Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

domingo, 31 de julio de 2016

LOLA

    
     Fino de coneutar ya agora m’alcuerdo que daquién mui célebre a quien-y gusten los llibros, los neños, la mar y los “vinilos” m’encomendara una Lola a los mios deleres. Vamos a ver que tal sal…
 
  

La otra nueche baillando taba con Lola
 y me dixo que s'alcontraba bien sola,
que pensaba que yo yá nun la quería
y cuntaba que yo con otra salía.
 
Nun llores, nun ye verdá,
nunca te miento.
Fádiame la humedá,
llelda’l formientu.
 
Nunca tuvi con otra,
tu yes la única Lola.
Nunca tuviera potra.
 
La besé na cara,
también, nel focicu,
garrando una vara,
m’afalagó’l picu
 
y, cuando berraba, se rió.
 
La otra nueche baillando taba con Lola,
enxamás fuera a cola-y una trola.
 

 

viernes, 29 de julio de 2016

Un sorbiatu pacharán

 

Nunca te voi a escaecer,
porque deprendí a querer.
 
Con un sorbiatu pacharán
brindando pol nueso querer.
La nidia lluz d'aquel chaflán,
apenes me dexaba ver.
 
Ye tan fácil recordar,
siempres que vuelvo brindar.
 
Con un sorbiatu pacharán
brindando por nuesa pasión.
La nidia lluz d'aquel rincón
valtaba col mio corazón.
 
Y foi entós, cuando te besé.
Del to mirar, yo me namoré
 
Con un sorbiatu pacharán
brindando por un nuevu amor.
Pa refugar aquel manguán,
yo t’ufierté’l mio bon humor.
 
Y foi entós, cuando lu estropié,
porque al baillar, yo te frayé un pie.

miércoles, 27 de julio de 2016

Te prometiera


Te prometiera que voi a escaecer,
cuanto quixisti, yo te supi dar,
 solo y firíu, déxesme muyer,
 sabiendo que mañana vas dir con otru a ensilar.

Llorarás, Llorarás pol to caprichu,
si yo sé que ye a min a quien tu quies,
nún podrás ser feliz con esi bichu,
 pos yo te faigo rebelguinos nos tos pies.

Te prometiera que voi a olvidar
cuanto quixisti, yo te supi dar,
 solo y firíu, tu me vas dexar,
sabiendo que mañana vas dir con otru a catar.

Vas llorar, vas llorar por mal enfotu
y bien sé que por min tu tas que pruyes,
nun podrás recoyer col cestu rotu,
sabiendo que conmigo siempre arrevientes de peruyes.

jueves, 21 de julio de 2016

Agua de Boinás

     I+D (Pa los que nun teais estudiaos: Investigación más desendolcu), nueva idea de mio pa “reciclar” l'agua de les balses de llavadura de les mines d’oru.

     Que nun me dean el premiu Princesa d’Asturies, que nun lu preciso.

miércoles, 20 de julio de 2016

-Y toca a Salas



     Como glayen los grupos suramericanos: “¡Se va la segunda!” —Y toca la vecera a Salas. Los foriatos lleven l’oru a cambio de cianuru, mercuriu y otros metales pesaos. Pan pa güei pa un centenar y fame pa mañana pa toos por cuenta l’esbarrumbu, envelenamientu y desaniciu del terrén. Na Nueva España nin siquier asoleyaron güei una semeya de la mina, val abondo cola de la llaceria de Boinás. "El Principáu ye un gran xacimientu", aseguró un direutivu d'Orovalle. Van siguir con otres faces n’otros conceyos y naide diz nada. Namái los de Salave reburdiaron. ¿Ónde tan agora los “guardianes” del Paraísu? El Paranichu Mineral ta sirvíu. Quemar y esfardanar n’Asturies sal afarto baratu. Los paisanos van tener qu’emigrar mentanto haya a donde lu faer.

martes, 19 de julio de 2016

Inventos



     Esta triba d’estrofa nun la viera per nengún llau: 4, 5, 8, 8 (a,b,a,b), se m’ocurriera agora. Inventos…

 
 

Seis y tres,

dos mueles menos,

van más sele los mios pies,

que na reciella de nenos.

 

¡Ai mio ma!,

¡cuánto t’estraño!,

bien de tiempu pasó yá,

de que te fuisti aquel año.

 

¿Socedió?,

yo nun lo sé,

el suañu me despertó,

ye la vida como ye.

 

Alcordances,

magar qu’esnalen,

s’afiten y nun avances,

pémeque de nada valen.

 

Comunión,

seique la mía,

al llombu de la ilusión,

alcuérdome d’aquel día.

 

Cortexara

aquella moza,

yera guapina de cara,

quiciabes fora de lloza.

 

Casé con

otra más guapa,

dicíen qu’un bon bombón,

¡garra esi bombón y escapa!

 

Tuvo un fíu,

abondo llistu,

dixo la muyer que míu,

asina foi, polo vistu.

 

Cuatro y dos

años con ella,

¿qué vos voi contar a vós?,

ye verdá que foi mui bella.

 

Y equí toi,

contando cuentos,

soi namái que lu que soi,

lu demás seríen inventos.


domingo, 17 de julio de 2016

¡Munches gracies!


     Queríos amigos y emponderaos collacios: ¡Carái!, ¡carucha!, ¡carape!, ¡coime!, ¡condia!, ¡coya!, ¡diantre!, ¡demoru!, ¡hala, ¡ixuxú!, ¡madiós!, ¡meca!, ¡mialma!, ¡miániques!, ¡oh!, ¡rediola!, ¡vaya!, ¡runfa y rezumba la calaviya! Fino de tornar de fin de selmana (yá sabéis que nun gasto móvil) y m’alcuentro col vuesu carráu de felicitaciones. ¡Munches, munches gracies, sois toos mundiales! El Gamonéu del Puertu viniera envasáu al vaciu pa percorrer la distancia y travesar la calor, torne — anque seya de manera virtual— pa la convidada a toos y caún de vosotros. De la que cumples más y más años, la data de caducidá vase averando magar que mal a gustu; sicasí, estos momentos paga la pena vivilos. Anecio en apurrivos les gracies a goxa enllena ya en siguir al vuesu llau.


miércoles, 13 de julio de 2016

Mozu grande, potru pequeñu...


Col mozu grande,
potru pequeñu,
ande o nun ande,
tendrá’l so dueñu.

Vieno’l chaval
xunto a la cría,
na capital,
él nun los vía.

El caballín
a él averóse,
quier el probín
que tamién pose.

Ellí nel prau,
na vera’l ríu,
paz el segáu,
aguanta’l fríu.

Colos collacios
igua manada,
nesos espacios,
solos son nada.

Melena roxa,
el llombu blancu,
marrón la coxa,
ye bonu y francu.

Un afalagu,
dempués l’adiós,
maxa de magu
xunió a los dos.

El rapaz altu
coló pal sur,
col sobresaltu,
del potru astur.

Pue qu’otru añu
quiciás se vean,
pueque nun suañu,
mui xuntos tean.

martes, 12 de julio de 2016

El llagu les neñes males

Ye de teatru ensin más,
asoleyen qu’hai un llagu,
invitaos tais los demás,
el cuentu nun ye de pagu.
 
“El llagu les neñes males”,
seique, nes escueles vieyes,
nin siquiera dos reales
por somorguiate con elles.
 
A les 8 de la tarde,
nel guapu pueblín de Llouru,
dir a Llouru ye un bon farde,
igual qu’a L.lamas del Mouru.
 
Pero nun sé de que día,
nun lu amuesen nel cartelu,
llamaré a la policía,
antes d’averame a velu.
 
Y si quies chumar un vasu,
cuando fine’l festival,
te pilla mui bien de pasu,
el so centru cultural.
 
¡Viva Llouru y San Llourenzu!,
¡Viva’l conceyu de Pravia!,
onde nada atopas pienzu
y ablucarás como en Babia.


domingo, 10 de julio de 2016

¡Yá valió!



     Finara la Eurocopa. Portugal dexó d’aburrir. El gayu galu quedó petrificáu en corral. GR-7 a la fin nun metiera y CR-7 yá nun lloraminga nin fai esparabanes. Nel intre, la plaga poliyes enredaba cafiante.  El mio fíu durmió nel sofá por culpa la mediocridá mentanto la calor remata na Villa y Corte. Cualesquier tiempu pasáu foi meyor.


martes, 5 de julio de 2016

ARROXANDO


Dalgunu aínda quexica del orbayu, del mofu, del verdín…


Equí l’agua fixo amagu,
pero nun cayó una gota,
tien qu’agabitar un magu,
porque nun brota una mota.

Porque andamos cola seca,
porque yá ta too ensuchu,
finamos como una teca
y nin se caltién el cuchu.

Fai munchu fríu n’iviernu
y muncha calor pel branu,
esta villa ye un infiernu,
dicen que’l clima ye sanu.

Amás, pola fumarada,
vamos finar afogaos,
abaruyes na cainada
col xeitu per monte y praos.

Ansí de Madrid al cielu,
nun furacu o chimenea,
seique vas ser quien a velu,
hai qu’aniciar la xalea.

Rispes, nagües, aforfugues,
atrulles na señaldá,
aturulles y nun fugues
del camín del más allá.

Si te plaz colar pal norte,
apura d’una vegada,
vas morrer na Villa y Corte,
si’l procuru queda en nada.

Madrilañu y arroxáu,
tal día palmó un paisanu,
de so Asturies, espatriáu,
pudo-y la calor del branu.

lunes, 4 de julio de 2016

El trabucáu


Caún tien la so razón pal so votu. Quien nun la tien ye’l contrariu…


Ye’l magüetu, ye’l contrariu,
aquel que vota al aviesu,
el que te fadia a diariu,
quien paez que nun tien sesu.

El que ye de la otra mano,
quien pisa col otro pie,
el que cavilga llonxano,
el que ye lu que nun ye.

El que nunca espeta nada
y por eso ye peor,
el qu’arroxa la empanada,
el que vive ente’l mugor.

Aquel que salió na tele
cola bandera enemiga,
que paez la muyer sele,
pero ye lu qu’ella diga.

Aquel que tolera al otru,
el de pensamientu ruin,
ye pina, retayu, potru,
ye neciu poro pollín.

El de la mierda’l país,
cuando tou lu trabuca,
quien estordiga l’envís,
repunante como cuca.

Al que se-y va la mente,
aquel que nun tien procuru,
xentecaya ente la xente,
quien se viende por un duru.

Babayu de la otra España,
el que paz d’otra pación,
el que restola y engaña,
y gasta’l cuernu forcón.


domingo, 3 de julio de 2016

La nacionalidá.



     Güei’l que tien dineru o ye un bon xugador de fútbol ye de la nacionalidá que-y peta. L’asuntu de la nacionalidá yá ye una comedia. La Francia multinacionaliga machucara a la seleición de raigañu d’un país de malapenes 330.000 paisanos. Los franceses finaron perencantaos. ¡Norabona viquingos por algamar tan altu y sobremanera por caltenevos fieles al vuesu orixe!