Colara Taresa mui bien lloñe del so barriu
del Estrechu y los Cuatro Caminos frayando’l mio caberu venceyu qu’aínda me
xunía a la barriada. Taresa foi la última amiga de mamina qu’entá se caltenía
espierta. Vivió na cai Lérida a la escontra de Tresportes Amago, los que nos apurrieren
los paquetes y les pataques d’Asturies una montonera d’años; sicasí, hai tiempu
qu’ingresara nun asilu nel que la visité dalguna vegada. D’otra miente, naide
m’avisara de la so marcha. Total, ¿pa qué? ¿Pa da–y el pésame a les sos sobrines, a les que nun vía
dende’l mio casoriu hai yá 37 años y que se m’abulta que se–yos xubieron los fumos? Taresa tenía una sola y
perguapa fía que morrió con 13 años al pocu d’amuesa–y la mio coleición de discos d’aquella dómina de los
60 y del ramu del aciar hospital de La Paz. Finó ellí por culpa d’una
peritonitis que nun fueron a atayar los mélicos y la so madre siempres
s’acompañaba de les sos alcordances, llárimes, murnia, semeyes ya un bustu
qu’encargara pol que–y
cobraron una burricada. Güei, la so antigua casa de la cai Lérida se conserva
arguta, impasible, fría y rancia. Nun sé si Taresa tornará agora a ver a la so
fía, pero me prestaría sobre manera. Si asina fora: ¡Da un chuchín a Maite, un
abrazón a la mio ma y que’l sitiu onde ablugues te resulte afayadizu, Taresa!
No hay comentarios:
Publicar un comentario