Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

viernes, 30 de octubre de 2015

¡Qué viva Grao!

 
(cuasi qu'ensin consumu: 1 m3/ 50,33 E)
 
Te vienden l'agua del ríu
a preciu agua oxixenada,
pagaron el puteríu,
pero nun devuelven nada.
 

jueves, 29 de octubre de 2015

Al AYUNTAMIENTU D'UVIÉU



AL AYUNTAMIENTU D’UVIÉU:  

                                                    Por mor de les caberes declaraciones de Miliu Alarcos (fíu) escontra la llingua asturiana, -ys encamiento a que camuden el nome de la cai Miliu (Emilio) Alarcos d’esa capital pol de Fernán Coronas (Padre Galo) que la defendió fasta la so muerte.



GÜEI:
 
         Un poema n'asturianu indigna a la familia Alarcos 

        El fíu del llingüista califica de “deshonra” a la memoria del so padre que se lleera una poesía n'asturianu mientres la presentación d'una antoloxía de la so cátedra.
 

AYERI: 

           L'Academia de la Llingua declaró'l 23 de mayu de 1988 a Miliu Alarcos persona non prestosa, pola so posición al aviesu de la normalización del bable, cuando años atrás la defendía. El fechu asocedió 24 hores dempués de qu'Alarcos refugara dirixir una tesis n'asturianu iguada pol académicu de la Llingua Ramón d'Andrés.


                                                                                                          
A 29 d'ochobre de 2015
                                                                                                   Xosé Rodríguez Pérez (Pindesierra)
 

 

martes, 27 de octubre de 2015

Cafrune

 
Nel camín a Yapeyú,
un mal día de febreru,
ellí fuisti a valtar tu,
Xurde, Turcu, compañeru.
 
¿Quién rentó la carroceta?,
¿quién-y propunxo truñar?,
¿quién la faza Tigre enceta?,
¿quién te mandara callar?
 
Foi mal añu pal degorriu,
esi del setenta y ocho,
fuesti gauchu, fuisti engorriu
y, a lo cabero, “sancocho”.
 
Celebrando a San Martín,
nel segundu centenariu,
lu algamares de vecín,
por culpa dalgún sectariu.
 
Más vencisti esi “socaire”,
nun-ys valiera la trampa,
pos te caltienes nel aire,
en monte, n’estrada y pampa.
 
Yes zamba, yes chacarera,
yes milonga y yes copla,
yes cantar de primavera
y yes el vientu que sopla.
 
Yo vi cantar esi vientu,
“serenatero del arenal”
encoplando col llamentu
pol so “payador” candial.
 
 

domingo, 25 de octubre de 2015

PADURA

                                                              (Padura, apuráu, enantes del premiu).
     L’escritor cubanu de noveles policiaques, Leonardo Padura, amigu de l’alcaldesa d’Avilés, agraciáu colos 50.000 euros del Princesina d’Asturies de les Lletres d’esti vienres.
               
Cobrara’l premiu Padura,
qu’encamentó n’Avilés:
“Deprendi cola llectura”,
y coló mar a traviés.
 
Cuartos, diploma y amén
d’una insinia y la escultura.
¡Llamáime l’añu que vien!,
glayó nel Ranón, Padura.
 
Ensin paecer caradura
—ye que’l dineru eso tien—,
cuando llaméis a Padura,
avisáime a min también.
 






































































































































































































































































 
 
                                  
 
 

 

 
 
 
 


 
 

viernes, 23 de octubre de 2015

Les tres oveyines (cantar pa neños)

(Semeya de Desi)

Una, dos y tres,
oveyines, madre,
baxo l’arbolé,
y un perrín que lladre,
una, dos y tres.

Nenguna na rama,
toes nel so pie,
toes nel so pie,
toes nel so pie,
onde faen la cama.

Dába-ys bien d’aire,
ximelgábense,
ximelgábense,
ximelgábense,
dolcena del flaire

que cayera en prau,
de trece mazanes,
cuasi qu’un cestáu,
de trece mazanes,
sobro esi segáu.

Nenguna oveyina
papara nin res,
papara nin res,
papara nin res,
¡blina, blina, blina!

Equí na semeya,
miren ablucaes,
miren ablucaes,
miren ablucaes,
duru ser oveya

baxo un arbolé,
una, dos y tres,
y un perrín que lladre,
una, dos y tres,
baxo un arbolé.

Pañó les mazanes,
la bona muyer,
como podéis ver,
la bona muyer,
quedaron con ganes

tres de l’alambrera,
una, dos y tres,
nel árbol, nel pie,
una, dos y tres,
tando a la so vera.

miércoles, 21 de octubre de 2015

Al retrotéu...


Canibalismu e involución na enseñanza.

viernes, 16 de octubre de 2015

¡NORABONA A TOLOS ASTURFALANTES, YÁ SOMOS DIGNOS!

La Xunta Xeneral aprueba un plan de dignificación de la llingua asturiana (16.10.2015).


¡NORABONA A TOLOS ASTURFALANTES, YÁ SOMOS DIGNOS! 

     Al marxe de la chancia, nun ye que la tema seya la oficialidá, pero d’entamu la novedá nun pinta mal. A los que prefieren que los fíos depriendan l’inglés que sepan que la conocencia de varies llingües apurre facilidá nel so aprendizaxe. Amuesa y exemplu a un tiempu foi’l Padre Galo, que sabía una montonera llingües ya-y prestaba la suya sobre manera, na que falaba y escribía con gran ciñu. A los repunantes, a dellos coreanos y a los renegaos de siempres se-yos pide un migayu de procuru y que dexen de reburdiar escontra un derechu. D’otra miente y al aviesu, la llingua nun tien color, asina qu’un respetu pa tolos falantes seyan de drecha o de manzorga col envís d’emprincipiar a llevanos toos a xeitu.




 

jueves, 15 de octubre de 2015

Orbayu


Nun me llaméis aburríu,
porque me preste l’orbayu,
porque me guste’l soníu,
al chaplotiar nel escayu.

Porque’l día pinta gris,
porque baña la lloría,
y l'enoyu aruma anís
y asela aselando’l día.

Porque abellugues na casa
y cuques tres del cristal,
porque la paisana amasa,
porque verdia’l xarazal.

Porque medra ríu y regatu,
porque enrieda’l Ventolín,
porque guarez el más fatu,
el más faltosu y más ruin.

Porque cubre la vallina,
esa bendita humedá,
con que medra la verdina
y l’amor de mocedá.

Porque aliten toles flores
y espoxiga la pación,
porque recarguen les ñores
y el molín entra n’aición.

Porque lu aporten les viesques,
nun ciclu de la natura,
porque fina coles yesques,
si la mesma viesca ambura.

Si enceta’l metal pesáu,
adiós ríos, adiós fontes,
como en Boinás, too furáu,
adiós prau, orbayu y montes.

Pol raigañu d’esta Tierra
que nun quier morrer ensucha,
magar que naide quier guerra,
defende lo nueso y llucha.

lunes, 12 de octubre de 2015

Al rodiu de la cabera entrada



      Paez que nes alcordances taraminguen invisibles imanes que nos atrayen o gabitos de tala mena de los qu’enxamás dexamos de colingar; quiciabes, por culpa d’ello, nos gusta somorguiar nelles. Sicasí, abúltaseme que namái d'aquelles que son talamente melgueres o prestoses. Ta perclaru que como nun lu van ser les del entamu’l cortexu y les de los cantares d’esa mesma dómina que yá nun van tornar nunca; por embargo, que nos quiten lu baillao y la maxa del suañu. 
 
     A manzorga o enriba, Mar, podéis ver el Cosmo que comenté que yera mío y que, como soi como Eduardo Tologuardo, aínda caltengo arrequexao pola muyer. A la drecha o perbaxo, Rosa, una cadena de la mesma marca (Philips) que’l tuyu  que merqué dempués de que trescurriera una montonera d’años y  a la qu’agora malapenes-y mando nada. Asina somos los humanos, allampamos una cosa y cuando yá la tenemos vamos perdiendo pasu a pasu la ilusión por ella. Seique gran parte de culpa la tienen aquellos que nos dirixen dende la solombra o dende l’antoxana de la Puerta’l Sol; magar qu’esa nun ye esplicación abonda pa claudicar y mercar la novedá que sustitúi y fai escaecer lu qu’entá furrula.


sábado, 10 de octubre de 2015

Reuniones



     Enantes de que l’asuntu tuviera tan lliberáu y por culpa de qu’en Madrid nun hai praos pa dir de fiesta, equí los mozos allá pelos años 60 y 70 del pasáu sieglu armábemos xuntes, lu que-y dicíen “reuniones”. La folixa solía iguase en casa’l collaciu que tuviera la sala más grande o que dispunxera d’un llocal y la música l’aportaba lu que-y llamaben un “pick-up” —tocadiscos, pa los que nun tais preparaos—. Nin que dicir tien que como daquella nun furrulaba’l “after heures” teníamos que tornar ceo a casa. Axuntábemos una montonera amigos desaveraos y los mozos siempres baillaben coles moces [sic]. Alternábemos la pareya, esceuto cuando dalgunu se saltaba les regles y se caltenía cola más curiosa. Yo, como yera abondo llegal, dacuando en vez finaba baillando cola más fea. D’igual mena, con una que la so parentela tenía una de les caberes llecheríes de Madrid y que nun sé porque coime golía a cuayu. Tamién, ente les más refugaes, había una gordina fía d’un comerciante d’ultramarinos, pero esa nun vos sabría bien dicir a que golía ante la bayura d’especies qu’ufiertaben a la venda.



jueves, 8 de octubre de 2015

Gas cuchano


Hunosa desarrolla un programa piloto para transformar el cuchu en energía

La empresa minera utiliza una novedosa tecnología para aprovechar el gas que desprende el estiércol cuando se descompone en las granjas

LNE: Güei, 08.10.2015 


Esti asuntu de los gases,
hai tiempu que se sabía,
carecíu en bien de cases
y naide lu aprovecía.

Con un proyeutu d’Hunosa,
nos lu amuesen güei col cuchu,
como’l que nun quier la cosa,
pueque con dalgún serruchu.

Asina colos purines
de rabón o de rabil,
van tar toes calentines,
ente arumes de cubil.

Yá nun val el to Aero-red
nin la so Simeticona,
¿de banduyu, pesadez?
¡Güei andes de norabona!

Norina yá lu refuga:
“yá teo abondo col home
y la so aneciante fuga,
por culpa tantu que come”.

Siempres caleció la corte,
pero golió mal la repla,
con esti inventu del norte,
van siguir dando a la pepla.

Amás, esti gas cuchanu,
nun se venderá en bombones,
al ser cuchu de paisanu,
va presentase en macones.

miércoles, 7 de octubre de 2015

Tol mundiu lu sabe




     Tol mundiu sabe que’l que nun llora nun mama. Tamién, que’l que mama ye un mamíferu. Pos agora resulta qu’un ratu, que tamién zuca, dicen que ye un páxaru.

     Tol mundiu sabe que naide da duros a peseta. Tamién, que lu que xube, baxa; como la bolsa. Pos agora resulta qu’en plenu sieglu XXI hai xente que diz que nun lu sabía.

     Tol mundiu conoz que si prosperen les denuncies del porteru y de los otros afeutaos, ente los bancos, les caxes d’aforros, los ricos, los políticos y los de siempres,  los que van pagar el patu.

martes, 6 de octubre de 2015

Los coríos

https://www.facebook.com/marisol.feitocano.1/videos/1632678936982853/?pnref=story

Afáyense en nuesos ríos,
enrieden cola so triba,
son los melgueros coríos,
que xuben corriente arriba.
 
Son l’allegría los neños,
nunca dexen de gaznir,
¿que nun los ves nin en sueños?,
pos a Grau tienes dir.
 
Son unos vecinos más,
son coríos y moscones,
si pel so paséu vas,
vas cucalos a montones.
 
Dalgunos-ys llamen patos,
tamién val patu mabea,
llamen asina a los fatos,
seique más d’un se cabrea.
 
Los qu’aporten nesti videu
pente la solombra y sol,
gasten un plumaxe nidiu
y amuesa-yos Marisol.
 


domingo, 4 de octubre de 2015

Otra llaceria


     Hai unos años que sacáramos a Elidiu, el so pá, de perbaxo’l so taxi. Nada valiera entós el que yo tuviera más de media hora aplicándo-y RCP (reanimación cardiupulmonar), el mio vecín tenía l’arca estrapallada. Güei, mui ceo, el so fíu Serxu de 19 años, finara malfiríu al topetar con otro vehículu escontra un árbol; el collaciu que conducía, de la mesma edá, morrió nel accidente. La novedá dexóme alloriáu dafechu. Serxu acolumbrara en so día la llaceria del so pá y aportara a la mio vera glayando al altu la lleva pa que-y echara un gabitu. Serxu enxamás se recuperara d’aquello. Agora, los bomberos tuvieron qu’escarcela-y de dientro otru coche. El paxarón de fierro nada pudo facer d’aquella; güei llevóse a Serxu entubáu y mui grave. Oxalá qu’alite; sicasí, pinta mal el casu.

jueves, 1 de octubre de 2015

Fadia'l FADE


     El presidente del FADE cree que Asturias es una «privilegiada» en materia de infraestructuras.

    Tenemos una Variante Payares pesllada, magar que bien privilexada; una autovía a La Espina escaecida, pero tamién mui privilexada, amás de dos peaxes talamente privilexaos pal bolsu pa trespandar a Madrid. Sicasí, nun somos quien a aldericar escontra les privilexaes infraestructures na nuesa propia llingua por culpa que ta bramente privilexada con respeutu a les demás del Estáu, que nun gocien de los nuesos privilexos.