Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

viernes, 31 de marzo de 2017

Fomentu enmienda (otra vegada).

(LNE)

     Fomentu enmienda y camudará les víes de la Variante a anchor internacional, previendo agora'l ramu’l pal fin del mundiu. ¡Norabona a los catalanes que van papar otros 4200 millones más pa que nun dixebren! A los vieyos–yos van siguir retayando tolos años porque son unos benditos y nun glayan. Talamente, como Asturies y la so llingua, nun esisten.

¡VOTÁI’L DÍA 2!



    Bon fin de selmana, amigos, y nun escaezáis votar a Lenín el domingu qu’entra o sinón a Lasso. Abúltaseme que la mayor parte de la xente del mio distritu asina lu fairá. Al enfotu de que tamién se presenten nesta nueva España pa les próximes eleiciones: ¡sofitemos a Lenín ya Lasso!

martes, 28 de marzo de 2017

Hernández, a los mios deleres


Al pasar pela to puerta,
la tarde vieno a folgar
cola guapura despierta
que se remonta a finar.

La to puerta nun tien casa,
la mio cai sí tien camín,
per onde la tarde pasa
como l’agua ensin destín.

Tien la to puerta una llave,
seique pa toos rechina.
La tarde d’esnalar sabe
y vuela cola andolina.

Matos na to puerta crecen
de malapenes pisada.
Que toles coses carecen
sobre la tarde amburada.

La piel d’esa puerta, ¿abluga
mal xergón onde cayer?
La tarde en tiempu d’ensuga
refúgalu pa morrer.

Apinó d’atapeceres
una tarde azul d'abierta,
ellí te quixi daveres,
mas nun tabes na to puerta.

Ye una puerta ensin ventana
que torga la mio pallabra.
Tarde, melguera y galana,
d’amor, la quintana llabra.

Y la tarde azul trescala
la to puerta gris rensía.
Lluciendo estrelles de gala,
la nueche despide al día.

lunes, 27 de marzo de 2017

Colara Taresa...


     Colara Taresa mui bien lloñe del so barriu del Estrechu y los Cuatro Caminos frayando’l mio caberu venceyu qu’aínda me xunía a la barriada. Taresa foi la última amiga de mamina qu’entá se caltenía espierta. Vivió na cai Lérida a la escontra de Tresportes Amago, los que nos apurrieren los paquetes y les pataques d’Asturies una montonera d’años; sicasí, hai tiempu qu’ingresara nun asilu nel que la visité dalguna vegada. D’otra miente, naide m’avisara de la so marcha. Total, ¿pa qué? ¿Pa day el pésame a les sos sobrines, a les que nun vía dende’l mio casoriu hai yá 37 años y que se m’abulta que seyos xubieron los fumos? Taresa tenía una sola y perguapa fía que morrió con 13 años al pocu d’amuesay la mio coleición de discos d’aquella dómina de los 60 y del ramu del aciar hospital de La Paz. Finó ellí por culpa d’una peritonitis que nun fueron a atayar los mélicos y la so madre siempres s’acompañaba de les sos alcordances, llárimes, murnia, semeyes ya un bustu qu’encargara pol quey cobraron una burricada. Güei, la so antigua casa de la cai Lérida se conserva arguta, impasible, fría y rancia. Nun sé si Taresa tornará agora a ver a la so fía, pero me prestaría sobre manera. Si asina fora: ¡Da un chuchín a Maite, un abrazón a la mio ma y que’l sitiu onde ablugues te resulte afayadizu, Taresa!

viernes, 24 de marzo de 2017

La señora Vale



     La señora Vale yera la portera y a la que más se sentía en tol edificiu. Yera d’un pueblu de Guadalaxara, cantaba davezu, tenía un vasal con munchos caciplos, ponía'l Cola Cao bien cargáu y gastaba chuzu de defensa. Dacuando en vez s’amarraba con una vecina conflictiva y teníamos xuiciu tola casa, por culpa que llamaben a toles muyeres pa testificar. Entrugaba por cuantos en vez de por quien enantes d’abrir la so puerta, yá que na so vivienda que furrulaba a manera de guardería axuntábense abondos collacios de los sos dos fíos. Coleicionaba cupones pa dir al cine de baldre y cuando atropaba abondos nos allegábemos una montonera guah.es. Na so sala, xugábemos a les cartes o a la pesca’l llinguáu, ríamos les sos ocurrencies y deprendíamos los sos cantares. De la que marché a correla cuando’l mio casoriu, hai yá media vida, la señora Vale colara aínda más lloñe y yá nun volví a saber más nada d’ella.

jueves, 23 de marzo de 2017

Da–y la vuelta PP, da–y la vuelta…

http://blogs.elcomercio.es/desde-el-bajo-narcea/2017/03/23/cherines-frente-al-asturiano/

Voi guardando les miseries
nos mios bolsos furacaos,
alcordances de les feries,
versos pa los allegaos.

Atropando refugayes,
qu’escuclarás pente ciscu,
mandamientos pa que calles,
ensuchos como tariscu.

Acarretando esi escombru,
marafundiando la vida,
cargando la carga al hombru,
ensin una mala xida.

Compongo pente llaceria,
alloriando col alloriu,
aforfugando na güeria,
robrizu por culpa’l soriu.

Salvando y pasando fueyes,
como pases la pasera,
como xiren les toruelles,
esmoreciendo na xera.

Una xera ensin futuru,
na llingua que nun esiste,
desaniciando’l procuru,
esbariando en murnia triste.

Páxines que lleva’l vientu,
qu’aventen dellos paisanos,
qu’aticen el mio llamentu
y gobiernen tan ufanos.

Sofita la to cultura,
alderica a la que manda,
seyas del PP o cura,
que marche d’escorribanda.

miércoles, 22 de marzo de 2017

Metáfora

    
     Merqué una biografía de María Xosefa Canellada de segunda mano que se m’abultara bien baratina. Foi’l casu que, de la que llegué a casa y punxi les gafes, decatárame qu’esi llibru asoleyara de la Conseyería d'Educación, conmemorando’l Día del Llibru Asturianu, aínda a menor costu: talamente, de baldre. Ello me fixera cavilgar en la ruina qu’acarretamos dalgunos asitiaos siempres n’alluendi fasta nos más menudos detalles, al tresformar la realidá en metáfora y la propia metáfora de nueso na triste realidá.

sábado, 18 de marzo de 2017

Fueyes del árbol cayíes

    
     Pa los repunantes qu’espeten que l'asturianu nun espurre, vamos adautar a los nuesos deleres y como nos peta a Espronceda o, si cuadra, a cualesquier poeta del mundiu mundial de cualquier dómina…


Blanca nube de l'aurora,
tiñida d'ópalu y grana,
naciente lluz de dolora,
 rescamplante precursora
de la cándida mañana.

Mas ¡ai! nun tris estenó
la pureza virxinal,
l’encantu l'aire llevó
como'l ventanu ideal
que l'amor te prometió.
Fueyes del árbol cayíes
trebeyos del vientu son:
les ilusiones perdíes
son fueyes ¡ai! desprendíes
del árbol del corazón.
¡Corazón ensin amor!
Murniu l'andurbial cubiertu
cola llava del dolor,
 escuru inmensu desiertu
 au nun naz nin coliflor.
Distante’l verde espolleta,
el sol valtando na mar,
si na sablera un pelgar,
nun mui lloñe una goleta
vientu en popa a saliar;
ópticu vidriu presenta
en fantástica ilusión,
y al güeyu encantáu contenta
guapes visiones, qu'aumenta
rica la imaxinación.
Tu yes, muyer, la so sal
tresparente fermosura:
¡ai de ti! si pol to mal
ruempe l'home na llocura
el misteriosu cristal.
Mas ¡ai! falaguera, Alvira,
na to mesma desventura,
qu'entá afalagos procura
cuando'l to entamu sospira,
la misteriosa llocura:
que la razón ye tormentu,
y más te val esbariar
sin xuiciu, que'l sentimientu
sabiamente analizar,
pa nun comer un pimientu.

jueves, 16 de marzo de 2017

Resolana



Güei colingáralu Lita,
el videu de Resolana,
dende aquella tierra hermana;
darréu’l mio versu afita

la mio versión que pa ella
y empobino n’asturianu
al so requexu llonxanu:
¡Ye pa ti, Lita Trapiella!

RESOLANA

Perdón, te digo adiós,
si perdones nun vas a escaecer,
del amor d’ente los dos,
el rescaldu nun se pue perder.

Como nata sobre la debura,
si marches mañana,
t’afayes con él
y te quede de min la tenrura,
como resolana,
perbaxo la piel.

Frayóse ente los dos,
l'allegría del suañu d'amar,
l’envís amuesa entós,
de que pueda volver a entamar.

Naide ye a inventar lu qu’ambura,
nun me guardes rensía,
 despidise ye cruel,
que te quede de min la tenrura,
resolana d'un día,
debaxo la piel.

Si acaso esi amor renaz,
vuelve a cantar la vida,
torna la fe perdida,
va a tener sentíu en paz.

Que caltengas de min la tenrura,
como resolana,
perbaxo la piel.

Trescalada de min la tenrura,
de tarde o mañana,
magar teas con él.

miércoles, 15 de marzo de 2017

Cuadonga

   
   Siempres sentí dicir que la historia la escriben los vencedores. A min, me toco deprender una historia na otra dómina, d’igual miente qu’al mio pá–y pañaron les sos perres; sicasí, ¿tolos historiadores d’enantes yeren unos troleros? Al respeutive de la cabera entrada del Feisbuc, yá llanté un comentariu de Sánchez Albornoz que nun yera talamente del Réxime. La batalla o engarradiella de Cuadonga, mayor o menor, esistió magar quien pese y, porque–y dea pola gana a un solo historiador, nun la va a desaniciar. ¿O ye que tien más razón el qu’opina l’últimu?, ¿o ye que namái nos val la historia que nos convién?, ¿o ye que Corral aporta más documentación que los otros?, ¿o hai daqué más y les nueses muyeres van tener tamién que dir preparando'l sayu? Si acaso, vamos tener un detalle con él y amestaremos a Alifonso III l’alcuñu que-y atribúi de “inventor”. En resultancia, aneciamos colos versos…

Sin dinastía asturiana,
pos nun-y da pola gana,
nun vayáis más a Cuadonga,
que se lleva más la conga.

¿Y la batalla de Lutos,
foi una folixa de brutos?
Fonsu III, a tenor,
foi Alifonso l’Inventor.

Díxolu Corral
y puntu final.


lunes, 13 de marzo de 2017

D'amor y desamor



Nel 20, hai unos díes:

“He vivido un año muy difícil y todo lo cuento en el libro”.
Su primera incursión en la poesía está protagonizada por el amor y el desamor.


Col amor ya’l desamor,
col mueyu y la salsa rosa,
yá me fiede a coliflor,
yá cansa abondo la cosa.

Sabelaweis amenaza,
ye un asuntu orixinal,
casi naide metió baza,
casi naide sufrió’l mal.

Va a sorprender a la xente,
un gran tema pa tratar,
pa nada ye reincidente,
como'l mar del calamar.

Voi a pol llibru corriendo,
a lleer la so esperiencia,
que d’amor yo toi morriendo,
m’alitara esa sabencia.

domingo, 12 de marzo de 2017

Llaceria y desaniciu


L'agua apanga la llucha contra'l fueu nes 254 quemes rexistraes n'Asturies...
(Semeya, LNE)

     Non, nun lu van dexar. De la qu’entama la seca, prenden y van aneciar n’atizar cuando’l Nuberu nun agabite. Los intereses creaos, la falta de denuncies –Nun dar parte faite cómpliz– ya unes lleis blandes pa cola materia procuren la llaceria. Nadayos importa’l dañu que faen a terceros, nin qu’ardan les tierres, los rollos de yerba o la casa’l vecín. Nadayos importa que millones de seres, animales o vexetales de toa triba, amburen vivos. L’home ye’l ser más cruel, egoísta y desalmáu qu’esiste, a pesar de que dellosy atribuyan la esistencia d’un alma que más mereceríen otres criatures menos sangrines.

     Sí, el Paraísu Natural amorrenta por culpa d’una minoría que nun respeta nada: l’aire aforfuga, l’agua enceta, la viesca sume, el terrén envelena ya estos manguanes aporfien en mancar ya en nun mirar nin pal futuru de los sos propios fíos. Si, por culpa dalgunos, vamos toos camín del desaniciu.

viernes, 10 de marzo de 2017

La moza caritatible

     
     La moza caritatible diera una moneda, una sorrisa ya un bon exemplu a un home foriatu qu’andaba pidiendo na puerta d’una cafetería. Arriendes, abriera una bolsa de papel con bollos que mercara dientro ya ufiertóy ún, que garró de secute. La moza caritatible colara per delantre min y paró a falar con una guah.a roxa, que colingaba una máquina de fotos del pescuezu, na plaza d’Ilesia. La moza caritatible m’adelantó de la que m’allegaba al andén del metro por aciu de que baxara nel ascensor. La moza caritatible asentárase na filera d’asientos d’escontra cola so mesma sorrisa. La moza caritatible apeárase en Sol por culpa de que yera talamente eso. 

jueves, 9 de marzo de 2017

Educación



Güei, manifestáronse pola tema de la educación y m’alcordé d’otra dómina.

    En Madrid, na Seición B d’Económiques venceyada a la Universidá Complutense, turnu de tarde, allá pel  añu 1972 cuando pagaben tases fasta los foriatos…

     Yo, dempués de xintar y trabayar 7 hores, acarretando la mio apnea del sueñu, m’allegaba con abondo más d’esti qu’un llirón caretu. Bien d’alumnos s’averaben nel so propiu coche y nun s’ocupaben de nenguna otra xera, yo tenía que cruciar la capital en metru y nuna llinia d’autobús. Un día cualesquiera mandan suspender les clases. Na nuesa, s’asoceden los alderiques ya entrugues d’unos ya otros al envís de decidir: “Güei tenemos que parar porque programáronse  paros”, “¿pero los paros nun son pa la Complutense namái?”, “ye que nós somos de la Complutense”, "¿vinieron los caderalgos?", “sí, tan esperando a ver que faemos”, “¿daquién sabe por qué vamos facer fuelga?”, “seique va venir ún de la Complutense pa nos lu desplicar”, “¿nun dicíais que somos de la Complutense?”… Enantes de que viniera’l señor X del muérganu principal, garré los trastos, colé y nun torné más per ellí…

Acaso si la rempuesta,
non sólo n’educación,
ye peor que la propuesta,
nun s’aporta solución.

lunes, 6 de marzo de 2017

El tranvía


     Al mio pá que tuviera que colar de L.lugarnes (Sierra) por nun ser meirazu, que foi inspeutor de tranvíes en Madrid y que tuvo un fíu que llantaba chaples na vía pa qu’achaplaren.

Tantán de tantarantán,
 tantarantán del tranvía,
tracalexa tarambán,
tracamundiando la vía.

Salióse’l trole del cable,
del cable salióse’l trole,
saliérase que ye en bable,
que nos lu van dar nel cole.

El conductor pisa’l frenu,
un frenu que ye de barra,
cuando ta’l tranvía llenu
y tol mundiu va de farra.

Mecen los mozos y moces,
tola mocedá pal pisu,
la mocedá dando voces,
l’inspeutor nun diera avisu.

Ellí sal el guardaguyes
cola cachaba de fierro,
por saber que fai, tu pruyes,
la estopa entemez col cerru.

Nel carril punxera un neñu,
punxera un neñu una chapla,
magar corriera bisueñu,
qu'a pocu arrinca-y la ñapla.

Ye pal cabu de la cuerda,
ye pa la punta’l cordel,
del peón naide s’acuerda,
anque entá lu bailla él.

El tranvía calca y cola,
hai un guah.e nel estribu,
que tantarantea, diola,
pero aínda sigue vivu.

Al son del tantarantán,
al son del tantaranteru,
los vieyos vienen y van,
ya asina aforren dineru.

viernes, 3 de marzo de 2017

jueves, 2 de marzo de 2017

Semeyes


     Les fotos son espeyos onde nos reflexamos nel pasáu. Alcordances d’un tiempu que foi y que tuviéramos la suerte de vivir. Un diploma por siguir entá vivos. Cuando les semeyes son de la nuesa familia o’l nuesu pueblu, garren un especial significáu: los parientes anecien en sonrir ya agabítannos pa siguir p’alantre y los edificios aporfien en caltenese argutos anque valtaren, como denunciando la fechoría del que mandó esbarrumbalos, talamente como l'afamáu casinu de Grau. Falando de Grau, de la so xente, de los so comercios y feries, mientres que trescurriera too un sieglu, que meyor pa repasar la so historia qu’esti maraviyosu llibru que nos ufierta’l nuesu amigu José Luis Areces Sánchez.