El reló que nun tien priesa
de la estación amariella
afáyase ente la fresa
ya abluca a cualquier reciella.
Lu vi porque m’avisara,
m’avisara al soconsciente,
sinón nin me decatara,
tenéilu toos presente.
Dempués xubiera a San Tisu,
baxé cuando me petó,
garré’l tren sin previu avisu,
porque dirixe’l reló.
Yá nun te manda una esfera
nin t’alloria un minuteru,
vas llegar a la to xera
tan ceo como’l primeru.
Magar venga con retrasu
el convói de vía estrecha,
yá sabes: nun faigas casu,
anque acarries bien de trecha.
A ventisiete d’altor,
al sele y a la bisueña,
da esa hora ensin remor,
baxo la Cueva la Peña.
No hay comentarios:
Publicar un comentario