El primer
discu que sentimos en casa fora un vinilu de los Xey nel que taba allugáu'l
cantar de “Fui al Cristu y namoréme”. Hai mui bien d’años daquella, el mio
hermanu acarretó’l tocadiscos Dual, lu afitó nun llugar patente y entamó a
coneutar cables. Dempués lu enchufó a la rede y ¡maxa!: l’aparatu comenzó a
sonar al altu la lleva. Los graves espardíen la solombra nuna pantalla de lluz
verdina como la mesma yerba d’Asturies que yera una atracción cola lluz
apagada. Yo nun yera quien a dexar d’agüeyala. Finamos ablucaos cola audición
d’aquellos sones tan prestosos y escosamos un rispiu de la ilusión, d’esa
ilusión que va camudando de la que nos avezamos a lo que tenemos y siempres
queremos más; sicasí, aquel día arreventábamos d’ella.
No hay comentarios:
Publicar un comentario