Milonga contra asturianu,
milonga del antibable,
milonga contra’l paisanu,
la milonga indeseable.
Cántanla cola guitarra
lo mesmu que rabilando,
cola so voz de cigarra,
pero siempre machucando.
Milonga del que nun sabe,
milonga del repunante,
milonga na que nun cabe
entrugar al informante.
Nun ye gauchu’l que la entona,
sinón el que pega estopa,
sordu como una tamona,
que forga como garlopa.
Milonga d’aquel qu’enantes
procurara’l desaniciu,
milonga pa que t’espantes
y pa sacate de quiciu.
Milonga la del condáu,
la qu'al reinu fora impuesta,
que glaya l’interesáu
sofitáu pola so orquesta.
Milonga contra derechu,
milonga contra’l raigañu,
milonga que cafia a trechu,
compuesta pa faer dañu.
No hay comentarios:
Publicar un comentario