Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

martes, 30 de enero de 2018

¡ANDECHA!


¡ANDECHA PA QUE–Y DEAN OTRU TOISÓN D’ORU A LA OTRA NEÑA!


     Tola mio vida, de la que fui a visitar una casa na qu'había dellos guah.es, siempres–yos llevé un regalín pa caún. Güei, paecióme d'una gran falta de procuru y de sensibilidá lo que fixeron con Sofía y, arriendes, que naide aldericara nada. Nun me val la esplicación de que la otra seya la princesa d'Asturies. ¿Si tenemos cuatro reis, nun vamos ser a caltener dos princeses? Si ye por culpa de que nun puen representar el mesmu principáu pos que la nomen talamente princesa de Tabarnia y finamos col agraviu. 

domingo, 28 de enero de 2018

Quería señora

(La mamina de José Núñez)

Señora paisana
que nel tiempu xube
xeitu d’asturiana
ya’l pelo de ñube.

Cayáu de madera
p’aguantar los años,
bien de dura xera
y mil desengaños.

Mirada perdía,
perdía en pasáu,
esmuz cada día
el tiempu atropáu,

los golpes, engurries
y los reconchones,
l’aspeutu, les murries,
llárimes y sones.

Que pal escaezu,
bien de tiempu queda,
qu’afuega’l pescuezu
ya acuta la veda.

Tráyeme alcordanza
de mio ma bendita,
colinga en perganza,
la mio murnia afita.

Carezo l’agraviu,
la vida asonsaña,
sofita Cartavio,
conceyu Coaña.

Quería señora:
si esto–y prestara,
dedíco–ylu agora,
besándo–y la cara.

viernes, 26 de enero de 2018

Esconxuru pa Manuela


(Manuela tarrecía que-y brotara una sandía)
(Semeya, Manuela Ramos)

Manuela, Manuela,
lluceros de lluz,
d’una lluz qu’asela,
y, mui lloñe, esmuz.

Son los tos güeyinos
qu’allumen na nueche,
per monte y caminos,
torgando que treche.

Espeyen medrana,
que sufristi un día,
de granar la grana,
grana de sandía.

Ya’l to pelo roxu
camudara en fueya,
aportando enoxu
verde a la reciella.

Por si dicha planta
medrara en barriga,
qu'esi mieu espanta,
que fadia y respiga.

Nun tremezas neña,
que’l mal esconxuro,
queme’l mal na lleña,
muerra pal futuru.

Fine de sutrullu,
coxíu, caxigal,
fora del banduyu,
pa siempre’l to mal.

Manuela, Manuela,
Lita de Zarréu,
marcha de gayuela,
yá nun teas mieu.

jueves, 25 de enero de 2018

¡Llevántate y cucha!

  
(Dibuxu pañáu de Dulce Solares)


Te trai más cuenta qu’uses productos químicos:

·        P’andechar nel cambéu climáticu.
·        pa contaminar suelos ya agües soterrañes
·        pa hinchir la planta si te pases colos minerales.
·        p’acedar el suelo ya ensuchar onde’l químicu yá pierda la so capacidá de fertilizar.
·        pa que seyas a intoxícate cola amasuñadura ya espardimientu.
·        pa gastar perres.
·        p’aforrar en tabacu.

¿De los metales pesaos qu’empleguen nes mines d’oru, nun dicen nada?
¿De qu’anecien en quemar les viesques ensin castigos d’acorde a la fechoría, tampoco?
¿Y de los fumos que sulfaten les nueses ciudaes y villes?

miércoles, 24 de enero de 2018

Virxinia Woolf

(Woolf nel Google)

     Güei’l Google asoleya la figura de Virxinia Woolf. El 28 de marzu de 1941, Woolf se suicidó. Punxo l’abrigu, enllenó los sos bolsos con cantos y se tiró al ríu Ouse, que s’allugaba mui bien cerca de la so casa, nel que s’afogó. El so cuerpu nun foi atopáu fasta'l 18 d'abril. El so home soterró los restos baxo un árbol en Rodmell, Sussex.

      Virxinia Woolf ta considerada como una de les más grandes escritores ingleses del sieglu XX, la so téunica ya estilu poéticu s’emponderen ente les aportaciones más granibles a la novela moderna. Amás, espuntó andechando na vida intelectual del so tiempu, peles sos idees, y, sobre manera, pola reivindicación d'un mayor protagonismu de les muyeres na sociedá.

     La entruga que me faigo ye ¿si nun coincidiera qu'el so pá, Sir Leslie Stephen, yera editor, críticu y biógrafu, espublizaríen les sos obres?

martes, 23 de enero de 2018

La moñeca d'Alicina


La moñeca la semeya
marmulla y fala al oyíu,
tien graciosa la cerneya,
llévase con cualquier críu.

Naide la fuera a sentir,
namái una rapacina,
tampoco la vieron rir,
regaláronla a Alicina.

La cara de porzolana,
igual que la de la neña,
espierta cada mañana
col so arume de gareña.

El vistíu ye de fada,
les sandalies a la moda,
xueguen les dos pela estrada
o, si cuadra, van de boda.

Dambes ñacieron nun cuentu
y foron inseparables,
pero la edá foi n’aumentu
y dixebraron los cables

d’esa conexón de maxa
de la neña y la moñeca,
camudó’l ciñu en forgaxa
cola borrina trubieca. 

lunes, 22 de enero de 2018

Enanos de Jardín


Es difícil de creer
que una noche en los veranos,
siempre sin dejarse ver,
cobren vida los enanos.

Los que están en el jardín
o de adorno en la parcela
voltean el balancín
y giran la manivela.

Suben por las escaleras,
desenroscan las bombillas,
dan brincos, echan carreras
y descolocan las sillas.

A pesar de estar a oscuras,
                                  se columpian de las ramas,                                  
hacen muchas travesuras
y se prueban tus pijamas.

Algunos podan la hiedra,
si encuentran unas tijeras;
pero, sus manos de piedra
frenan las buenas maneras.

Una vez los vio Manuel,
aquel del pelo rizoso,
 cuando lo contó a Isabel,
le llamaron mentiroso.

Es difícil de creer,
 ocurre una vez al año
y nunca se dejan ver.
Es la verdad, no te engaño.

sábado, 20 de enero de 2018

MENTIRA


     Les películes, davezu, tan basaes na vida real. Hai bien de tiempu que yo nun veo películes. El mio pá, cuando tábemos viendo dalguna pela televisión, dicía que yera too mentira. De resultes, la vida real tamién lu ye. Asina que nun creas nada de lo que sientas y namái la metá de lu que seyas a ver porque too pue ser namái qu’un esperimentu.

jueves, 18 de enero de 2018

El porteru


Nun para na puerta casa,
sinón n’otra con llargueru,
de verde o sabla la basa,
ellí s’asitia’l porteru.

Nun defende escontra forga,
el peligru vien d’alantre,
él tolos balones torga,
menos los que-y colen, ¡diantre!

Solu ante la solanera,
solu na so soledá,
s’enfrenta a una delantera
que-y sotripa ensin piedá.

Ye’l más héroe o más villanu,
davezu espectacular;
si picia un tiru llonxanu,
pueque-y llamen pelgar.

Tien xente pegada’l llombu,
son los güeyos de la grada,
el so vuelu rectu o combu,
lu siguen cola mirada.

La percha les mancadures,
nun tien nales, pero esnala,
l’ídolu les creatures,
porque refuga la bala.

El que valta la cadarma,
el qu’aventa’l cueru al cielu,
aquel que más fácil l’arma,
colos sos nefros en suelu.

El que más arroxa en branu,
el qu’esfrez cuando xineru,
quien mete la mano, ufanu,
d’otra forma ye’l porteru.

miércoles, 17 de enero de 2018

Santa Rita, Rita...

(Xaguar Pace)

    Esta mañana, pela carretera Valencia, adelantáramos al únicu Xaguar que dicen “Pace” y lu alvertí a la muyer. Ella comentárame que lu conducía una muyer ya amestó: "¡Qué divina!". Yo-y retruqué: “Tu, talamente,  tendríes que  conducir unu por aciu de que tu tamién yes divina”. Aína, aldericárame: "Home, si casara con Miguel que tenía la clínica en cuenta de contigo, bien seguru". De secute, yo-y aposté: "Habelo pensao enantes que tiempu tuviesti en cuasi siete años de cortexu: Santa Rita, Rita, lo que se da nun se quita".

martes, 16 de enero de 2018

D’arcenes y cunetes


       España ye un país d'arcenes y cunetes sangrinos ya inesistentes. La moza atropellada en Fonte'l Saz del Xarama vien a amestase a la montonera víctimes que se xeneren nes carreteres del país por falta d'un necesariu arcén pel que circular. Plániense la mayor parte d’eses víes namái que pa los coches ya escaezse a los peatones. La bandera actual paez asoleyar una calzada na que’l sol espeya arrodiada de sangre pelos sos llaterales. La espiritualidá del moráu nunu de los llaos del blasón de la República –como se pue apreciar nes rutes nacionales nesti mapa de la dómina–, tampoco auguraba nada bono y d'aquella foron les cunetes les qu'enfarxopetaron de cadabres, ente ellos el del mio tíu Benino, oficial del exércitu popular, entá nun atopáu. Trescurriera munchu tiempu ya anguaño esisten patrulles, pantalles, axentes, radares, semáforos, señales y sanciones de toa triba; pero nun afitaron esos indispensables márxenes en bien de carreteres pelos que poder movese ente poblaciones n'ausencia de caminos. N'Asturies, el mesmu Camín de Santiago escurre sobro tramos que cadecen d’eses franxes de seguridá. ¿Cuántes muertes más van tener que producise pa que se tomen midíes contra esa llaceria?

viernes, 12 de enero de 2018

¿Me da un secante?


     De la que mercábemos daqué na papelería, siempres finábemos con esa entruga. Nes papeleríes o llibreríes de la redolada agasayaben la to compra con un secante de naninos. Había dos papeleríes allugaes a un llau ya l'otru de la cai Bravu Murillo: la de Xocu y la d'Ortiz. Arriendes, otra más llonxana a la que nos averábamos si dalgo nun atopábemos nelles, magar que’l so nome quedó escaecíu como aquella dómina. Los secantes de naninos yeren una verdadera coleición. Taben afitaos a toa color na cara que nun ensugaba la tinta ya en caún enredaben nuna actividá o con trebeyos distintos; sicasí, invariablemente asoleyaben per atrás d’un tinteru o de la marca del benefautor. Esta mesma mañana, escuclé ablucáu escontra la so cristalera como vendíen nun comerciu eses ruines cartulines a cuatro euros. Darréu, cavilgué nos milenta de que dispondría agora por culpa la montonera secantes qu'algamé a atropar; pero, un mal día, los naninos desfilaron camín del calderu la basoria, talamente como la desaxerada cantidá d'achiperres qu'almacenaba. Ye que los probes nun disponen d'espaciu abondo nes sos cases y, de resultes, tienen qu'esprendese de munches mierdines que col tiempu puen convertise en auténtiques ayalgues. Cuando colaba, sintiera seliquino unes risines que me resultaron familiares y, al tornar la mirada, abultóseme que dalgún d'aquellos pequeños comediantes nun guardaba la mesma posición...



jueves, 11 de enero de 2018

Tiesu


Pa engañar la depresión,
davezu entamo a encoplar,
aselando la tensión
ya’l trestornu bipolar.

Ya ansí tando entreteníu,
refugo les isobares,
a daquién faigo l'avíu
y nun pongo males cares.

Dacuando arriendes esnalo
o trespando a cualquier llau,
lo mesmu sueño, que falo,
que río lu trabucáu.

Doi vueltes como una noria,
esguilo a cualesquier cume,
sestaferio col qu'alloria
y m'escuendo col que sume.

Entrín y non, vengo y voi,
nun m’apura’l combustible,
apeno pol que se foi,
m’abluca d’incomprensible.

Enfoto cola fatada,
por aciu de ser tan fatu,
amás, allorio por nada
y mui sero me decato.

La fechoría me ciega,
teo que parar el carru,
fino como una maniega,
carezo inxente catarru.

Enriedo no non rentable,
pos nun val la poesía,
dicen que tampoco’l bable,
nun teo día con día.

Rindo afartu de tar fartu,
pueme’l repetíu disgustu;
qu’espeta l’espín del artu,
pero enceta malagustu.

Azarientu de salú,
sicasí, téngome tiesu,
porque me sofites tu,
por eso t’apurro un besu.



martes, 9 de enero de 2018

Alicina, mazanina.


Alicina, mazanina,
mazanina col so llazu,
esa foto ye un abrazu,
abrazu de pequeñina.

Semeya de blancu y prietu,
nos güeyos espeya’l blancu,
ensin llevantar del bancu,
el blancu vistíu netu.

La química de la imaxe,
d’imaxe que ye alcordanza,
mentanto que’l tiempu avanza,
a vieyura va’l fustaxe.

Magar que tu nun camudes
per aciu les reaiciones,
vas frayando corazones
y, como neña, pescudes.

Que quien faise como neñu
entra en Reinu de los Cielos,
onde se cuerren los velos
y yá nun s’engurria’l ceñu.

El cielu ta nos tos güeyos,
asoleya na mirada,
la llende ye mui delgada
pa los neños y los vieyos.

Alicina, mazanina,
neñina del blancu llazu,
d’esi cielu yes retazu,
bendígate la Santina.

lunes, 8 de enero de 2018

Arumes de TPA


     De la que tuviéramos en Grau na primer selmana del nuevu añu, la TPA nun dexaba de perfumanos la sala a toles hores, aniciando cola rubia del aiga del Chloé que desendolcaba’l so pañolón al vientu. Al tiempu, les muyeres de Gucci Bloon bañábense nun agua enfarxopetao de roses y los Vitoriu y Luquinu t’ufiertaben la suya d’espertos perfumistes. Darréu, Dolfu Domínguez facía otro tanto cola fresco, la de roses y la d’azahar. United Colors de Benetton diba d’arumes. Dempués, un mozu mui curiosu de Xicu Rabanne baxaba’l pantalón delantre l’espeyu y valtaba p’atrás a una montonera moces que–y andaben esclucando. Aína, la roxa que plizcaba’l cazu a un paisanu y la ministra qu’amosaba liga al salir del xarré montaben el Scandal. Aneciaba Dolfu Domínguez col so arume únicu ya’l for men del mozu roxu del pelo llargo. La del Olimpu aporfiaba cola mesma marca. Xina Ricci aportaba amás una modelu desfilando en faxa. El barbudu d’Hugu Boss qu’afalagaba pierna anunciaba la so bottled menuda. El neñu rizosu, la de Calvin Klein. De secute, Antón Banderes, nel intre que facía la so publicidá recoyía llaves de toles femes. De contino, la del vistíu descosíu fasta’l cadril dexaba ver y goler la so Good Girl. La reciella de la cama en comuña numberaba’l frascu 212 de Carulina Herrera. Un pantasmón ensin camisa qu’acarretaba una copa nos endilgaba l’Invictus col que repetía Xicu Rabanne. Asoleyaben, arriendes, una muyer blanca ya otra prieta de Tiffany que yá nun fui quien a ver que coime vaporiaben, al alcontrame yá aforfugando y desesperáu por culpa que respiro mal colos golores fuertes. De resultes, abrí la cristalera y tiréme pel ventanar, con tan bona suerte que cayí sobre’l techu de la furgoneta d’una de les perfumeríes de la villa. 

sábado, 6 de enero de 2018

Lu qu’a min me paez…

Que te paez, José Rodríguez Pérez Pindesierra
http://www.lne.es/centro/2018/01/04/tribunal-superior-anula-ordenanza-promocion/2217637.html#!kalooga-14172/~Nore%C3%B1a%20~Asturias%5E0.75%20~pp%5E0.56


Retrucando al mio emponderáu amigu Marcial Fernández Fernández:

     El mayor Derechu ye aquel que tenemos los paisanos a emplegala como la nuesa llingua que ye, anterior al castellán y dafechamente refugada ya espatayada por aquellos a quien nun–yos correspuende. Podrán desaniciar ordenances pero, si la xente la falara davezu, agora naide sería quien a lu torgar. Cola cultura nun se debería de facer política yá'l vezu tamién ye, o tendría que ser llei, n'ausencia d'otra llei axustada a la tema. D'otra miente, hai dellos muérganos que tan pal sofitu ya espardimientu del asturianu que tienen munchu que dicir y que callen abondo. No qu'a min toca, de la que torno a Asturies, anecio en falar n'asturianu magar que siempres dalgún repunante me mire torcio.


Un abrazu pa toos, recién llegáu d'Asturies.