COL MAXÍN EN TINÉU

Pela nueite eiquí na villa,
sintiendo radiu Llangréu,
escuito a Toli Morilla,
col mio maxín en Tinéu.

Camino per cualquier faza,
bebo agua na Troxera;
esguilo la Xinestaza,
bei!!o, per Santiago, en Xera.

Crucio fasta Rozadie!!a
ya ximiélgase la ponte,
galguio tras de la bonie!!a,
enfréscome cola fonte.

L.lindo vacas na Pruida,
xubo fasta l'altu’l Visu;
presta’l suañu, pola vida,
tanto, qu’escápame’l risu.

Ensin l’Arbolín de Loxa
ya la Fayona d’Eiros,
la tayuela quedó coxa,
ya nun valen carpinteiros.

Asina al finar el día,
col atapecer, darréu,
esnalo cola poesía
pelas viescas de Tinéu.

(!! = ch vaqueira)