lunes, 6 de junio de 2011

CAMÍN DE BUSEIRU



Camín de Buseiru,
camín de la nada,
cayóse’l parreiru,
paró la mayada.

Carril de !!amuerga,
muria de ferrial,
l’estayu y monserga
muerren nel bardial.

La carondia fura
cola soledá,
pela corte escura,
ensin mocedá.

De la prieta mina,
ronda la povisa,
nin cava, ni abina,
nin medra la nisa.

Nin canta’l nerbatu,
nin s’oye un rapaz,
ni esparde’l buatu,
nin la pación naz.

Sólo la curuxa
anidia na muela,
ta faciendo duxa
al ferre que vuela.

Yá nun ta nel mapa,
namái na memoria,
fíncase la zapa,
acuta la coria.

Naide de Buseiru,
yá cala anque !!ueva,
si en mayu o xineiru,
chispia en Villanueva.

No hay comentarios:

Publicar un comentario