Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

martes, 24 de julio de 2012

Euromillones


Güei, 24 de xunetu, compruebo con pachorra la combinación ganadora nel sortéu nº 59 de los Euromillones. Como de costume, nun atiné con nengún númberu nin con nenguna estrella. Esto llévame a enfotame nos mios cayimientos sobre si somos una civilización iguada por otra civilización cimera y tánse quedando conmigo. Sicasí, pa nun sigui-yos enforma'l xuegu, davezu namái relleno un apueste; esto ye, los cinco númberos d'una tabla cimera y los dos pronósticos estelares d'otra tabla d’embaxo. De cutiu, ruempo'l resguardu enantes de comprobalu, de magar que la esperiencia sofítame en que nun ye precisu faelo. Amás, toi considerando cubrir el boletu y nun validalu; d'esa miente, voi corresponder a les atenciones recibíes de los nuesos supuestos guíes. D’otra mena, yo vos encamiento ser más intelixentes y tratar de llegar a dalgún tipu d’alcuerdu con ellos. El contautu podría desendolcase por tresmisión estrasensorial o, si ésta nun furrula, esponiéndolo al altu la lleva. Ye posible qu'ellos nos vixilen dende otra realidá paralela y atópense tentaos pola alianza. A lo postrero, aconséyovos que-yos ufiertéis dir a medies. Yo, pela mio parte, nun voi ser quien a intentalo yá que, si m’agüeya la mio muyer, va refertame por tar falando solo de nuevu con dalgún residencial ingresu.

No hay comentarios:

Publicar un comentario