Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

domingo, 31 de mayo de 2015

La bruxa Maruxa


La bruxa Maruxa,
ufana y mui sele,
salía na tele
cola so curuxa.

Maruxa, n’abiertu,
sabía de xuru:
pasáu y futuru,
y el pluscuamperfeutu.

La escoba foi antena
pa ver na so bola,
cucaba la Pola
de Siero y de L.lena.

Echaba les cartes,
llevaba la cuenta,
cantaba cuarenta,
ganaba en toes partes.

Tenía arte de maxa,
facía esconxuru
col so café puru
o cola forgaxa.

Tiraba a degüellu
al que-y cafiaba,
y el probe finaba
con un mal de güeyu.

Montaba una Vespa
pa tornar al monte,
bañaba na fonte,
volaba en xinesta.

La bruxa Maruxa
yá a naide fai nada,
pos ta retirada,
ye la meyor bruxa.


lunes, 25 de mayo de 2015

El cursu



     La biblioteca’l barriu ta na vera’l mio edificiu, asitiada nun centru cultural onde s'imparten una montonera cursos. Yo mesmu, fai un par d’años, m’apunté a un de cantu y solféu. Foi’l casu que berrábemos tan altu que fadiábemos a los de la biblioteca y a los otros escolinos. De resultes, darréu desaniciaron el nuesu cursu aventándonos a glayar caún al so ñeru.

domingo, 24 de mayo de 2015

La distancia (a los mios deleres)


Nunca más sentisti tu, falar de mi,
anque yo siguí, pensando en ti,
de toa esta murnia que quedó,
tanto tiempu yá pasó
y enxamás t'escaecí.

Cuantes veces pensé que tornaría
y dicite que’l mio amor nun camudó,
pero'l mio silenciu me torgó
y na distancia muerro día a día,
ensin sabelo tu.

El restu d'esi’l nuesu amor finó,
bien lloñe y aventáu uquier que voi,
viviendo nel pasáu aínda toi,
anque too yá camudó,
sé que nun t’olvidaré.

Cuantes veces pensé que tornaría
y dicite que’l mio amor nun camudó,
pero'l mio silenciu me torgó
y na distancia muerro día a día,
ensin sabelo tu.

Cavilgué dexar d'amate d'una vez,
resultó mui abegosu y carecí;
si daveres, amor, pienses en mi,
ten presente si entemez
 a esti que nun t’escaez.

Cuantes veces pensé que tornaría
y dicite que’l mio amor nun camudó,
pero'l mio silenciu me torgó
y na distancia muerro día a día,
ensin sabelo tu.

jueves, 21 de mayo de 2015

El Premiu les Lletres


Si te cuento un par de cuentos,
tienes que dame un chuchín,
qu’al inventor, por inventos,
-y repleten el faxín.

Si rellato’l mio rellatu,
tendrás qu’alvertir de mano,
que nun ponga cara fatu,
el magüetu del to hermanu.

Si te lleera un sonetu
primero esclaria al to pá,
que guarde un plizcu respetu,
que nos tercetos se va.

Si xuxuriu a tos oreyes,
procura aguantar de rir,
si acaso faigo cosquielles,
qu’entós nun soi a siguir.

Si a la to ma nun-y presta
un poeta muertu fame,
voi aporta-y una cesta,
con tarucos a so algame.

Si-y chinga al to pariente
que soi llistu col encople
y nun pue fincate’l diente,
si fora a soplar, que sople.

Cuando me dean el Premiu,
de la Princesa d’Asturies,
si allegues con tol to gremiu,
t’encamiento que-yos curies.

Que nun me fadien el día
y que tean calladinos,
qu'a cuenta mio poesía,
-ys van a invitar a vinos.

jueves, 14 de mayo de 2015

La Caridá

(Otru enfoque)

¿Nun se llee nesti país porque nun s'escribe, o nun s'escribe porque nun se llee?

¿Nesti país ye precisu ser taurín pa ser dereches o ye precisu ser de dereches pa ser taurín? o, entá más importante, ¿ye necesariu ser taurín y ser de dereches pa ser español? Esperanza Aguirre cree que los antitaurinos son antiespañoles. ¡Y un cuernu, Sra. Condesa! Usté ye una grande d'España, pero ente los ruinos y los caritatibles tamién hai españoles. D’otra miente, la Fe sí ye una virtú teologal, pero yá duldo de que la Esperanza lu seya, como nun lu ye la crueldá, señora grande, qu’abúltaseme trabuquen vustedes cola Caridá.


martes, 12 de mayo de 2015

Plantes d'Agustín


Quieren algamar la llinia,
eses plantes d’Agustín,
pa falar con Abisinia,
o quiciás con Carbayín.

Ye que cortaron la suya,
cola fuelga Movistar,
magar que nun meten bulla,
toes pruyen por falar.

Que les plantes tamién falen,
pallabres que lleva’l vientu,
que con esi vientu esnalen,
se sienten col pensamientu.

Elles son como muyeres,
si’l teléfanu-ys falta,
van enfocicar daveres,
¡que-yos dean aína l’alta!

Toos taremos tranquilos,
el güelu, el pá y el fíu,
si furrulan los sos filos,
nun paguemos el coríu.

sábado, 9 de mayo de 2015

RESTALLU


     El Día les Lletres ye un día mui guapu y folixeru. Ye un día de tocar la gaita y recitar poemes. Ye un día de bonos y cabales procuros, como’l de Navidá. Ye un día nel que siempres asoleya dalgún personaxe afamáu y s’amuesa tamién dalgún otru de cualesquier muérganu oficial o académicu. Ye un día de xuntanza pa pidir la oficialidá y ¿dempués qué? A siguir falando castellán el restu los díes. Yo, de la que voi per Asturies, falo davezu n’asturianu, magar qu’haya xente me mire torcío. La nuesa llingua nun espoxiga porque namái un día al añu reivindiquemos esa oficialidá a la que tenemos derechu. La nuesa llingua remanez y desendolca falándola toos de contino y emburriando asina a l'Alministración a esi reconocimientu. Sinón, van siguir riendo de nós.

¡LLIBERÁI a LULO!


     Un pidimientu ta garrando puxu na Rede:

     Pindesierra emprincipió esta campaña. Calca nel ESCHANXE.Org y robla.

     Foi’l casu que Lulo, de la qu’entrara a mercar nun hipermercáu nel polígonu de Roces, agüeyó una moza qu’espublizaba nel so chilecu: “TOI EQUÍ P’AYUDATE”. Darréu, garróla y la llevó pa Cangas pa que-y echara un gabitu al catar les vaques. Por culpa d’ello-y prindara una patrulla de les fuerces d’orde.

     ¡FIRMA ESCONTRA LA PUBLICIDÁ ENGAÑOSA Y POLA SALIDA INMEDIATA DE LULO DE VILLABONA!

     Yá atropamos 1256 firmes, fáltannos 354 pa les 25.000. 

miércoles, 6 de mayo de 2015

El Gaiteru II (Xabel Coppula)


    El xuez da la razón a El Gaiteru, que nun tendrá que camudar les etiquetes y nin siquier de gaita.

     S'encamienta tornar nos cartelos de la villa’l topónimu de Villaviciosa a Pola de Maliayo pola tema la imaxe. D’otra miente, van siguir enredando tamién col cianuru y el mercuriu de les mines d’oru.

martes, 5 de mayo de 2015

¡RECICLÁI!



Namái con dos segundos reciclar,
sedrás poro cabal, curiosu y llistu,
mentanto dellos funden n’alta mar
los barcos espardiendo tol so esquistu.

Nun lleves entós mal ternu,
que si reciclamos xuntos,
vas pasar a ser eternu
y algamaremos más puntos.

A emporcar que son dos díes,
p’afogar nun solo instante,
lleendo estes poesíes,
esmazcares al mangante.

lunes, 4 de mayo de 2015

ESCONTRA'L VICIU


     "El Principáu esixe que la etiqueta d'El Gaiteru lleve más ruin el nome de Villaviciosa"
Por culpa la corrupción, agora van escontra toa triba de viciu, magar que seya toponímicu y perafitáu.