Xubo y baxo,
baxo y xubo,
pasu en paso,
sol anubo,
la escalada del sobráu,
onde s’alcuentra’l silenciu,
perbaxo del to teyáu,
a cubierto del vertenciu.
Au s’afita’l tendal,
el nuesu tendal de suaños,
onde esnalé de chaval
y posara colos años.
Onde trescaló la voz,
la voz sele de güelina,
onde colinga la foz
y reposa yá la tina.
Ellí ruxe la parede
y canta la tabla’l pisu,
d’enantes t’entra la sede
y trespandes a otru llisu.
La rueca torna a filar
la rede filos del alma,
ye a la murnia retacar,
mentanto’l procuru ensalma.
Baxo y xubo,
xubo y baxo,
sol anubo,
pasu en paso.
No hay comentarios:
Publicar un comentario