Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

viernes, 18 de marzo de 2016

¡Fasta llueu, amigos!



       A vegaes pruye ún por abandonalu too; sicasí, procuro nun actuar d’esmenu pa nun marchar y dacuando en vez, de la que daqué me cafia ensembre, namái reposo unos díes al envís de nun desconeutar dafechu cola montonera d’amigos y collacios del Feisbuc a los que-yos garré gran ciñu. Foi’l casu qu'habrá dos selmanes que teo encetáu l’ordenador y seique les mesmes achiperres por culpa los virus. Yá me lu alvirtiera un paisanu de Courias que-yos acarreten dalgunes solicitúes d’amistá, magar que l’avisu llegárame un plizcu sero. Yo nun refugo nenguna, esceuto que seya publicidá o dalgo que s’abulte aínda peor. Güei mesmo recibí yá seis y aceuté toes. Davezu, yo tamién apurro dalguna a quien caltién una montonera d’amigos en comuña; por embargo, cunto que per ehí nun vien la gafura. Tamién me dixeron otros asturianistes, nun amestaos a los  enclinos que primen nesta dómina, qu'aportaron a amenazalos por defender la nuesa identidá. Agora, unos nun espublicen yá na so muria y otros lu faen baxo alcuñu, ensin afitar el so nome y los sos apellíos. Ye una verdadera pena qu’haya xente ruin que se dedique a fadiar a los demás dende la solombra. No qu'a min se refier y yá que se pasaron un par d’antivirus en delles ocasiones ensin desaniciar l’andancia, voi a esperar a ver si esto se recompón col debíu procuru per parte de cualesquier repunante y puedo siguir amosándovos dalguna pimpirulada en paz. En resultancia, despídome fasta recuperar un rispiu’l xeitu y ver como desendolca la tema. Yá sabéis que sigue gustándome lu qu’escribís, arriendes de les semeyes y lu demás que colingáis nes vueses muries, anque nun vaya a ser quien nunos díes en calcar nel vuesu deu del “me presta”


     ¡Fasta llueu, amigos! Un candial abrazu,

miércoles, 16 de marzo de 2016

LA MATA


La que toca en castellán vamos dedica-yla a La Mata, que ye una parroquia de Grau.

Llega a Grao y no remata
su visita de turismo,
quien no se acerca a La Mata,
que está ubicada allí mismo.

En pasando ese paseo
nada más cruzar el río,
en La Mata ya me veo,
en su bello caserío.

Con su iglesia milenaria
y un obispo de Santiago
 inhumado con plegaria,
San Juan bendice este pago.

Cabeza de los Miranda,
con casa consistorial,
fue acreditada esta panda,
por noble y por señorial.

Entre prados y castaños,
en un cruce de caminos,
La Mata pasa los años,
feliz, como sus vecinos.

Santo Dolfu, Entelosríos,
Llantrales, La Cai, Ribiellas,
donde surgen amoríos
con las rapazas más bellas.

Alcubiella, Campulvalle,
Rodacu y La Zurraquera,
Priotu domina el valle,
El Xorru, la primavera.

Hay un forestal vivero,
pero el humus de lombriz
y el “cuitu” del ganadero,
no perturban la nariz.

Famosa nuestra verbena,
en las fiestas de San Juan,
donde se olvida la pena
y los pesares se van.

Con una preciosa vista
y un tiempo que te aclimata,
al lado de la autopista,
te esperamos en La Mata.

domingo, 13 de marzo de 2016

PRIMAVERA


Camín del monte,
campa cimera,
alita’l pronte,
na primavera.

Sonrí yá’l sol,
nel finxu’l cielu,
ye caricol,
qu’escampla’l velu

de la ñublina,
que pinga’l prau,
valle, vallina,
ye esconxuráu.

Ensuga’l pisu,
peña y camín,
florez el nisu,
marcha’l verdín.

Siéntese’l vientu,
calla’l terrén,
sentíu y tientu,
murnia tamién.

Too espoxiga,
yá too brota,
ruxe la xiga,
tría la bota.

La mazaniella,
cuasi qu’asoma,
ergue la cuella,
medra la groma.

Ye paz y arume,
la cordelera,
pinta la cume
de primavera.

viernes, 11 de marzo de 2016

Nun me quixo una canguesa

 
Nun me quixo una académica,
cuando la solicitaba
l’amistá ensin polémica,
pos ella nun retrucaba.
 
Nun me quixo esa canguesa,
se l’apurrí l’otru día,
ye un pruyíu que nun cesa,
en cata d’asturianía.
 
Y tamién polos amigos,
esos collacios comunes,
yá nun comeré formigos
contigo’l próximu llunes.
 
¡Ai canguesina del alma!
¿Por qué déxasme de llau?,
por ello perdí la calma,
por ello toi alloriáu
 
y nun salgo de la cama,
mientres cavilo davezu,
que foi cosa de la fama,
que se te xubió al pescuezu.
 
¡Yá nun sufro más por ti!,
¡yá por ti nun sufro, non!
que yá nun te pido’l sí,
pola mala condición.
 
La mía foi refugada,
por una rancia académica,
nun me diba a enseñar nada,
ye la tema polisémica.
 
Magar quedo cola duda
de si garrara medrana
o ye namái repolluda
ya-y diera pola gana.
 
Bien de veces defendiera
a la mentada academia,
mal pagada tanta xera,
¡coya alitái de la endemia!
 
Al cabu nada vos debo,
sovenciono lu qu’escribo,
como’l banduyu que cebo,
y de la llingua nun vivo.
 
Nun me quixo una canguesa,
desanicié la pidida,
mio versu so mano besa,
el que tien meyor midida.


jueves, 10 de marzo de 2016

¿Pal fin del mundiu?


     El tiempu paez qu’anecia en dame la razón, tres d’una montonera vegaes qu’unos y otros fixaben el ramu la Variante Pichote pa una data determinada, darréu llantaba una entrada camentando que nun yeren más que troles. Agora lu atrasen pal 2017 y dempués ¿pal fin del mundiu, de la que desanicien el peaxe l’autovía como prometieron? Si fora en Madrid yá taben finaes les obres, como les de soterramientu de la mui abegosa M-30. Si fora por perres en Cataluña, igual, que si non-ys amenacen cola dixebra.

lunes, 7 de marzo de 2016

Na viesca ecuatorial


Nuna viesca ecuatorial,
ciudadana y graffitera,
alcontréme un can candial,
que s’averó a la mio vera.

Un micu mal encaráu,
que resultó mona sabia,
mermuróme dende un llau
que podía tener la rabia.

A un árbol-y entró medrana
y salió de sos raigaños,
blincando como una rana,
nun fora a carecer daños.

Seique una cogorda verde,
del plasmu punxo morada
y la clorofila pierde
polos granos encetada.

Del regatu salió un fatu
que se punxo a reburdiar,
un coríu, que ye un patu,
echó darréu a esnalar.

Llamé arré a la proteutora
de la faza l’Amazones
y toi esperando agora
que m’aporte soluciones.

Por culpa’l perru llanudu,
qu’asoleyara de xera,
espurriera bien el sudu
pa iguar esa escandalera.

miércoles, 2 de marzo de 2016

La moza d'Ayer



     La célebre “Chica d’Ayer” ta basáu nesti otru cantar que-y compunxera yo a la so ma de la que nos conociéramos nel Puertu Ventana. Si dalgunu de los que tais n’orquestes quier cantalu yá sabe que pue. Ye col mesmu son. ¡Vais dar la campanada en prau!
 

Un día cualesquier ensin saber que hora ye,
echástite a mio vera ensin saber porqué.
Los montes y la peña te vieron xorrecer
y col to xeitu llores, lu soi quien a ver.
 
Tas nel puertu Ventana, yes la moza d’Ayer,
la más guapa les flores de toa Felechosa.
dexástime amoriáu yes como una rosa,
mocina, torna a casa, que me pues perder.

La lluz de la mañana ciega ensin control
y los tos pelos roxos son rayos de sol.
Esa nueche na Mesa nos brindó un cantar
con sones de Teberga p’algamate a amar.

Toi nel Puertu Ventana, yes la moza entós
ye demasiáu sero pa salir los dos.
El mio procuru alloria diendo tres de ti.
 El mio procuru alloria diendo tres de ti…

martes, 1 de marzo de 2016

El Lipsey


        Esti foi’l primer llibru d’economía que lleí. Na facultá–y llamábemos el Lipsey. Bien seguru que se vos abulta saber el porqué. Pos andáis trabucaos, l’autor nun se llamaba asina, llamábase Richard; magar qu’apellidábase Lipsey. Entoncies, esti llibru yera de tapes dures, como a min me gustaben los llibros; sicasí, nun me prestaba munchu lu qu’amosaba dientro que se refería a la descripción y esplicación de los asuntos económicos. Foi’l casu que yo fixera'l bachiller cimeru y el COU peles tardes yá que taba a un tiempu trabayando. De tala miente entamara esa carrera y, como nel trabayu siempres me pidía dineru emprestáu xente que ganaba más que yo, pos me decatara que’l Lipsey nun me diba a enseñar un res de microeconomía y que la macro y el corporativismu me quedaben lloñe. Por embargu, daquella'l deprender sirvía pa dalgo, anque agora seique nun val más que pa colar fuera. Ye verdá que dalgún que tenga varies carreres y ande mui preparáu pue algamar a ser un esclavu de postín, esceuto si tas nel interior de les puertes xiratories o yeres xente guapo qu’entós vas ser direutamente un personaxe. Ye por ello qu’equí n’España a los probes nun-yos paga la pena estudiar yá que les salíes de delles carreres son les mesmes que les d’entrada. Por mor d’ello, escurro que deberíen alvertir y nun engañar a esos mozos col envís de que nun pierdan el tiempu y nun gasten más en tases. Amás, la mayor parte los llibros yá nin siquier afiten tapes dures.