A la gueta de mio hermanina

     Pente la borrina del aislamientu tamién surden les duldes. Hai unos díes que nun tenemos noticies de la mio hermanina, Ánxeles Rodríguez Pérez. Yá sabéis qu’ella ye la mio hermana por parte de la nuesa madre Asturies y del mesmu conceyu de Tinéu, que nos aportaron idénticos apellíos. La muyer ya yo andamos dafechamente esmolecíos. Nun contesta al teléfanu, nun retruca pel priváu y naide sabe d’ella. Pa remate, nel departamentu del Huca onde teo sentío que trabayaba m’espeten que nun la conocen. Toi en contautu con un garapiellu xente al envís de recibir dalguna bona novedá. Confíamos en que tou sía por cuenta d'un mal funcionamientu del Feisbuc y del propiu móvil. Mentanto, nos caltenemos a la gueta.

Nel Cuetu los Chopos

     Hubo un tiempu sele pa les lletres nel que Madrid nun asoleyaba tantos ministerios, por aciu d’ello sobraben dellos ministros. Una dómina na que pel solar de los nuevos entá corríen los caballos y se podía escuclar nel altu una llomba l’afamada residencia d’estudiantes, a manzorga del anguaño Muséu de Ciencies Naturales. Ellí, nel altor del Cuetu los Chopos, florecíen roses, suaños y poetes como enxamás lo fixeron n’España nuna mesma faza. Nesi llugar, pente los álamos, pasiaben Xuan Ramón Jiménez, Antón Machado, Rafael Alberti, Xosé Moreno Villa y Milio Prados o ríen les ocurrencies cantando al son del pianu de Federico García Lorca. Dempués, tres d’una repunante amarraza, aumentaron los ministros ya amenorgaron los poetes de calidá mientres diben enchipando tan comenenciosos como los propios políticos.

Misantropía

Tanta pita, pita pinta,

pintara pintu’l piteru,

un pitín picó la tinta

y tamién, el picatueru.

Picaron nel picalín,

pintaron la picalera,

pintó la poza Pachín,

que ye un plizcu pexiguera.

Pasó un patu persumíu

y perpintara les pates,

pescanciara pavoríu

les sos pates nes zapates.

Tola piedra y la parede

supiera del papasal,

papó un paparáu y pede

un páxaru nel pasal.

En pipando la pintura,

un pegatu de la pega,

al plasmar l’apegadura

la pegó a una paririega.

Pariera un pintu pencosu,

la paya na payareta,

como’l pitu del patoxu

o la pita Turuleta.

El pá−y punxo Pixuetu

pela parroquia pesllada,

pidió’l párrocu respetu

pa despintar la pintada.

Entá’l pitín pía, pía,

y la pita pinta, pinta,

postiando misantropía,

p’acutar platos de xinta.

La Graciosa II

     Daquella, los nuevos amos s'encargaron aína de retirar la última buelga de La Graciosa. Anguaño, la mio semeya ye lo únicu que queda d'ella. Tres camudar el nome, nun tardaron munchu en dixebrar caún pel so camín mientres qu'esa isla se caltién ensin encetaos ayena al presente andanciu y bien seguru que dende Pedru Barba a Caleta del Sebu ri la gracia de la cabera fechoría. Pueque esi azulexu bien valiera  pa defender a los sos propietarios de lo dañible, ¿sabrálu dalgún guanche? Pa quien nun lo recuerde, amiesto'l párrafo qu’entra colo qu'escribí nel so día sobro ella…

     “Tornaron al so orixe y paez que foi ayeri… Dempués d’una montonera d’años viviendo nesa urbanización madrilana a la vera nós, colaron camín del puertu d'Huelva colos sos dos perros, un fardel d’ilusiones y delles caxes d’aperios y ropa que malcuriosu afayaben nel escasu sitiu qu’espurría del pequeñu coche. Nél marcharon colo que rescataron del pasáu, tol so presente y los nuevos proyeutos de futuru. El barcu partiera dende Cádiz, pero a Gigi nun–y debió prestar un res arrequexar día y mediu zarráu nel tresportín yá que morrió darréu. En resultancia, La Graciosa dexó de selu tantu; sicasí, tres más de cinco años, el so baldosín entá anecia n’amosar na muria’l caberu destín de los postreros moradores de la casa, qu’aínda se caltién en silenciu. Güei, Saulu vieno de visita mientres que la madre remanez nes Canaries. Xintaron xuntos y pela tardiquina, el cuartu d’Álvarín españa en risaes al tiempu que dambos enrieden y glayen. Arriendes, la mesma estampa de La Graciosa se m’abulta qu’esboza una llixera sorrisa”.

El pangolín que nun yera

Cola so llingua allargada

vive y papa’l pangolín,

dicen que la enguedeyada

foi por culpa esti bichín.

Otros que ye l’esperteyu

el culpable de l’andancia,

yo nun toi seguru d’ello,

nun vos lo tomar a chancia.

Ensin datu aclaratoriu

qu’aporte dalgún manguán,

pueque d’un llaboratoriu,

de la provincia Wuhan,

escapara l’ingrediente

ya agora se quier culpar

como siempre a un inocente,

a un animal del llugar.

La falta ye del humanu

por faer lo que nun debe,

por xingar un mundiu sanu

o comer ensin ver sebe.

Que llueu enceta’l banduyu,

qu’hai que xintar con porgüeyu,

qu’enantes d’esti baruyu

yá tuvi mal badagüeyu

colo del Añu la Rata,

amás, rata de metal,

que diben meter la pata

ya a toos pintar mui mal.

¡Salú y suerte pal collaciu!,

que nenguno cole enantes,

d’esti compartíu espaciu,

que marchen los repunantes.

Arimar el costazu

     Hailos que tan emplegando’l Feisbuc p’aneciar en faer política ya esto yá fiede. El casu ye asemeyáu al de los furacones de la variante, onde participaron toos y nengunu finó’l llabor. Unos retayaron ya otros desdexaron. Agora yá nun val el Tranquilmanín nin el Llavalesmanesnina y toca arimar el costazu, ensin amarranos, pa salir d’ésta. Salú a toos.

Toitico Bien Empacao - Katie James

    

La mayor parte de los poemes y de los cantares modernos tienen de mancomún que nos falen de daqué tan trescendente como la mar del calamar y l’amor de corazón, lluna y flor. Almiro a la xente que ye quien a dicir daqué anque nun espublice un llibru nin vienda un discu, ayén a padrinos y representantes. Esa xente ye mui difícil d’atopar, quiciabes seya más cenciellu nesa quinta dimensión de los torpes na que desanicien los cuentos ya encoples que se me pierden…

La fin de los tiempos

     

     Esi añu la primavera nun pintaba azul sobre’l cielu de Madrid, sinón d’un gris cafiante qu’aneciaba en caltenese venceyáu a un andanciu mortal invisible. Los montes de la cordelera nin siquiera s’aldovinaben allá pel finxu’l cielu al tar cubiertos pela mesma melandrera xostra. Les flores nun aportaben un res d’arume y los gurriones había cuantayá que taben desapaeciendo. Namái sentíase la murnia y se tastiaba’l silenciu. El pirulí remanecía argutu ayén a la espantible llaceria. Como siempres, unos y otros culpaben de la situación al desdexamientu de los cabezaleros contrarios. La xente atropaba alimentos albidrando que’l ñegru futuru desendolcaría na fin de los tiempos. Peles cais pasiaba afayadiza la soledá, dellos mazcaritos y dalgún qu’otro picardiosu. A una axustada hora munches terraces aplaudíen el llabor de mélicos y sanitarios. Otres se calteníen desiertes mientres que los sos propietarios espotrexaben dientro la falta d’aida o mesmamente’l que naide descolgara’l teléfanu d'asistencia. Otros cantaben, ríen o tocaben mentanto la mayor parte afogaba nel zarro de la so inocencia rumiando reconcomios.

Faicu

       El haiku ye un poema xaponés d’una sola estrofa de namái tres versos que nin siquiera rima y qu’anda perafitándose como los tatuaxes o colingar un arcoxu nel focicu. El haiku dexa deliriar al allunáu, que diz poder esnudar la so alma ya afayar la calma nel mediu la bulla. Nesti mesmu instante voi inventar el “faicu” asturianu, que ye como l’oriental magar que rimando los tres versos a lo pesao y cola fondura del aprobiu, al envís d’escoyonar col universu.

Crucié’l Pisuerga,

cisquéme na llamuerga,

bien mala fuerga.

Col capitán Garfiu

    Al tar yo siempres tan embaíu nos cuentos y poemes, la nuesa casa yera pura fábula. De resultes, Alvarín −el mio fíu−, dacuando en vez nun estremaba ensembre ésta de la realidá. Por culpa d’ello, afacíase a cualesquier situación que se presentara por sorprendente que paeciera. Foi’l casu que daquella nos atopáramos col mesmu capitán Garfiu ya’l mio neñu foi direutu a pidi−y un autógrafu. Lo bramente ablucante foi qu’esi irreal marín sacara darréu'l so cuadernu de bitácora ya afitando nos mios güeyos la so mirada perdida pelos siete mares del maxín aporfiárame en que−y roblara nél. 

¡PUXA MADRID!

    

      Agora qu’a tol mundiu−y da por reburdiar de Madrid y de los madrilanos, yo voi emponderar el so nome. Madrid ye la ciudá qu’acueye a tol mundiu ensin entrugar nin refugar a naide. Bien d’asturianos lu saben, irresponsables ya escelebraos hailos na Villa y Corte como los hai en cualesquier llugar de la Tierra. Madrid ye ablugo de la historia, l’arte y de la cultura en xenral; arriendes de la zarzuela, verbenes ya otros espectáculos. Madrid entá caltién la maxa d’otra dómina nes edificaciones y monumentos de los sieglos XVIII y XIX que nun valtaron nel XX los bombardeos d’unos y les quemes d’otros. Luigi Boccherini lo garró asina, el que tea oyíos pa oyer que sienta…

Tanxe, tanxe la campana,

campana d’Ave María,

na madrilaña mañana,

espardiendo l’allegría.

Col doblar de los tambores,

tambores de los soldaos,

sienten les neñes amores

que son dacuando exiliaos.

Pa los ciegos, minuetu,

pa los mendigos, regalu,

guarda al rosariu respetu,

como guardó’l Padre Galu.

Pasacai de Los Manolos,

asonsañando’l cantar,

como canten ellos solos,

un son que te ye a embelar.

Cuando’l toque de retreta,

va acabando la vixilia,

na “ritirata” d’esteta,

recuéyese la familia.

Finará la serenata

qu’anima’l más infeliz,

sobre debura la nata

pelas cais de Madrid.

Aneciará al otru día,

el mayuelu a dar la cuera

nel bronce d’Ave María,

mientres bailla la pradera.

¡Diañu de maxín!

     Hai yá más d’un mes que tuviera un suañu globalizáu: díbamos a pagar caru la falta de control en aeropuertos y fronteres. Nun diba a sirvir la cebada al rabu nin el Trankimanín. L’Alministración precisaría recetar d’urxencia l'Alarmina, arriendes de la Zarradina. El futuru pintaba abondo inciertu. Desaniciaríen el mesmu fútbol, mientres que la cabeza de Griezmann asoleyaba albentestate espetada nun estil ensin que−y valiera pa nada'l so pelo Pantene. La xente asomaba pel ventanu’l so focicu mazcaráu ya’l mieu s’aldovinaba na so mirada por culpa de la nueva andancia real. Por mor d’ella, nós deberíamos de tornar los billetes del AVE a Granada pal 80 cumpleaños del meirazu. Otra vez más se cumplieron les mios maldites previsiones. ¡Diañu de maxín!

VOI VOLVER

Volveré, volveré

a esa tierra verde, verde de verdá

y hasta esi regatu qu’equí mentaré,

me traerá alcordances de la mocedá.

Voi Volver, voi volver

onde ta mio madre de nuevu otra vez,

pueque a la so vera yo vuelva a crecer,

sintiendo na corte como’l güelu mez.

Tornaré, tornaré,

como por ensalmu voi borrar l’ausencia

y otra vez nel cuartu sele suañaré,

afayando en casa cola so presencia.

Voi tornar, voi tornar

a cantar nel horru, baillar nel corral,

a vivir yá siempre nesi’l mio llugar

y sentime asina igual qu’un coral.

Quedaré, quedaré

nesi pueblu vieyu, memoria y destín,

amás na mio llingua seique falaré

ya’l que venga nella me falará a min.

Voi quedar, voi quedar,

nel intre vecinos remanecerán

cola moza guapa que voi cortexar

y toos na contorna nos imitarán.

Sofitu a la muyer

     El mio sofitu pola igualdá de la muyer, siempres: A toles borraches, pero tamién a les astemies. A les bocayones, pero tamién a les que falen fino. A les que pueden, pero tamién a les que nun pueden. A les fees, pero tamién a les curioses. A les qu’espoxigaron apriesa, pero tamién a les que se caltienen adulces. A toles porreres, pero tamién a les que nun fumen. Magar que, a toles que llanten denuncies falses que−yos zarren aína nel cuartón.  

Control

     La casualidá quixo que, unes hores dempués de falar na cabera entrada de la necesidá de controles n’aeropuertos y fronteres dende hai cuantayá por culpa de l’andancia, sufriera yo unu, magar qu’en los torninos d’una estación de metro de Madrid. Foi’l casu que sentí marmullar a daquién per detrás de la que salía na Ponte de Vallecas ya’l tornar la cabeza decatárame de que m’amosaben una placa de policía. Yera un secreta nuevu con peñáu de moñu; yo, un paisanu col pelo curtiu canosu. Coles mesmes enseñé’l mio carné d’identidá ya entrugué que si taben amañando una redada vieyos. Aldericóme que nun esistía discriminación nenguna. Colé ablucáu y reparando en qu’entá tuvi suerte, yá qu'al nun oyer pol oyíu izquierdu nun sentí bien lu que me dicíen y si me llantaren la mano nel costazu, ensin conocer les intenciones, bien seguru que diba tirar una patada a los perendengues pa defendeme. En resultancia cavilgué que, arriendes del coronavirus, el ser mayor y tar mediu sordu tamién ye peligrosu.

Coronavirus

     Una montonera xente entama a creyer que les recetes de Tranquilmanín y de Llavalesmanesnina de caldía, ensin un remediu efeutivu, nun van valir abondo p’atayar la pandemia d’esta triba de coronavirus. Por embargo, cavilguen que, si llantaren enantes los debíos controles n’aeropuertos y fronteres, esta andancia nun s’espardiera tanto y si non que se lo entruguen a tolos qu’anden encetaos.

El desalcuentru

           

     El fíu de Severín conociera una moza mui curiosa pero, por culpa lo atuñáu que ye, llevóla na primer cita a tomar café al IKEA, yá que tien una tarxetina de veceru cola que-y sal el fervinchu de baldre. Foi’l casu que la guapina nun quixo salir más veces con él ya’l probe fíu de Severín anda tou alloriáu porque nun s’esplica la causa del so refugu.

Más burros

Manolita, Manolita,

¡vaya guapa esa pollina!,

sobro una muria s’afita,

mientres saluda a Alicina.

Ye curiosa y zalamera,

la burrina Manolita,

arriendes de ser melguera,

por asturiana, bendita

Tamién gústame Rayón,

que rebuña de contentu

cuando−y llevo pación,

qu’agradez por bon xumentu.

Mentanto con él m’afayo,

sollerte se pon alerta,

tres de la llinde’l caballu,

tres d’un somier que ye puerta.

Tres d’una puerta o ventana,

ese caballu ensin cincha,

espereza la galbana

y pa que repare, rincha.

La pollina ye asturiana,

estos dos, escurialenses,

pero ente la especie humana,

munchu más burros los censes.