Hai que tar preparáu

De la que merca la muyer, quedo afitáu nel escañu d'un centru de muebles nordés sorbiendo un capiechinu o escribayando dalguna caxigalina. Afáyome nesi requexu mentanto agüeyo la hora de Suecia o N. York nunos relós que colinguen d’una muria. Cavilgo que ye importante saber la hora que ye en Suecia o en N. York. Yá sé que vais aldericar que por qué. Aína voi retrucavos, ye que nun cayéis. Imaxinaivos que pasa una fema ya vos entruga:

—Señor, si vos plaz, sería quien a dicime la hora que ye en Suecia (o en N. York).

Entós, cucas con disimulu ya repostias de secute:

—Sí señora, son las dolce menos cuartu.

Ya quedes como un paisanu preparáu de verdá. ¿Daivos cuenta?

CAMÍN DE BUSEIRU

Camín de Buseiru,
camín de la nada,
cayóse’l parreiru,
paró la mayada.

Carril de !!amuerga,
muria de ferrial,
l’estayu y monserga
muerren nel bardial.

La carondia fura
cola soledá,
pela corte escura,
ensin mocedá.

De la prieta mina,
ronda la povisa,
nin cava, ni abina,
nin medra la nisa.

Nin canta’l nerbatu,
nin s’oye un rapaz,
ni esparde’l buatu,
nin la pación naz.

Sólo la curuxa
anidia na muela,
ta faciendo duxa
al ferre que vuela.

Yá nun ta nel mapa,
namái na memoria,
fíncase la zapa,
acuta la coria.

Naide de Buseiru,
yá cala anque !!ueva,
si en mayu o xineiru,
chispia en Villanueva.