Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

jueves, 28 de junio de 2018

Esclavos


Si te faen perder la calma
y nun yes a dar asuelu,
los enemigos del alma
van torgate dir al cielu.

¿Será verdá?, ¿será trola?,
enantes yera bien ciertu,
güei te dicen que ye bola,
la tema a conceyu abiertu.

Entós too yera pecáu
y güei nin siquiera falta,
o tabes mui atrasáu
o agora tol mundiu valta.

Nun hai bonaventuraos
nin pecaos capitales,
hai más lladronos qu’honraos,
nun condenen los mortales.

De resultes, nada pasa,
si baleren el fardel
o t'ocupen la to casa.
Toma un fervinchu de sel

que l’otru nun va purgar,
nin va dir al purgatoriu,
ni a la cárcel del llugar,
nin va carecer alloriu.

Daquella, la cosa cierta
somorguiada ente’l fustaxe–,
dexabes la puerta abierta,
ayén al llibertinaxe.

Estremando nos estremos,
cabruñando pelos cabos,
enxamás aselaremos
y vamos siguir esclavos.

lunes, 25 de junio de 2018

Anónimu


En cualquier día anónimu d’enantes
na mio anónima vida de poeta,
entamé a escribir versos d’escoyeta,
camudando a Cabal, dende Cervantes.

Milenta poesíes, nun sé cuantes,
magar ensin la “j”, de “a” a la zeta,
pallabreru d’Asturies a la gueta,
valieron pa cafiar mil repunantes.

Anónimos, tamién, estos manguanes,
de reflundiu fociquen no qu’escribo,
si dacuando en vez lladren como canes,

de lo queys debo pásenme recibu,
si de ser a algamar quedáis con ganes,
perdonái pos n’altor ye onde vivo.

martes, 19 de junio de 2018

Nin pitos nin flautes


Da bienes Fortuna
que nun tán escritos:
chiflando a la lluna,
ayena a los pitos.

¡Qué diverses siendes
suélense siguir
nel intre al partir
honres y faciendes!
Pa unos son les pautes,
pa otros, sambenitos.
Cuando pitos, flautes,
cuando flautes, pitos.

Ansí desaposia
industria y preséu
a un ricu d’Uviéu;
y a quien se-y antoxa,
la cabra más coxa
pare dos cabritos.
Xiblái a la proxa,
con flautes y pitos.

Porque nuna aldega
un fatu mancebu
furtó solo un güevu,
prindaron la vega,
ya otru merca yates
con cien mil delitos,
nin pitos, nin flautes,
nin flautes, nin pitos.

Sonó la xiblata
a aquel que llamenta,
que nun se decata
y que nada menta.
Esi que nun cuenta
quey diba a tocar,
vive de la renta,
coló del llugar.

Da bienes destín,
al que too apuesta
y nin fai camín
nin calez la tiesta.

lunes, 18 de junio de 2018

Armóse la bolera



     ¡Mialma! Armóse la bolera ya’l discutiniu porque llegara un ferri enfarxopetáu de xente de 31 países a traviés de Libia (amás de dellos mélicos y medios de comunicación). A min nun m’estraña un res cola ufierta que se caltién de paga, ablugu, ceba, sanidá, tresporte... De resultes, dempués llegaron cuasi que dos mil persones más en 48 hores. Arriendes, paez ser que los del barcu pidíen recargar el móvil mientres echaben un pitu; dende llueu: yá nun hai probes como los d’enantes. Otru aldericaba qu’aseñardaba de los seis fíos, pueque pa que los traigan aína. Yo eso sí que nun lu garro por culpa que la mio parentela siempres miró por tener los neños que pudiera mantener; sicasí, la tema yá desendolcara munchu coles ayudes. Entrín y non, hai quien espeta que nun hai qu’escaecer qu’España aportó refuxaos pela raya Francia. ¡Carape! pero convién esclariar que diben caminando pa campes de concentración onde nun había más que pioyos y que nenguna de les 31 naciones del tresbordadoryos echó un gabitu, qu’eso tamién ye memoria histórica. Ye’l casu qu’hai que respetar la opinión de los demás, magar qu’equí remanezan cuatro millones de paisanos ensin trabayu ya anden retayando llibramientos y pensiones. D’otra miente, nun toi mui seguru de que nunyos punxeren yá una cai; lo que sí toi seguru ye de quien va pagar el coríu y de que…

Va armase la del copón
y naide será culpable;
plasmando d’esmolición,
repito'l mio avisu en bable.

sábado, 16 de junio de 2018

Sones del país


Díes de xiblata,
nueches d’Hamelín,
la muyer más fata
ye a engañame a min.

Baille de payella,
el güevu ensin frir,
llámbote la oreya
ya entames a rir.

Quien toca’l panderu,
la gaita nun toca,
sanxuanín melgueru
da arume a to boca.

Zanfoña zamploña,
tambor tamboril,
durmiera la moña
pente’l perexil.

Trompa ya acordión
a trompa talega,
crótalu en Xixón,
l’oral en maniega.

Al bau bilimbáu,
vigulín, paliyu,
tamién xirimbáu,
qu’acallenta’l grillu.

Tiempu de carraques
na calor del ascua,
pelos almanaques,
ye’l tiempu de pascua.

Magar canto a coru,
si anicia un collaciu,
entovía lloro,
cuando pierdo’l xaciu.

¡Qué guapos los sones!
sones del país,
llave pa qu’entones,
botella d’anís.

jueves, 14 de junio de 2018

Manolu



     Güei, qu’entama’l Mundial de Fútbol, teo’l gustu de presentavos a Manolu, al quey allugo amazcaráu na semeya por culpa de que nun quier asoleyar en nenguna publicación. Manolu ye'l porteru oficial del equipu de fútbol de l’área recreativa de Bolgues. Yá sé que daquién va aldericar qu'esti área nun tien nengún equipu de fútbol; sicasí, Manolu, tampoco ye un porteru profesional como los del Mundial y, amás, naide tien porqué mandar nes ilusiones de los demás. Por embargu, de la que vamos pa Bolgues, Manolu xuega col fíu, col sobrín y con tola xente nuevo que sestaferia nos partíos qu'ellí s'armen. Arriendes, amestar que Manolu ye'l porteru más vieyu del mundiu, yá que tien 76 años, y hai que lu riñir davezu pa que nun se tire a pol balón nun se vaya a mancar. Pero lo que quiero sobre manera que toos sepáis ye que Manolu, col tiempu que tien, enantes d'aniciar el partíu, recueye tola basoria qu'atopa y que tiraron pal pisu bien de gochos y l’acarreta palos contenedores. Foi'l casu que la cabera vegada que tuviéramos nel llugar la fonte taba ensucha y Manolu nin siquier pudo llavar les manes pa merendar dempués. Oxalá que’l procuru d’esti paisanu, qu’aporta dacuando en vez dende Madrid, vaiga d'exemplu a tolos que nun curien estes ayalgues que tenemos en comuña pa qu'entamen a facelu y a la Casa Conceyu de Les Regueres pa que caltenga un rispiu más curiosa esa perguapa faza.

martes, 12 de junio de 2018

El quiosqueru

     
     Téovos dicho que nun vengáis a Madrid ensin poner toles vacunes, magar que colo de la sablera San Llorienzu se m’abulta que yá nun vos van facer falta. D’igual miente, contratar dalguna triba de seguridá privada, si vos queden perres dempués de pagar les tases de les autovíes y de cualesquier radar azorronáu, porque sinón vais tener que tornar p’Asturies. Amás, contái con sofitu espiritual yá que si te roben nun vayas buscar que t’agabite dalgún bancu que va ser peor. Arriendes, nun dexái que naide se vos arime por culpa de que de naide vos podéis fiar. El mesmu quiosqueru, al quey merco la prensa dende hai una montonera d’años y que m’acuta los númberos que nun recoyí de la que salgo fuera, yá m'intentó colar tres veces dalgún númberu atrasáu ente ellos como esti que vos amueso.

lunes, 11 de junio de 2018

Dickens

http://www.rtve.es/alacarta/videos/david-copperfield/

     Con Charles Dickens voi comentar lu mesmu que dixera cuando Lorca: Nun celebro efemérides y munchu menos, cabudaños. Nun quixi retener siquier aquel repunante día nel que morrió la mio ma. Ye por ello que, de la que yá toos festexaron antayeri a Charles Dickens, voi facelu yo agora a los mios deleres. Charles foi'l más rescamplante escritor de la dómina vitoriana y nos gusta sobre manera a los cuentistes. De les sos noveles y cuentos hai mil y milenta versiones; sicasí, voi compartir una de “David Copperfield” de cuando España namái tenía una televisión y con pocu presupuestu, como aína vos decataréis. Corríen los caberos años de la década de los “60” del pasáu sieglu, tamién en blancu y ñegru como la propia obra. Había bonos y malos actores, como agora. Nun podíes falar de delles coses, como agora. Había xente que medró a costa d’otros, como agora, y nun se retayaba a los vieyos y a los paisanos mientres se mantenía de baldre a una montonera foriatos aneciando col reclamu, nun como agora. 

domingo, 10 de junio de 2018

La Graciosa


     
    Tornaron al so orixe y paez que foi ayeri… Dempués d’una montonera d’años viviendo nesa urbanización madrilaña a la vera nós, colaron camín del puertu d'Huelva colos sos dos perros, un fardel d’ilusiones y delles caxes d’aperios y ropa que mal afayaben nel ruin sitiu qu’espurría del pequeñu coche. Nél marcharon colo que rescataron del pasáu, tol so presente y los nuevos proyeutos de futuru. El barcu partiera dende Cádiz, pero a Gigi nuny debió prestar un res día y mediu zarráu nel tresportín yá que morrió darréu. En resultancia, La Graciosa dexó de selu tantu; sicasí, tres más de cinco años, el so baldosín entá anecia n’amosar na muria’l caberu destín de los postreros moradores de la casa, qu’aínda se caltién en silenciu. Güei, Saulu sólu, vieno de visita mientres que la madre remanez nes Canaries. Xintaron xuntos y pela tardiquina, el cuartu d’Álvarín españa en risaes al tiempu que dambos enrieden y glayen. Arriendes, la mesma estampa de La Graciosa se m’abulta qu’esboza una llixera sorrisa.

jueves, 7 de junio de 2018

Nunca'l poema



     Nun celebro efemérides y munchu menos, cabudaños. Nun quixi retener siquier aquel repunante día nel que morrió la mio ma. Ye por ello que, de la que yá toos festexaron antayeri a Lorca, voi facelu yo agora a los mios deleres…


Ximía la lluna,
a la guitarra,
copla aceituna
de l’Alpuxarra.

S’alzó la veda,
llegó Ramón,
el de la CEDA,
col so camión.

Rumbo a Viznar,
fiende’l sollutu,
n’Aynadamar,
canal del llutu.

Dempués, disparos,
darréu, la nada,
rellumen faros,
ciega Granada.

Cola tristura,
campu y camín
de l’amargura
pel Albaicín.

Llora’l xitanu,
l’Alambra llora:
versu tiranu
con lletra mora.

Nun val la bala,
nun valdría forca,
tol mundiu fala,
remanez Lorca.

Con ñegros velos,
cubre l’altor,
nos tascacielos
de Nueva York.

La guerra enceta,
de muerte sema,
valtó al poeta,
nunca’l poema.

martes, 5 de junio de 2018

¡Yá valió de tanta torga!



La mio versión espurrida de “La Danza”:


Dicen que yo t'invento
la mio llingua milenaria,
                                              como’l que s'inventa un cuentu                                                 
o compón una plegaria.

Dicen que la voz perpura
de los vaqueiros d'alzada
calla n’ayén de tristura
al baxar cola brañada.

Que’l guapu verdor d'Asturies
 xorrez con flor castellana,
qu’arrequexa ente penuries
a la mio llingua galana.

Nestos montes, nestos valles
de los que yes una ayalga
cutiéronte pa que calles
ya esti poema nun valga.

Dicen que yo la invento
la llingua que falo ufanu,
porque nunyos represento
y me tachen d’aldeanu.

Dicen que yo te creo
cuando te saco de casa,
espardiéndote d’abéu
denunciando lu que pasa.

¡Yá valió de tanta torga!
glaya a tol mundiu'l mio versu,
anguaño ya escontra forga
sabrá d’ella l’universu.

viernes, 1 de junio de 2018

Cais y contribución


     Les cais comen bramente a les xentes y la xente devuelve davezu pela cai. Envelenes colos fumos de les combustiones y nun españes por culpa del octanaxe que papes. Vas al bellume y tornes al debalu, y vienes y vas mientres too anecia en repetise. El formigueru, cuasi que dafurto, desendolca la so actividá dientro de la so xerarquía. Enriba, los páxaros esnalen y caguen; na superficie, los gochos mexen y chisquen, y nel sosuelu, les rates fuyen de tanta humanidá. Los requexos atropen caldía cartones, pulgos y mierda puro. Les esquines y puertes de los comercios piden, fumen, beben y falen pel móvil. Los bancos amuesen buelgues d’incivilizaos y llavaza a esgaya p’aventar a los que se van sentar. Les bicicletes nun son pal branu nin pal iviernu y, si la dexes amarrada, te l’alcuentres en cuadru. Les muries son un escomunal muséu de pintarraxaos d’artistes qu’enxamás cubren la parede de la so propia casa. Peles aceres esbarien peatonos escatanaos, patinadores, lladronos de bolsos y de Bagdad, sielles de ruedes motorizaes, bicicletes y sapaes. Les nueses enrexaes ciudaes son enforma cosmopolites ya acueyen a pinxonos, disidentes, rescataos, traficantes, apátrides, exóxenos, paganos, promiscuos, polígamos, perfecundos y profesionales perfechos de tolos llugares del mundiu. La caridá impuesta tien la peste por rempuesta y na cai hai lu qu’hai; magar que naide pue negar a encomalu'l gran llabor social d’España y la so contribución, por aciu de los retayos a los sos paisanos, al espoxigue d’una montonera países.