Arumes de TPA

     De la que tuviéramos en Grau na primer selmana del nuevu añu, la TPA nun dexaba de perfumanos la sala a toles hores, aniciando cola rubia del aiga del Chloé que desendolcaba’l so pañolón al vientu. Al tiempu, les muyeres de Gucci Bloon bañábense nun agua enfarxopetao de roses y los Vitoriu y Luquinu t’ufiertaben la suya d’espertos perfumistes. Darréu, Dolfu Domínguez facía otro tanto cola fresco, la de roses y la d’azahar. United Colors de Benetton diba d’arumes. Dempués, un mozu mui curiosu de Xicu Rabanne baxaba’l pantalón delantre l’espeyu y valtaba p’atrás a una montonera moces que–y andaben esclucando. Aína, la roxa que plizcaba’l cazu a un paisanu y la ministra qu’amosaba liga al salir del xarré montaben el Scandal. Aneciaba Dolfu Domínguez col so arume únicu ya’l for men del mozu roxu del pelo llargo. La del Olimpu aporfiaba cola mesma marca. Xina Ricci aportaba amás una modelu desfilando en faxa. El barbudu d’Hugu Boss qu’afalagaba pierna anunciaba la so bottled menuda. El neñu rizosu, la de Calvin Klein. De secute, Antón Banderes, nel intre que facía la so publicidá recoyía llaves de toles femes. De contino, la del vistíu descosíu fasta’l cadril dexaba ver y goler la so Good Girl. La reciella de la cama en comuña numberaba’l frascu 212 de Carulina Herrera. Un pantasmón ensin camisa qu’acarretaba una copa nos endilgaba l’Invictus col que repetía Xicu Rabanne. Asoleyaben, arriendes, una muyer blanca ya otra prieta de Tiffany que yá nun fui quien a ver que coime vaporiaben, al alcontrame yá aforfugando y desesperáu por culpa que respiro mal colos golores fuertes. De resultes, abrí la cristalera y tiréme pel ventanar, con tan bona suerte que cayí sobre’l techu de la furgoneta d’una de les perfumeríes de la villa.