Welcome

      Andábemos alloriaos. Welcome, la gata’l vecín, nun viniera ayeri en tol día. Yá sabéis qu'a Welcome-y llamamos asina por culpa de qu'una vez que-y entrugué pol so nome se tumbó na estera de la semeya. Foi’l casu que güei, de la qu’abrimos la puerta al alborecer, Welcome yá s'alcontraba nel felpudu miagando pa que la cebáramos. Welcome, pa los qu’aínda nun fuistis quien nin a sacar siquier el “first certificate”, llamaríase equí dalgo asemeyáu a Bienvenida. Al respeutive d’ello, quiero amestar que vos convién sobre manera deprender l’inglés, anque namái seya pa retrucar a los que davezu reburdien escontra la nuesa llingua asturiana, seyan de l’Asociación de Padres Escontra’l Raigañu, seya de Filólogos Foriatos de Llingua de Doble Filu, seya nos comentarios de LNE o en cualesquier otru afoguín llugar. Ye perfácil que daquién de toa esta xentecaya, que siempres son los mesmos, de la que defendas l’asturianu, t’espete: Do you speak English?, pa pillate y endilgate que yes un paletu inorante. Por mor d’ello, y enantes de qu’entames les clases, yo que tengo’l nivel d’abondo avanzáu voi adelantate qu’a esi repunante de turnu-y debes aldericar: ¡Yes, I do. Better than you, faltosu!

La percha

     Conozo un Madrid secretu. Un Madrid al que naide mira pa él. Un Madrid arrequexáu en milenta requexos. Un Madrid que nun ye de pasu y que davezu ta zarráu al pasu. Un Madrid d'un tiempu muertu onde, si nun preguntes, nun vas dar con él y, si acaso entrugues, nun te van saber dicir. Un Madrid a la escontra de los monumentos más afamaos per onde enxamás lleven a los turistes.  Un Madrid que se caltuvo argutu ente rescoldos qu’arroxaron los páxaros de fueu. Un Madrid de misteriu misteriosamente inoráu per onde discurrimos los qu’asina tamos. Un Madrid al qu'ames, magar que nun quieras. Un Madrid que caleyo en soledá dende que la vida, a encomalu, me torgó de caminar pel monte. Un Madrid que sabe a ranciu y güel a mexu gochu, pero qu’espeya serenden. Un Madrid de colgaos. D’unos colgaos que colinguen de les invisibles perches de Madrid qu’al empar cuelguen adulces del cielu. ¿Quies acompañame? ¡Garra la to percha!

Blues de los Uviéu Blues

Cada día me despierto

en segunda división,

miro con un güeyu abiertu

pa la clasificación,

dormimos pocu y mal,

amburando la salú,

 venimos d’un fondu inciertu,

naguando la principal,

¿qué vas tar faciendo tu?

Cada día entrenamientu,

un ensayu una tensión,

llendando cada momentu,

ye mio vida una ilusión,

uvieín y carbayón

y soi como veis que soi,

un siguidor del Uviéu,

el que torna ensin xaréu

y agora a primera voi.

Vivo en La Escandalera,  

siempres canto esti “blues”,

vivo en La Escandalera,

soi de los Uviéu “blues”.

Vivo en La Escandalera,

al campu voi n’autobús,

vamos xubir a primera,

puxen los Uviéu “blues”.



Torna “l’esperpentu”

MAX.- Los ultraístes son unos farsantes. L’estrafalarismu lu inventara Goya. Los héroes clásicos fueron pasiase nel caleyón del Gatu [...]. Los héroes clásicos reflexaos nos espeyos cóncavos dan “l’Esperpentu”. El sentíu tráxicu de la vida española namái pue dase con una estética sistemáticamente deformada [...]. España ye una deformación grotesca de la civilización europea [...]. Les imaxes más guapes nun espeyu cóncavu son absurdes.

Titiriteros

D'antroxu n'antroidu'l vientu lu lleva siguiendo'l senderu,

so patria ye'l mundu, como un vagamundu va'l titiriteru

cola so carreta lleva acarretando un guiñol melgueru.

Ye d'aquella raza que de plaza en plaza canta falagueru.

¡Allez hop! ¡Titiriteru, allez hop! de feria en feria.

Siempres bisueñu, cantor de suaños y de llaceria.

Balera l'alforxa de suaños, moñecos y dalgún preséu.

Baxa una querella, que non una estrella, d’un xuez al qu’aforca.

Canta una romanza y al son d'una danza se metió en xaréu

y cubre una monxa delantre los neños, cueya mala torca.

¡Allez hop! ¡Titiriteru, allez hop! de feria en feria.

Nun ta bisueñu, y amás se-y pon la cosa seria.

Y al cayer la nueche nun policial coche va entrar na prisión  

y quiciás mañana, pela so ventana, nun vea’l senderu,

robar al que merca con años de xera ye la ocupación,

trabucara’l tayu xorrascando guah.es el titiriteru.

¿Qué asocede?

     Paez como si tol mundiu escaeciera qu’ente'l branu y el mes d’avientu del añu que finara quemó media Asturies. Ye como si los millones d’animales y plantes qu’amburaren vivos, arriendes d’ una víctima humana, nun importaran un res. ¿Nun se va a prindar a más xente? ¿Nun se va a investigar a más naide? ¿Nun se va a entrugar a vecinos que nun dan parte? ¿Nun atufa’l que se prendiera a un tiempu en tantes faces? ¿Nun-y peta pescudar nada al periodismu d’investigación? ¿Hai daqué o munchu más que nun tien qu’asoleyar? ¿Vamos siguir careciendo toos les consecuencies? ¿Van permitir qu’arda lu que queda ensin afarar nesti añu? ¿De verdá tamos civilizaos? ¿Qué fai l’Alministración?

Añada a la neña de Rosa

Maria Rosa Serdio Gonzalez Ye piquiñina, la nena y quier una nana. ¡Anda, Pin, ponte a ello!

A la nana, nana,

de la mio neñina,

que-y entra galbana,

a la rebalguina.

Arroyo’l mio cielu,

año'l so trubiecu,

lluna de frixuelu,

cara de moñecu.

Nel so mezu, mezu,

coles sos manines,

nin son quien al rezu,

nin a caparines.

Pelele de puntu,

cubriendo’l so pechu,

a l’home del untu,

refuga esi mechu.

Dormi la mio neña,

dormi, dormi yá,

que la xana sueña,

pos dormida ta.

Algama una estrella

añada apañada,

porque sinón ella,

aína s’enfada.

Si acaso enfocica,

se nos pon mui fea,

sica, sica, sica,

a la oveya arrea.

Escampla nublina,

del bolsu de Rosa,

que la mio neñina

yá nel suañu posa.

San Bras

El primeiru, febreiru; el segundu, candeleiru ya'l terceiru, San Braseiru.

Pela Candelera y San Blas, l'iviernu botarás, y si San Blas nun quier, l’iviernu tornará.

Al que fila per San Bras, vuélvese-y la boca p'atrás.

Andái moces a San Blas, que fiestes yá nun hai más; queda Santu Maeru, qu'hai que sayar el pan primeru.

El día de San Blas comiendo castañes nun manca’l gargüelu más.

Per San Blas, la cigüeña verás y si nun la vieres, añu de nieves.

Per San Blas, la to yerba al mediu verás.

Per San Blas, les pataques semarás.

Per San Blas, tien el día hora y media más.

San Blas y la Candelera echen l'iviernu fuera si llueve o nieva; si non, acá queda.

Si nun nieva'l día San Bras, nieva otru día detrás.

Ensin reñer

     Tener que matar otros animales pa comer abúltaseme que ye una de les miseries humanes. Enxamás alderiqué nada a daquién que comiera carne, esceuto si entamara él a cafiar col asuntu; sicasí, asoleyar  semeyes de gochos colingaos, estripaos y decapitaos cuento que nun paez mui afayadizu. D’otra miente, na prensa, tamién amuesen delles fotos d’una montonera peñes armaes con escopetes, posando con xabariles o corcios valtaos que pinguen sangre pela boca y qu'amuesen como troféu. La verdá ye que nun garro nin la valentía nesa llaceria nin la conveniencia de compartila con xente que pueda tener mayor sensibilidá, yá que yo fui quien a afalagar un gochu xabaz ensin portar nengún arma —magar que nun seya conveniente intentalu— por culpa de que si nun-ys fadiamos nun suelen atacar. Arriendes, presumir de matar a un inocente desarmáu creo que nun ye mui oportunu. Algamar lu que se pretende nesti dibuxu qu’apegaron nuna muria d’una cai de Madrid pienso que nun asocederá siquiera nesta dómina, pero demostrar un plizcu de respetu pa colos nuesos vecinos, que sienten como nós, nun taría de más.

Añada

De cebolles y ayos,

delles añaes,

de la vida a pingayos,

qu’amamantaes.

Fame y repente:

xelu prieto y rosada

que’l neñu siente.

Nel trubiecu la fame,

mio neñu taba,

cola sangre al algame,

qu’amamantaba.

Cebolla’l tientu,

sangre de zucre, zusmiu,

sin alimentu.

Raitán de la mio casa

 rite a fartar,

la to risa ye basa

del mio alitar.

Rite a mamplén,

que la mio alma al oyete,

se ri tamién.

Cola to risa esnala,

el mio procuru,

nunca vi cosa tala,

nala’l futuru,

col corazón,

que’l mio destín me llibre

d’esta prisión.

Vuela neñu del alma,

vuela ensin pluma,

nunca pierdas la calma,

nin con la gruma,

Nun amanoyes

cola vida a pingayos,

d’ayos, cebolles.

A LA VELA

A la vela, vela, vela, del veleru de la mar, vela blanca de candela que despliega pa saliar. A la rueda, rueda, rueda, per ese mundiu redondu, qu’a la tierra-y pon veda dende la mar, no más fondu. A la rema, rema, rema, mentanto rema’l remeru, s’alcuerda de la so fema, que nun ve dende xineru. Cuando cole, cole, cole, a esnalar pel universu, pue que’l mio procuru engole d’una estrella col mio versu. Y si acaso torno, torno, voi trayete los perdones, que riscaran col so adornu, pa ser a estenar les trones. Yá a to vera, vera, vera, afitaré nel pueblín, seya iviernu o primavera, les coraes y el maxín.

CUENTU, DESENDOLCU o 2ª PARTE

Esta ye la segunda entrega del cuentu del sábadu pasáu que tien de mancomún un universo: Ello yera una vez un universu munchu mayor que’l del cuentu pasáu; magar que conteníu mesmamente n’otru universu más grande. Nesti universu intermediu hai millones d’animales, llugares y plantes que lu componen, talamente como les célules del universu anterior. Nesti casu daquién se decató de que too furrulaba al tiempu, como un solo ser y caltenía un equilibriu. A diferencia del otru cosmos más pequeñu, nesti, dalgunu de los componentes d’un determináu muérganu, emponiendo’l so egoísmu, dexó de sestaferiar o lu que ye peor emprincipió a faer fechoríes a los sos deleres. D’esa miente, esti universu intermediu que ye la Tierra, entamó a amalicar. Los que dixebraben yeren quien a mancar a los sos vecinos más febles y a envelenar, destruyir o quemar la faza común, la biosfera. De resultes, al afeutar a otres célules, afeutaben a tou un aparatu y furrulen como un cáncanu qu’arruina’l nuesu universu. Toos esos magüetos pertenecen a la mesma triba, la humana. Fasta agora s’aldericaba ente otros humanos cola fin de nun algamar el desaniciu. Güei, daquién d’ellos foi quien a comunicase con otres célules o especies y nel videu que s’amuesa como una d’elles nos aporta'l so mensax pa salvar esti mundiu yá que toos somos l’animal, l’árbol, el terrén, la mar o'l mesmu mundiu. El fin d’esti cuentu ta por llegar, pero si nun llogramos que los malfechores camuden la so actitú nun tardará y finaremos con él. Mentanto, cavilguemos que tantu esti gorila como los demás seres colos que tamién podríamos coneutar desendolcan un llabor y merecen un respetu, teniendo de riola'l mesmu derechu a vivir que nós.

LADRONES

     

     Paez que nun tuvo bona aceutación el videu asoleyáu hai unes hores d’Iker Jiménez, nun sé si foi por culpa’l grupu que lu colingó o porque’l so mensax fora enrevesáu; sicasí, que Dios nos pille confesaos.

     De resultes, vamos amestar yá la que toca en castellán… 

Cuando no te timan, piden,

cuando no piden, te roban,

si de tus impuestos viven,

lo ignoras porque te emboban.

Vuelan bolsos en las calles,

como vuelan las palomas,

como vuelan en los valles,

como vuelan por las lomas.

Ladrones de guante blanco,

ladrones de mano negra,

rapiña de hacienda o banco,

rapiña que el randa integra.

En España todo vale,

en España todo entra,

pero la riqueza sale,

cuando el poder se descentra.

Emergen nuevos partidos

con financiaciones viejas,

sobre votantes mentidos

y las cuentas bien parejas.

Tribunales que se abstienen

de censurar dichas cuentas,

de Mesopotamia vienen,

con las cifras irredentas.

En este país señores,

sólo pagan los paganos,

viejos y trabajadores,

al que atiborra sus manos. 

La Castellana

   

  Los escampaos de manzorga téolos bien triyaos, yo, nos caberos años 50 y nos entamos de los 60. La primer retonda ye la que güei llamen de Xacobu Bernabéu, col campu de Chamartín a la so vera. La d’arriba ye la de Cuzco y a lu caberu de les pistes d’aterrizaxe, como diz Alicina, allugaron la Plaza de Castiella. Ente elles s’acolumbra a la derecha un edificiu allargáu que-y llamaron la Casa Corea, onde s’asitiaben los primeros norteamericanos que vinieren pa Madrid; nun patiu de dientro ensayaba más sero Andrés Dobarro. Per detrás s’agüeya una especie de torre que ye’l depósitu d’agües de Sabela II, qu’aínda se caltién argutu ente los tascacielos de la faza. A la izquierda, a lo postreru, se ve La Ventilla; sicasí, la plaza de Cuatro Caminos, non, por culpa de que nun sal na semeya y taría en vértiz inferior esquierdu. Los neños d’entós conocíamos tolos requexos porque nun teníamos consoles y xugábemos peles cais: a la pelota, al rescate, a los banzaos o a lo que cuadrara. De caún d’estos llugares bien podría contar dalgún cuentu como los que conformen la vida de cualesquier paisanu…

CUENTU

     Voi contavos un cuentu curtiu, magar que Xerardu Diegu me dea col pie pa que nun lu faiga: Ello yera una vez un universu de seres munchu más pequeños que les formigues. Tan pequeños que naide yera quien a velos a güeyu. Nesi universu nun había paru y caún trabayaba na so xera. Lu más célebre del casu yera que tolos tayos diben en comuña pa un solo patrón que nun pagaba a la xente menudo y nin siquier se decataba de que los sos xornaleros de baldre esistíen.

     Esta foi la primer parte del cuentu… ¿Cómo qu’hubo dalgún que nun lu garró?, ¡mírate al espeyu!, ¿mandes daqué al enchufe?, ¿aú tienes asitiaes les piles?, ¡Coime, qué nun gastes! ¿y entós cómo furrules? Llee’l mio cuentu otra vegada porque tamién ye’l tuyu, ¡animal! (el que me conoz sabe que lu d’animal nun ye despeutivu). Los trabayadores, collaciu, son les tos célules y furrules gracies a elles y caúna sabe lu que tien que faer pa que tu espatuxes, aforfugues y reburdies.

Si te prestó la primer parte del cuentu, tate a la chisba que tien segunda y mui ceo l’asoleyaré.