Beisos p'Ánxeles

Hola hermanina, Ángeles. Welcome ya Rufina manden, d’igual miente, beisos pa ti tolas selmanas. Esta última, como ye tan servicial, ta enllenando de muxinos la faza. Eiquí t'apurro una semeya na que vas poder ver como acarreta los fíos de la postrera camada a un requexu más afayadizu col envís de nun carecer la cantariza del coru mistu del sindicatu de borrachos de la parrilla del día santu, que glayen nel terrén del vecín.  

Beisos, tamién de la nuesa parte.

Felicitación a Marga

Hai quien diz que ye una carga,

magar ye d’agradecer

otru aniversariu, Marga,

seyas d’Uviéu o d’Ayer.

Aquel que te quier lu goza,

festexa’l to cumpleaños,

anque teas en Zaragoza,

Llión o en Venta de Baños.

Asina que feliz día,

pa siempres y dende agora,

desea esta poesía

a la maestra pintora.

BULITA

Fino d’averame a casa nesta nueite de domingu, dempués de calteneme esconeutáu dende’l vienres que colara, atoupándome a encomalu cola tarrecible novedá. ¡El miou más sinceru pésame a tolos amigos de ca Sanchu! Pueque tea tou dicho, magar que me prestaría amiestar que naide marcha sacante que dexe l’olvidu en cuenta d’ello ya a bulita naide la va a esqueicer. Hai muitos años que Celestina echóu la buelga, iguando un camín d’asturianía ya cantares que tuvo’l sou aniciu, pero qu’enxamás va tener un final. Un percandial abrazu.

Hai un puebliquín en Grau

qu’esbaria l’asturianía,

como en nengún otru llau,

como en nenguna lloría.

Surde inxente de Ca Sanchu,

en Ca Sanchu surde inxente,

inxente pero da l’anchu,

bien lu sabe tola xente.

L’aniciu fora Bulita,

quien entamara’l cantar,

Xosé Antón foi la gabita,

fáennos a toos suañar.

Día a día, añu tres añu,

col repartu calabaces,

colos sones de raigañu,

col llugar onde tu naces.

Col camín de la to tierra,

esi Camín de Cantares,

per onde la vida berra

pente praos y rebollares.

Col refugu al escaezu,

qu’un día aportó Sanchín,

cola sestaferia y vezu,

aneciando con Camín.

Entrugando a la paisana,

asoleyando con Tuenda,

per toa faza asturiana,

ensin carecer la güenda.

Ca Sanchu ye la folixa,

ca Sanchu, siempres la feria,

ca Sanchu muerre de risa,

anque enxamás de llaceria.

Ca Sanchu ye Afuega’l pitu,

xeitu, tradición y más,

d’esa asturianía, un fitu,

y esi puebliquín, Ambás.

El cocodrilu'l Pisuerga

El cocodrilu’l Pisuerga

seique nun vieno del Seya,

vieno del Nilo de xuerga

y se caltién con arella

de xubir más contra’l norte

pos quier conocer Asturies

ya ansí nun finar de corte

o agazapáu tres les muries.

Avistáu per Pesqueruela

escamen del escamáu,

que s’escuende per Pucela,

ensin vese en nengún llau.

Cuenten que pue ser un cuentu

o una llondra escomunal

qu’apaez de cientu en vientu

ya enxamás nel abertal.

Al nun comer de la duerna

per esi terrén ensuchu

colará camín de Güerna

yá que nun−y fadia’l cuchu.

Asina que cualquier día,

p’aselar la so rasante,

trespandará l’autovía

o’l furacu la variante.

Lloñe de Valladolid,

pero cerca de Xixón,

esi reptil, tan feliz,

va afayase nel Nalón.

A conceyu abiertu

Dicen que muerren les cases,

digo que yo nun lu creo,

dicen que fienden les bases,

digo que yo nun lu veo.

Dicen que zarren los güeyos,

dicen que callen la boca,

dicen que marcharon dellos,

dicen que l’agua yá roca.

Dicen que come’l morgazu:

cuartos, corredor y sala,

qu’acarondiara l’angazu,

que desanició la fala.

Dicen que nel campusantu

los paisanos lloren rabies,

qu’anda espinando l’acantu,

que desdexaron les gavies.

Yo siento bien de pallabres,

mientres dicen los demás

que toi peor que les cabres,

que naide fala enxamás.

Pémeque dacuando en vez

m’escuclen pelos caminos,

tastio que la pota cuez

na casa de los vecinos.

Dicen que muerre’l llugar,

seique’l que lu diz ta muertu,

a la calor del caldar

tamos a conceyu abiertu.