ESCOMUNIÓN Y DESANICIU

Yá que namás el Papa, cuando fala “Ex Cátedra”, ye infalible en dogmas de Fe, tenemos d'esculpar al Arzobispáu de Valencia, que nel so consultoriu web –siempres según el diariu 20 Minutos, del 8 de marzu– manifiesta ya inclusive certifica que'l toréu nun ye pecáu. Sería conveniente recordar al respeutive que la Ilesia amosóse contraria a estos espectáculos de muerte y vanidá humana, como se ve na Bulda promulgada'l 1 de payares de 1567 por San Pío V. La Bulda «De Salutis Gregis Dominici» diznos: «Considerando qu'estos espectáculos taurinos nun tienen nada que ver cola piedá y caridá cristiana y queriendo abolir estos espectáculos bederres y vergoñosos, non d'homes sinón del demoniu, prohibimos-ys so pena d'escomunión a los que consienten la celebración d'estos espectáculos nos que se cuerren gües y otres fieres nos llugares onde se lleve a cabu». «Y si dalgún morriera ellí nun se-y da sepultura eclesiástica. Refugamos so pena d'escomunión que los clérigos que recibieren ordes sagraes tomen parte nestos espectáculos. Queden prohibíes les corríes de gües anque sían n'honor de los santos o dalguna solemnidá o festividá de la Ilesia, les que tienen de celebrase con allabancies divines, allegría espiritual y obres piadoses y non con esta clas de xareos». Per otru llau, en 1920 el secretariu d'Estáu del Vaticanu, cardenal Gasparri, escribió que «la Ilesia sigue condergando en voz alto, como fixera La so Santidá Pío V, estos sangrinos espectáculos». Talamente, según la investigación histórica de monseñor Cancianí, tolos qu'avecen estes folixes como actores o espectadores, tán escomulgaos (“Diariu 16”, 5 de xunu de 1989). Xuan Pablo II faciendo usu de la Biblia recuerda que «l'home salíu de les manes de Dios, resulta solidariu colos otros seres vivientes» como apaez nos salmos 103 y 104, onde nun se fai distinción ente los homes y los animales. Tamién tien de recordase que para San Francisco los animales yeren los nuesos hermanos.

Queden pos escomulgaos tolos toreros, picadores, banderilleros y taurinos, sían clérigos o seglares.

Convendría esclariar, pa información de dellos críticos o aficionaos a estes males artes, qu'autu xustifiquen la so afición sofitándose nuna trafulcada Ética, qu'ésta ye la parte de la Filosofía que s'ocupa de la Moral de los actos humanos. La Moral refier a la mesma Conciencia interna del individuu, y la Conciencia ye la conocencia interior del bien y del mal. El que se torture y axusticie un ser vivu buscando la folixa propia en dicha aición ta bramente “mal”. Queda pos infundáu'l so argumentu. De la mesma, nun ye razonable someter a votación la continuidá de la tortura de los gües, éstos son seres vivos inocentes de toa culpa y nun tienen de ser llaceriaos; poro, esa sangrina celebración tien de ser desaniciada dafechu. ¿Imaxínense un referéndum nel que tolos españoles tuviéramos d'alcuerdu n'executar a los paisanos d'una determinada aldega?, sería una decisión democrática; pero, nin xusta nin ética.

Quiero finar, porfiando a la Sra. Presidenta de la Comunidá de Madrid en que la tortura nun ye arte nin cultura, y encamentando al restu d'aficionaos a la tauromaquia que distrayan les sos miseries ensin mancar a otres especies.