Pon les barbes a remoyar

(Soleya Rioderradeiro)

     Nueve alimentos básicos s’encarecieron más del 20 % nel caberu añu: peres, el 57 %; pataques, el 44 %; el saín, el 33 %... Amás anuncien una cuarta xubida de la lluz anguaño; mentanto, tasen en namái el 0,25 % la qu'ufiertaran a los pensionistes. Los alderiques de la oposición son refugaos col “y tu más”. Seique los sindicatos tan enredaos n’otres cuestiones fediondes. D’esta miente, a los vieyos nun-yos va a quedar más salida que tornar al refuxu y pa gastar un rispiu menos, ocupar biblioteques, consultorios, centros sociales y estaciones; sicasí en delles van tener que llevar la bacinilla pos van cobrar tamién por mexar. Lu que nun paez garrar el Gobiernu ye que los xubilaos —que son munchos— nun son fatos nin escaecen les conxelaciones y yá esbarrumbaron enantes al PSOE. Asina qu'o camudes d'actitú o pon les tos barbes a remoyar.