Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

miércoles, 22 de febrero de 2017

Acabáu


Nun frayo algamando a vieyu,
hai tiempu qu’ando frayáu,
teo arrasáu’l pelleyu
ya’l maxín desendolcáu.

Va cuantayá nun ingreso,
que me torguen de salir,
lleen l’hestorial y, neso,
so sangre entama a pruyir

por como caltengo en pie
y apuren por facer pruebes
y alcuerdo lu qu’allorié
de los muérganos y frebes.

¿Amoria peles mañanes?,
¿nun aforfuga al falar?,
¿nuny tremecen les manes?,
¿nun apingaya al xintar?

¿El bandulluy furrula?,
¿siente un xiplu nos oyíos?,
¿y xube bien la pirula?,
¿dacuando, pies esfrecíos?

¿Qué toma pa la tensión?,
¿y dan cólicos nefríticos?,
¿quier morrer d’aburrición?,
¿y dan voltures los cítricos?

¿Caltién el so tratamientu?,
¿refuga’l Trankimazín?,
¿y da cefalalxa’l vientu?,
¿constipa si caye orpín?

¿Y manquen los parietales?,
¿y les vidayes, davezu?,
¿y dan alerxa les sales?,
¿y queda tiesu’l pescuezu?

¿Vacunóse pa la gripe?,
¿cáncanos na parentela?,
¿y chinga quey sotripe?,
¿tien la muyer varicela?

¿Estriñíu o cagaleru?,
¿careciera les paperes?,
¿xila col xelu en xineru?,
¿nun tien vértigu, daveres?

Paso l’interrogatoriu,
como pasara una guerra.
¡Tome esto pal rasoriu!,
¡ta usté acabáu, Pindesierra!

1 comentario:

  1. Nun te rindas, Pindesierra,
    Mientres quede un pingu aliendu
    Hai que siguir dando guerra.

    ResponderEliminar