Nun saliera pela redolada, recién tornáu del Xapón, porque
daben lluvies magar qu’ anecia’l cielu ralu tol día. Miéntennos fasta col
tiempu. Asina que tuvi colingando nel Feisbuc la estaya fotográfica https://www.facebook.com/jose.r.perez.503?ref=tn_tnmn
que, como unviáu especial, fixera del
viaxe de Rajoy. Foi'l casu que’l trabayu surtiera dixebráu por culpa de que nel
intre sonara’l teléfanu y un atentu emplegáu de Xunión Llétrica Fenosa me
comunica que van rebáxame'l fixu’l recibu a la metá. Y-doi les gracies al
despidime y enantes, s’apura y m’ufierta un serviciu de caltenimientu amestáu.
Entós-y retruco que nun-yos voi mercar nada porque nos tienen tiesos y naspaos
a causa de que nos xubieron cuatro vegaes la lluz nel añu acordies col gobiernu
de turnu qu’aporfia en encarecenos too. Arriendes-y aldericó qu’espete a los
sos patronos que'l día en que los veceros, trabayadores y pensionistes, nos
pongamos d’alcuerdo vamos dexar de rindir y de pagar les sos imposiciones y
esto va arreventar. En resultancia, que lu sepa’l presidente de la compañía, el
del gobiernu actual, el que tuvo enantes, la oposición y los que tienen puesta
la falcatrúa nel contador: qu'anden pelo segao y dexen de cafiar, que fai
cuantayá que tamos fartos de que vivan como reis mentanto calcañen sobro los
nuesos llombos y esti país pue españar.
No hay comentarios:
Publicar un comentario