El Lipsey

        Esti foi’l primer llibru d’economía que lleí. Na facultá–y llamábemos el Lipsey. Bien seguru que se vos abulta saber el porqué. Pos andáis trabucaos, l’autor nun se llamaba asina, llamábase Richard; magar qu’apellidábase Lipsey. Entoncies, esti llibru yera de tapes dures, como a min me gustaben los llibros; sicasí, nun me prestaba munchu lu qu’amosaba dientro que se refería a la descripción y esplicación de los asuntos económicos. Foi’l casu que yo fixera'l bachiller cimeru y el COU peles tardes yá que taba a un tiempu trabayando. De tala miente entamara esa carrera y, como nel trabayu siempres me pidía dineru emprestáu xente que ganaba más que yo, pos me decatara que’l Lipsey nun me diba a enseñar un res de microeconomía y que la macro y el corporativismu me quedaben lloñe. Por embargu, daquella'l deprender sirvía pa dalgo, anque agora seique nun val más que pa colar fuera. Ye verdá que dalgún que tenga varies carreres y ande mui preparáu pue algamar a ser un esclavu de postín, esceuto si tas nel interior de les puertes xiratories o yeres xente guapo qu’entós vas ser direutamente un personaxe. Ye por ello qu’equí n’España a los probes nun-yos paga la pena estudiar yá que les salíes de delles carreres son les mesmes que les d’entrada. Por mor d’ello, escurro que deberíen alvertir y nun engañar a esos mozos col envís de que nun pierdan el tiempu y nun gasten más en tases. Amás, la mayor parte los llibros yá nin siquier afiten tapes dures.