negra nos Pirineos, agora otros esfrutaron bien al contrariu matándolo a tiros (Lluis Laria / CEPESMA).
 
Caleyo con medrana ente la xente,
a vegaes esbario en desatín,
pos cualquiera pue ser un asesín,
que fine cola vida un inocente.
 
Alloria’l mio procuru y rabio a esgaya,
güei mataron a Trasgu un ñegru utre,
¡malditu’l desalmáu qu’en murnia nutre!
¿Aú matará mañana esa gandaya?

miércoles, 18 de enero de 2017

El reló de la estación

 
El reló de la estación
da salíes y llegaes;
repicando’l carillón,
 alvierte calamidaes.
 
Acompangando maletes,
eses qu’acarreten murnies,
ablucando les xaretes,
esmoleciendo de turnies.
 
Tremando vides y adioses
al compás de los segundos,
encamentando a los dioses
el futuru n’otros mundos.
 
Hai estaciones escures,
pende esbarien aire y cutu,
trescalándose amargures,
onde’l reló guarda llutu.
 
El mesmu qu’hai munchos años,
na semeya en blancu y prietu,
aportaba desengaños
en tonu de carbón netu.
 
Cuando del tiempu foi güeyu,
cucando al nuevu alloñar,
mientres despidía'l vieyu
y alloriaba enforma’l llar.
 
Ye un reló peliculeru,
el reló de la estación,
magar que siempres melgueru,
 cuerre la vida al so son.


martes, 17 de enero de 2017

Diecisiete

Güei, diecisiete de xineru del diecisiete, a los diecisiete hores y diecisiete minutos vos ufierto diecisiete pallabres.

lunes, 16 de enero de 2017

Starbus, ne


 En Madrid, nel Starbus, ne,
perexil salvia romeru and thime,
van mangate tres euros café
y nun vas ser nin a lleer el Times

Sorbia adulces y nun aturulles,
perexil salvia romeru abeyera,
que si acaso pol preciu farfulles,
albidrarán que vienes de fuera.

T'aconseyo que nun mueyes pan,
nin que pidas el lleche cuayao,
yá qu’entós los mozos qu’ehí tan,
moflarán del to chapurriáu.

Si dalgún te quier cortexar,
salvia y fervinchu de la mazaniella,
y retrucas que vas a tornar
colos cinco fíos de la to reciella.

Será namái de cine esi amor
que tuvisti nel Starbus, ne,
perexil, salvia, tamién coliflor,
arroxando na llingua’l café.

domingo, 15 de enero de 2017

Tren siberianu

 (Semeya, Wordpress)

El «tren siberiano» descargará en Asturias temperaturas de hasta -12º (La Voz, 15.1.2017).

“Misteriu” de Fomentu y Principáu: ¿Nun vos da vergoña? 12 años d’obres y tracamundios ya un tren siberianu va bascular n’Asturies enantes de que crucie unu nuesu pel tunelón de la Variante yá que nun sois quien nin a poner el ramu. Lu peor ye que, dempués de dexar ensin agua a los cazurros y aneciar en mentir coles feches d'inauguración, equí nun dimite naide.

sábado, 14 de enero de 2017

Reencarnáu


Tuvi una vez reencarnáu,
yera un home repunante,
fadiaba al andar frayáu
y siempres taba tirante.
De neñu m'echó’l maestru
y yá nun torné a la escuela,
llicenciara de cabestru
y truñaba a la mi güela.
Falaba mal, como un payu,
rutiaba como un magüetu,
sotripé al xefe nel tayu
y diba a zucar del tetu.
Casara aquella mañana
y separté pela tarde,
m'inoraba la mio hermana
y rezungaba nel farde.
Enchufáronme nun coru,
que llamaben “coral mixta”,
rebalbiaba a toos nel foru
y quedéme de solista.
Sufri’l mal de la teyera
ya enceté a toos l’andancia,
escapé cola enfermera
y robamos l’ambulancia.
De la que morriera, un día,
nun vieno naide al entierru,
namái que la policía,
echando la gata al perru.
Cuando riñe la señora,
—y digo que tien fortuna
de vivir conmigo agora,
yá que gasté peor zuna.

viernes, 13 de enero de 2017

Sones de Navidá

 
De la qu’entamara, Ambás,
animó a tolos demás.
Cuando llegó Carolina,
ximelgó tola marina.
 
Equí tan los dos d’andecha,
na xuntanza d'aquel día,
de sones a costa fecha
p’afitar l'asturianía.
 
Xosé Antón en Grau s’afaya,
güei xuntó-ys el traxín,
ella con Fonte la Faya,
él, qu’anecia en so camín.
 
¿Vos rezamos o cantamos?
¡Cantái esos villancicos!,
toos xuntos retrucamos,
fasta los mozos más clicos.
 
Tres d’esta segunda más,
bien de grupos fairán pina
col Archivu Oral d’Ambás
ya’l bon xeitu Carolina.


jueves, 12 de enero de 2017

Los neños del mio colexu

    
     Tuvi llantando nel buscador del Feisbuc los nomes de cada unu de los neños del mio colexu, pero'l Cara Llibru aneciaba cola mesma rempuesta: "nun s'atoparon resultaos pa la to busca". ¿Aú taran toos aquellos rapacinos? Quiciabes nun caltengan xeitu abondu como para asoleyar na Rede. Pueque dalgunos yá nun tean con nós nesti valle de llárimes, que dicía'l rezu. Igual camudaron de nome y desaniciaron la xaceda, como la nuesa propia escuela, y yá sía mui abegosu l'alcontralos. Acasu'l tiempu me fixera escaecer y trabucara los sos apellíos. Sicasí, magar que'l Feisbuc aporfie en nun apurrir nenguna información, les sos cares, los sos güeyos y la so mesma sorrisa quedaron afitaos para siempres nel mio maxín y naide va ser quien a los borrar de la retafila d'amigos colos que d'una o otra forma entá toi conectáu. Escolinos del mio colexu: yá toi calcando nel botón esencial del "me presta" de cualesquier entrada etérea.

EL LLISTU


                                         (Semeya: desmotivaciones)


     El Llistu ye un conocíu qu’hai cuarenta años ría porque cotizaba la cuarta parte que yo, ganando’l doble, por culpa de que-y pagaben cuasi too en ñegru. Magar que marafundiara a mamplén, al Llistu-y dieron un xalé de los protexíos y tenía toa triba de carnés y tarxetes d’afiliaciones p’algamar descuentos. Al Llistu-y quedara dempués la metá de pensión qu’a min ya agora anda glayando nos manifestamientos pa qu’aporten más los que más ganen y llibren los que menos. Abúltaseme que nesti país hai bien de pícaros y llistos que siempres vivieron de los que trabayaron como burros. Cuento tamién qu’un mineru, un tituláu o daquién que trabaya once hores al día nun pueden ganar como ún que nun tien una xera peligrosa, el que nun ta preparáu o’l que trabaya seis hores al día; sicasí, como dicía’l mio pá: “a cuenta de los fatos, viven los llistos y nesti país nun paga la pena deprender nin matase a trabayar”.

martes, 10 de enero de 2017

La escalada del sobráu

  

Xubo y baxo,
baxo y xubo,
pasu en paso,
sol anubo,
 
la escalada del sobráu,
onde s’alcuentra’l silenciu,
perbaxo del to teyáu,
a cubierto del vertenciu.
 
Au s’afita’l tendal,
el nuesu tendal de suaños,
onde esnalé de chaval
y posara colos años.
 
Onde trescaló la voz,
la voz sele de güelina,
onde colinga la foz
y reposa yá la tina.
 
Ellí ruxe la parede
y canta la tabla’l pisu,
d’enantes t’entra la sede
y trespandes a otru llisu.
 
La rueca torna a filar
la rede filos del alma,
ye a la murnia retacar,
mentanto’l procuru ensalma.
 
Baxo y xubo,
xubo y baxo,
sol anubo,
pasu en paso.

lunes, 9 de enero de 2017

La Piedriquina


     Un día, de la que tornábemos de Xixón, cruciamos per Llanera y Les Regueres col envís de xintar en Santuyanu, enantes de llegar a Grao. Foi’l casu que na cruz de Biedes esviéme a Parades cola intención de saludar enantes a la mio amiga Rosa María Rodríguez, primer cronista de Les Regueres y presidenta de l’asociación cultural La Piedriquina. Ella vive somorguiada nun verdaderu paraísu al que quier sobre manera y al que nun dexa de corresponder cola so xera nel terrén de la hestoria, etnografía, arte, vezos o padrimoniu d’esi conceyu. La visita, magar que curtia, foi bramente bayurosa. Estimando les atenciones recibíes, nun quiero esbardiar la ocasión d’encamentar, sobre too a los sos vecinos, la soscripción a la revista bimensual de La Piedriquina en lapiedriquina@yahoo.es