Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

martes, 24 de diciembre de 2013

Feliz Navidá


Anecia la Navidá,
la Navidá de retayos,
de fame y calamidá,
y de perda de trabayos.

Naide monta’l nacimientu,
tan los pastores nel paru,
namái que l'ayuntamientu,
el del IBI del descaru.

Tenéi cuidáu colos reis,
que vienen colos sos xenros,
y con toles de les lleis,
en afalagos bien tienros.

D’apertar tanto los tornos
y pela xubía inxente.
a la lluz de los adornos,
va folixar muncha xente,

La cena de Nuechebona,
cuento que será de nuños
y de xaracos con trona,
con trona de bien de fuños.

Sentiremos, nel mensaxe
real, dalguna milonga,
cuando falla l’engranaxe,
se furrula a la perllonga.

Al que mercó llotería,
cola última prindada,
si-y cayó’l gordu esi día,
nun-y van a pagar nada.

Pa torgar les nueses penes,
van refugar estes fiestes,
al tayu y coles cadenes,
ensin turrón y ensin cestes.

Eso va ser d’equí a un añu,
¡felicidá nes caberes!,
deséante ensin engañu,
les llingües de sacaveres.

Qu’aproveza el 2013,
quien somorguie na folixa,
y pal catorce que rece,
si nun camuda esta guisa. 

lunes, 23 de diciembre de 2013

Felicitación de Nuechebona, Añu nuevu y Reis.


Queríos amigos:

                            Escríbovos, a la lluz de los adornos municipales (en casa yá acutemos el so usu por cuenta de les alloriantes xubíes), pa felicitavos les fiestes de Navidá, Añu Nuevu y Epifanía. Perdonái qu'esperara hasta l’entamu d’estes, por culpa de qu’ entá caltengo al marxe de les encomiendes de les Lloteríes del Estáu, los mangoneos d'ésti, dellos medios de comunicación y el comerciu grandoxón. Sicasí, por razones obvies, nun pudi desaverame del belén que, como tolos años, te monta l'alministración de turnu. Ésta, al traviés de les sos escribes y dende'l castiellu imperial d’esi nacimientu, foinos retayando a los escoyíos paganos toa suerte de derechos afitaos, arriendes de los dineros o denarios de salarios y pensiones,  al empar d'abaratar despidos y amontar diezmos en IVAS ya IBIS. Los pastores opositores, los que dirixen la reciella, yá espublizaron movilizaciones contra la nueva Llei del Albuertu. Mentanto, la televisión, gociosa y afayadiza, nos deforma  —perdón, nos informa— de que los escoyíos encargaos algamen a estazón a cubrir la totalidá de la so puya de delda, aporfiando n'empeñanos más y más.

                             ¡Sei bonos!, amás de porque nun vos quede otra, porque asina quiciabes los reis, que s'acompañen de paxes y non de xenros, vos van aportar dalguna bona nueva, pa variar. Anecio: feliz Navidá, bon Añu Nuevu y granibles Reis.


Felicitación de Navidad, Año Nuevo y Reyes.


Queridos amigos:

                            Os escribo, a la luz de los adornos municipales (en casa ya hemos restringido su uso debido a las recalcitrantes subidas), para felicitaros las fiestas de Navidad, Año Nuevo y Epifanía. Perdonad que haya esperado hasta el momento en que éstas dan comienzo, puesto que aún me mantengo al margen de las directrices recomendadas por Loterías del Estado, las gerencias de éste, diversos medios de comunicación y el macro comercio. No obstante, por razones obvias, no he podido sustraerme del belén que, como todos los años, te monta la administración de turno. Ésta, a través de sus escribas y desde el castillo imperial de ese nacimiento, nos ha ido recortando a los elegidos paganos toda suerte de derechos adquiridos, amén de los dineros o denarios de salarios y pensiones, al tiempo de abaratar despidos e incrementar los diezmos en IVAS e IBIS. Los pastores opositores, los que dirigen el rebaño, ya han anunciado movilizaciones contra la nueva Ley del Aborto. Entretanto, la televisión, gozosa y satisfecha, nos deforma  —perdón, nos informa— de que los oportunos encargados reiteradamente logran cubrir la totalidad de su subasta de deuda, obstinándose en empeñarnos más y más.

                             Sed buenos, aparte de porque no os quede otro remedio, porque así quizás los reyes, que se acompañan de pajes y no de yernos, os participen alguna buena nueva, para variar. Insisto: feliz Navidad, venturoso Año Nuevo y fructíferos Reyes.


sábado, 21 de diciembre de 2013

Otistis


     Lu peor del cuentu de la cabera entrada ye que foi ciertu, yá que sintiera mal al neñu del colexu, lu que m’asocede de cuando en vez con más xente. Camentóme una vecina mui curiosa, que ye mélica, que nun esmoleciera, porque cuenta que nun ye más qu’una “otis tis”. Nun-y quixi entrugar que coime yera eso pa nun-y paecer inorante; asina que, de la que me topé col del ascensor que trabaya nesa empresa-y pregunté a él y darréu miróme torcíu. Güei, que llevantéme mui apriesa y andaba dalgo mariáu, m’alcontré de nuevu cola doctora, qu’en viéndome d’esa miente m’espetó que bien seguru que me tendría que quitar los tampones. Magar que dexárame aínda más ablucáu, colé aina, pos hai bien de tiempu que m’aldericara la muyer que nun falara con ella; arriendes que’l xueves qu’entra tengo cita pala I.T.V. (Inspeición téunica de vieyos).

viernes, 20 de diciembre de 2013

De belenes


     Güei tuvi agüeyando los belenes que, como tolos años, armen los neños  del colexu Taxamar. Presta a esgaya lu que son quien a iguar con material remocicáu y l’ambiente de folixa que se respira. Cada grupu lu llanta na so clas y, a la fin de los cucar, vas trespandando d’una a otra. Abondes vegaes, un corru escolinos sal a la puerta pa invitate a pasar al so nacimientu. Nesti casu, un d’ellos glayaba: “Pasen ver el nuesu belén púbicu”. Por culpa de que me chocara afarto la chancia y porqué cuntara que quedría dicir “públicu”, esperé un rispiu p’asegurame y darréu'l guah.e aneció: “Pasen ver el nuesu belén púbicu”. De la que saliéramos-y camenté a la muyer lu que m'estrañara nesi centru’l dichu del neñu y, de secute, la parienta m’aldericó: “Tas tu bonu; cúbicu, non púbicu”. Entós alcordéme de que les cases yeren daos; les figures, reutangulares y de qu’a min, como davezu, nun me llegó bien la onda.

miércoles, 18 de diciembre de 2013

De torna a Bountiful


     Güei decatárame pela prensa que diben echar na 2 una película de la qu’escaecí’l títulu y que nun yera cuartulera (sic). Entós, de la que finé d’enredar, punxi la televisión cuando yá taba entamáu'l filme. Tratábase d’una güelina que nos Estaos Xuníos garraba l’Alsa y tornaba pal so pueblu, por culpa de que nun se llevaba cola nuera. Como marché col fíu a caleyar, nun sé bien lu que pasara nel intre; sicasí, llegué de la que la vieya yá taba a la vera la so casa y el so fíu venía a buscala. De magar que la so ma s’alcordara d’una montonera coses y el rapaz-y retrucara de mala mena: “tenemos qu’escaecer los recuerdos porque les alcordances nun sirven pa nada”, cafié cola rempuesta y apagué l’aparatu. Seique, nos Estaos Xuníos, amás d’espíes, tamién hai bien de xente mui mal educada.

martes, 17 de diciembre de 2013

Independencia


     Quiero independizar de la comunidá de vecinos. Na mio casa tamos toos d’alcuerdu na dixebra. Nun ye por mayoría, ye por unanimidá. Yá-y presenté al alministrador l’avisu de separtación y, de secute, m’amenazó con denunciar nos xulgaos. La soberanía mora nel pueblu y si denuncia nos van prindar y atartallarán la soberanía. Tenemos el mesmu derechu que cualquier otru pueblu y la unanimidá como sofitu. ¿Nos van achaplar por ser pocos o esparderán la llei a tol Estáu?


lunes, 16 de diciembre de 2013

Adiós, adiós...


Adiós, ríos; adiós, fontes;
adiós, regatos pequeños;
adiós, de mio Asturies, montes;
adiós l’aldea y los neños.

La mio tierra, la mio tierra,
tierra onde me crié,
güertu, horru, muria y cerra,
alcordances qu'asitié,

praos, ríos faladores,
pinos qu’afalaga’l vientu,
paxarinos piaores,
casina del mio contentu,

ciñu de les castañares,
nueches seles de llugar,
facines y balagares,
campanes de campaniar,

de la ilesia gayaspera
onde rezaba con vós,
afayáu a la to vera,
¡adiós, para siempre adiós!

¡Adiós gloria! ¡Adiós folixa!,
¡la casa onde nací,
la braña cola so brisa,
nun m’escaeceré de ti!

Dexo amigos por estraños,
dexo fastera por mar,
dexo parentela y años,
muérrome por vos dexar.

jueves, 12 de diciembre de 2013

Seguridá Privada II


Amestáu a la nueva llei de Seguridá Privada:

Capítulu II, seición 3ª. Art. 8

Tamién van poder varexar infelices, los interventores de trenes, coches de llinia y otros medios de tresporte, asina como los familiares del primer grau de consanguineidá, nel esclusivu desendolcu de les sos funciones, a los pazguatos que nun lleven el billete y ensin necesidá de que se pongan farrucos.

D’otra mena, retrucando a les entrugues recibíes por culpa de la medrana social aniciada, esclariar que d’alcuerdo al artículu 2.15.1.4 SOBRO HOSTIES INDIREUTES, nel capítulu de fíos, que cola esceición de los llexítimos, namái tarán autorizaos pa solmenar mocaes a la mano d’obra, los fíos putativos.

Col envís de sevos d’utilidá, mesmamente añadir que, per Madrid, yá tan lloviendo hosties per adelantáu; poro, vos encomiendo qu'andéis pelo segáu.

miércoles, 11 de diciembre de 2013

Seguridá Privada


Vixilantes privaos podrán tantiguar y detener pela cai. El gremiu va asumir dalgunes funciones policiales cola nueva llei de Seguridá Privada (20 minutos, 11 avientu 2013).

     Esto nun ye nada pa lu que se nos vien enriba, polo que quiero esparder lu que sentí esta mañana a un bigardu que paecía mui bien informáu. Desplicaba al altu la lleva na parada’l coche de llinia que, d’alcuerdo a la siguiente novedá que tan iguando de la citada llei, podrá identificar, prindar y sotripar, la parentela de les fuerces de seguridá del Estáu y vixilantes xuraos fasta’l tercer grau de consanguineidá (non amestáu). Col envís d’esclariar l’ abegosu casu, y tornalu al asturianu, paso a informavos que, col articuláu na mano, el titular, el so home o la muyer, los padres, fíos, hermanos, güelos y los sos ñetos van poder pegate una hostia y tendrás que quedar con ella. Nun tan autorizaos, de momentu, bisgüelos, tíos, sobrinos, biznietos y primos. Encomiendo a los qu'inda nun se caltienen internos nel trabayu que, si crucien con daquién, miren pal pisu en cuenta de refugar males mayores; magar que, lu más conveniente ye nun surtir de casa y guardar el debíu procuru y rocea col vecín.

martes, 10 de diciembre de 2013

Diatriba del saqueo

                                                                       (Cultura spn)

Cuando se abandona el pago
y el pago no te lo abonan,
digieres mal ese trago,
pues, al revés, no perdonan.

Siempre pagamos los mismos,
esas crisis galopantes,
afirmo, sin eufemismos,
que originan los mangantes.

Entre impuestos indirectos,
IVAS, IBIS, retenciones,
directos, pagos afectos,
multas y compensaciones,

pagas más de lo que ingresas,
salvo que estés en la cumbre,
una excepción entre empresas,
uno entre la muchedumbre.

Cualquier tasa se te imputa,
no presunto, si pagano,
con tanto hijo diputa,
grana varicela el grano.

Ellos no pagan dos reales,
pagas tú las protegidas,
también servicios sociales,
palacetes y queridas.

Con tanto diezmo, te asolan,
te imponen con tanto impuesto,
cualquier ingreso controlan,
no te dejan ni lo puesto.

Hay que rescatar los bancos
y a más de algún botarate,
demandan todos los flancos
y tú juegas al rescate.

Hipotecan tu futuro,
de las pensiones, la caja,
sin un euro, sin un duro,
urgen si la bolsa baja.

Te despojan por arriba,
te asaltan por cualquier calle,
del saqueo, diatriba
no falta quien te avasalle.

lunes, 9 de diciembre de 2013

Tristura

     Tal día como ayeri, la Conceición, nos xuntábamos en casa mio ma: los hermanos, les sos muyeres y tola reciella guah.es col envís de festexar la triada. Yera'l so santu, el so cumpleaños y, per entós, el día de la madre. Yera un día resplandorientu y gayasperu, de tartes, berros y llambionaes. La folixa y el trepelete inundaben la sala; los neños ríen y la güela s’enfotaba con gran ciñu na económica p’afayar enforma la xinta. Güei, yá nun nos xuntamos, la casa ta pesllada, caún anda pel so llau y nada celebramos. Ye un día dafechu repunante. La tristura aforfuga nel ambiente y namái remanez l’alcordanza. La vida aporfia en varexar nos costazos de mal xeitu, cada vegada con más arremangu, de la que te vas faciendo vieyu y nun queda otra que curtir el pelleyu y tirar p'alantre. 

viernes, 6 de diciembre de 2013

Troles y más troles (capítulu mil y milenta)


Las obras de construcción de la Variante de Pajares revivirán en 2013 y la infraestructura estará lista para funcionar en 2014, según anunció la ministra de Fomento Ana Pastor durante una sesión de control al Gobierno realizada en el Congreso el pasado miércoles. (23-9-2012)


  
(LNE, güei 6 d’avientu 2013)  

Fomentu destina 25 millones a les víes del AVE hasta Llión y “RETRASA” les de la Variante          

     Na so cabera xunta'l conseyu d'alministración del Adif aprobó en 68,4 millones d'euros el tratu de les telecomunicaciones, los sistemes de protección de los trenes, el control del tráficu centralizáu y los sistemes auxiliares, amás de los tramos de conexón con La Robla y cola estación de Pola L.lena. El plazu igua d'estes actuaciones finará pal 2016...    


Comentariu unvíao a LNE:

     Agora, como ceo, pal 2016. Cada nueva noticia sobre la variante ferroviaria de Payares ye un nuevu retrasu y una nueva tomadura de pelo, con independencia de quien tea nel Gobiernu.

     Prestaríame que LNE y tola prensa nacional dexara de cubrir les troles de los políticos sobre esta alloriante ofiensa y despreciu palos asturianos.

                                                                                   Xosé Rodríguez Pérez (Pindesierra)

                    

jueves, 5 de diciembre de 2013

Marchó'l Word


     Too son cuestiones cola informática. Tenía que faer una carrera p’algamar el pasu que lleva, pero yá toi medio vieyu y gústame más tar folgando. El casu ye que la mio CPU d’Atapuerca me torga l'accesu a la “Pallabra” (Word) y tuvi que garrar una fueya pa vos escribir esta fatada. De secute, aporfié en calcar la botonera’l ratu espetando la flechina sobro la so viñeta; magar qu'anecia en nun se mover. El fíu quier qu'acarrete l’aparatu pel camín repunante de la basoria; sicasí, nun me presta un res esbariar el deu pela pantalla d’una mazana podre. Amás, va munchu tiempu, mercara un portátil qu’apingaya nun almariu ente los tenis dende entós. De resultes, me caltengo na griesca y a la espera, por si-y peta tornar d’ayén al Microsoft enantes de que trespande pal xergón. Sinón fora asina, sedrá pa cuando seya quien a vos lo contar.

miércoles, 4 de diciembre de 2013

Avisu


     Les guerres siempres les ganen los de siempre y, la mayor parte la xente, sobre manera los neños, sufren la llaceria. Si nun dixebráramos en bandos y colores, nun nos enfrentaríen. Los políticos nun trabuquen el so programa, trabucamos los que-yos empericotiamos. Los idealistes muerren, la historia se repite y les agües tornen pel so cauce. Les primaveres restallen si darréu desendolquen en iviernos. La cuestión nun ta nel tipu de gobiernu, la tema ta en que ye humanu’l que gobierna y tien la payella pel mangu.


lunes, 2 de diciembre de 2013

Radio de les radios



     Habrá un añu que, nel cuartu onde duerme y coneuta col mundiu'l mio ordenador, sentía aires y cantares d’Asturies, mentanto suañaba o-y daba al rabil de pedales de la bicicleta ensin ruedes, la única que me convién pa nun esfarrapar inda más la columna. Foi una curtia dómina na qu’oyía esos sones y cantares a traviés de Radiu Llangréu y na que los díes s’afitaben allegres y les nueches, máxiques. A bien d’amigos que sabíen que me caltenía de contino al escuchu se-ys abuitaba que taba cuasique tan pasáu como bramente toi. Sicasí, un mal día atayaron la emisión y quedé vilbu d’esa folixa gayaspera d’aire seliquín y duendos revolvinos qu’enredaben a caballu de les notes musicales y les mios alcordances. Seique pesllaron y tornaron dempués a la estaya, pero la emisión que finara cuento que la echaron en sucu y la qu’entamó yá nun yera d’esa miente. Güei, cola mio tristura radiofónica llantada a la perllonga ente’l llombu y el maxín, acolumbro que quieren que furrule una pequeña emisora dientro’l muséu de la Casa les Radios de Bimenes como un mediu de comunicación más dientro de la Contorna la Sidra y pa esparder la esistencia del propiu muséu. Bien llegáu seya’l proyeutu y el mio envís en que funcione enforma y darréu. Oxalá que nun escaezan los nuesos cantares qu’un día sonaron neses radios que güei son reliquies p’afalagu de los paisanos de la redolada, pa, a traviés de la Rede, de los que tamos lloñe y pa porgüeyu del nuesu mesmu raigañu.