Inorantes

Inoráu por inorantes,

nun espublizó les obres,

mientres trunfen los farsantes,

tantu vales, tantu cobres.

Ansí ye la poesía,

morriera na probitú,

por aciu una apoplexía,

intenta imita-y, tu.

¡Qué dura ye la vida

d’aquel que fuye de lu establecíu,

y sigue la escondida

sienda, ensin avíu,

de raros poetes de versu escoyíu;

que nun l’enturbien l’arca

inorantes soberbiosos dirixentes,

nin de dorada marca

aceuta pretendientes

de los que manipulien a les xentes!

Nun importa la fama

callada del so nome pregonera,

ayén si−y encarama

la llingua falaguera

que nun garra poesía verdadera.

La xubida la lluz

 

¡Por Taranis y por Isis!

Teo descomposición

por aciu la electrolisis

que sufro ensin compasión.

D’entamu taba compuestu,

por culpa tanta xubida,

a retorciñón y al cestu,

descompónenme la vida.

Lliberáronme electrones,

cola carga negativa,

mira que tienen cationes

y fonte desaprensiva.

El recibu ye patóxenu,

cáusame ruina ya andancia,

porque nun produzo hidróxenu

y queden tola ganancia.

Col mio carecer diariu,

cuidáu que nun soi políticu,

nunca seré secretariu

y remanezo raquíticu.

Al nun furrular la cona,

somórguiome ente la xente,

sin envidiar al Carmona,

nin siquiera al presidente.

Magar nun me gusta un pelu,

la descarga ye mui fuerte,

alvertíenlu en cartelu:

Tas en peligru de muerte.

La más guapa neña

La más guapa neña

del nuesu llugar

cata, pica lleña,

xunce y va a segar,

viendo que los güeyos

qu’a la lloria van,

por acio los vieyos,

qu’anguaño nun tan.

Dexáime llorar

xunto al balagar.

Dicía’l so güelu,

na so tienra edá,

llárimes del cielu,

na so mocedá,

tiénenme encantáu,

¿quién la ensugará?

siendo yo pasáu,

cuando nun tea yá,

Dexáime llorar,

arroxando’l llar.

De llorar camuden,

güeyos de güei más,

si acaso recuden

de la que te vas.

Mio ñeta querida,

igua d’alifaz,

cura de firida,

na mio muerte, paz.

Dexáime llorar,

al dir a marchar.

 Nel requexu más desamparáu de la barriada, en faza de camín esclusiva para aquellos que se perdíen, vivía namái que del vientu'l vendedor de veletes. L'aire yera'l so aliáu y pocu menos que sosistía d'ésti. Dispunxo achaplar y dar forma al fierro un día en que cansara de tar paráu. Malapenes vendía veletes; sicasí, nun gastaba en casi nada. Les formes caprichoses del metal esbariaben de les basories, de la so imaxinación y, más sero, de los teyaos. Podría asegurase qu'estos artefautos cobraben vida una vez remataos, escuclando impasibles la so nueva contorna mientres añoraben la ruina fragua de Quintín, qu'asina se llamaba esti desafortunáu artesanu. El taller formaba parte de la minúscula casa a la que s’alcontraba apegáu. Fuera, una elevada valla torgaba la observación de la manufactura. Ente los vecinos, había quien consideraba a Quintín un paisanu fuera de dómina. Tenía Quintín un perru que s'asitiaba perennemente a la vera de la ferramienta y de les ferriales pieces como defendiendo esi menudu material. Nun falaba con naide; masina porque nun salía al esterior que por introvertíu. Razón pola que naide lu echo en falta’l día en que, acompañáu del so can, tomó la direición que-y señalaba'l pitu ferruñosu, la cabera veleta que compunxera y qu'abandonó pa nun tornar enxamás.

63Cady Fernández Miranda, Nel Anxel Gonzalez Fuentes y 61 personas más

11 comentarios

1 vez compartido

Me gusta

Comentar

Compartir

Mesa billateral

Esiximos al Gobiernu,

el de Madrid capital,

fartos de llevar mal ternu,

la mesa billateral.

Aceuten el pidimientu,

ponga les piles, Barbón,

nun nos falta l’argumentu,

tenemos igual razón.

Nun valen esparabanes,

convocaremos consulta,

igual que los catalanes,

si l’agraviu nos insulta.

Los puntos son namás tres,

nun algamen pa una quiebra,

nun dexen pa punta’l mes,

pa que nun haiga dixebra.

La contestación, apriesa,

esti ye’l nuesu xantaxe,

que llantamos nesa mesa:

Desaniciu del peaxe

de l’autovía del Güerna

y llanten el ramu anguaño

a la Variante Payares.

¡Valió yá de tantu apañu!

Arriendes, la de La Espina,

inauguren talamente,

de la qu’esti añu fina,

que pruye’l suroccidente.

Cuando escribas poesía...

 Cuando escribas poesía,

nun cantes siempre al amor,

porque ye’l clixé del día

y ya güel a coliflor.

Tienes que variar de tema,

gasta figura y recursu,

que’l que varáu versu sema

va ayén a tou concursu.

Fala del home y la tierra,

del animal ya’l futuru,

de la paz y de la guerra,

d’albentestate y del muru.

D’esi neñu que carez,

d’esti mundiu qu’aforfuga,

de tolo que te paez,

de murnia, allegría y muga.

D’aquel cantar de raigañu,

d’esi vieyu del llugar,

de lo que soñesti en suañu,

del pozu y del balagar.

Sobro aquellos guapos sones,

l’alcordanza d’una fiesta,

sobro apareyos y cones

o los viaxes en Vespa.

Del xaréu cola avería,

que güei ye namái comedia,

espurre esa poesía,

qu’al maxín l’amor asedia.

Adulces

 Cataluña asume la mayor liberación de peajes en plena operación diálogo

La autopista con mayor tráfico de España y la más antigua pasan a ser gratuitas este miércoles. (El País, 30.8.21)

¡Mialma, cómo furrulen los xantaxes! Zapatero yá nos prometió nes eleiciones del 2004 el desaniciu del peaxe de la d'AUCALSA, pero, como equí nun amenazamos cola dixebra, la promesa quedó en cuentu. Arriendes, pa dir o venir de Madrid, tamién carecemos lu d’Adardineru. D’otra miente, van apurrir 1700 millones pal aeropuertu del Prat, mientres el ramu del furacu del Tren del Añu que Vien, se retrasa agora pal 2023. Siguimos más “despacín” que’l Fonsi.

(Semeya, El País)

Pancín

 

Ayeri foi’l Día’l Gatu,

mañana será’l del Fatu,

al naide dicime nada

nun llanté yo esta encoplada…

___________________

Soi fíu de Rufina,

vivo onde Pin,

mexo nuna esquina,

soi mui menudín.

 

Nun llavé’l focicu,

porque entá nun sé,

al ser pataricu,

polo que se ve.

 

Tampoco, los güeyos,

ando llagañosu,

refugo trafueyos,

carezo d’anoxu.

 

Soi pardu, soi pintu

y tamién mariellu,

anque non retintu,

blancu en pata y cuellu.

 

Soi de colorinos,

como arcu la vieya,

gusto a los neñinos,

a tola reciella.

 

Duermo nun requexu,

cúriame mio ma,

nun probara’l quexu,

de mamar me da.

 

D’entamu, nun platu,

güei m’apurrió Pin:

croquetes de gatu,

mestura y pancín.

La nota

 

     Siguiera dando la nota por llibre. Acarretábanos el Metro de Madrid a esaminanos a un llugar estrañu con caderalgos desconocíos ya aventábemos la medrana cantando cantares de los guah.es d’aquella dómina. Como tampoco calteníamos odiu nin xacíu pa odiar y en casa naide t'esclariara lu que se careciera nun pasáu recién fora quien a sobresalir na asignatura del espíritu de los otros. La ilesia encomendábate  la so doctrina ya arriendes nun me torgara de sacar una matrícula d’honor na so relixón. Esa educación que mamara de los mios pas me consintiera falar con xentes de dambos bandos y nun refugar a nengún paisanu por culpa de la so tendencia; sicasí, fui yo mesmu’l que rindiera de los radicalismos y separtara de les andeches cuando se falaba de política porque cavilgo que nun xenera más qu’esi odiu que nunca amosamos nel nuesu llar.

La condición humana

 

¿Sois a creyer qu’allá pel añu de 1965 yera alumnu llibre? Pa mio idea, yo, enxamás tuviera esa condición, nin siquiera la de notable que m’endilgara’l Secretariu del Tribunal que debía ser abondo importante yá que s’imprentaba con mayúscules. Daquella había muncha xente importante, armada y poderosa. Nós nada nun teníamos por culpa qu’al mio pá−y pañaren tolos cuartos qu’aforrara por allugase na faza contraria a la de los ganadores de l’amarraza.  Yéramos probes de solemnidá y por nun tener nun teníamos nin envidia; sicasí, a naide pidíamos nada. Nin que dicir tien que nós, escontra forga, tampoco robábamos. Anguaño tol mundiu pide o envidia y cuasi tol mundiu roba o ocupa. Hai probes que yá nun son de solemnidá, sinón que son d’oficiu. Ye’l casu que s’enteraron n’otros países nos que nun tienen nengún respetu pa colos lladronos o pinxonos y se vienen pa equí a arrampuñar en cuadriella. Ta perclaru qu’a la bonaz. De resultes, la xente honrada paez que nunca será quien a espolletar, ensin querer referime a los idealistes y políticos que camuden los sos ideales y el so odiu pol puestín o'l dineru, o por dambes coses a un tiempu. Esta ye la “so” condición: la condición humana. Podéis caltenevos argutos.

Corquiéu y Ribeseya

 

Taba tancáu’l Corquiéu,

el Corquiéu taba zarráu,

col so chigre ensin xaréu

y el paséu del cai cambiáu.

 

Nin siquiera un xaponés

cantaba Ribeseyana,

ye un mal añu, ye un mal mes,

col andanciu na solana.

 

Hai bien d’años que nun diba,

calteníase La Guía,

cola virxe ellí enriba

ya allá lloñe, Guadamía.

 

Equí corrí la noviada,

d’equí colara a Cuadonga,

aguantamos la boriada

y xubiéramos a Ponga.

 

Cavilgamos ente peñes,

pela faza del Infiernu,

qu’escaecimos Tereñes,

Vega y el Camín en ciernu.

 

Tornaremos otra vez,

como’l ríu pela oriella,

onde cola mar se mez,

afayando en Ribeseya.

 

Pa entós tocará Corquiéu,

anque seya n’Atalaya,

Lluci entonará d’abéu

y Pin esfrutará a esgaya.

Al presidente de Perú

Tando yo la selmana pasada pel monte sintiera que’l nuevu presidente del Perú de los peruanos espetara a los convidaos de piedra españoles na so toma de posesión que “mientres los tres sieglos que pertenecieron a la corona española esta dexó esplotar los minerales que sofitaron el desenvolvimientu d'Europa”. Ye’l casu que, como la nuesa delegación nun aldericó nada, voi retrucar yo a esi cabezaleru de tan escomunal sombreru…

Sr. Castiellu Tarrones: Los romanos, munchos sieglos enantes, yá llevaben l’oru del noroeste d'España por tonelaes ya enxamás reclamamos nada nin a los italianos nin a los suevos nin a los vándalos nin a los alanos. Anguaño, una compañía del norte del so continente páñanos l’oru y contamina la faza per onde estraye n’Asturies ya arriendes quier meter mano a la mayor reserva d’Europa occidental d’esti metal, que tamién s’alcuentra nesta comunidá, ensin que la nuesa alministración tampoco lu refugue. D’otra miente, repostia−y –por si nun lu sabe− que n’España (con cuasi 4 millones de paraos) viven más d’un cuartu de millón de peruanos ensin colonizar, más otros dellos milenta nacionalizaos españoles. Por aciu d’ello se m’abulta que, dacuando en vez, l’ala del sombreru nun nos dexa ver la viesca.

Muitas gracias

 Como vien asocediendo davezu, la censura'l Feisbuc me torgóu d'estimar a bien d'amigos la súa felicitación pol miou cumpleaños. Por aciu d’ello voi dedicar esti poema a Marcelino Marcos Lindez, José Ramón Feito Lorences, Carlos Fernández Mayo, Manuel Angel Menéndez Iglesias ya outros paisanos de Tinéu que me felicitanon daquella.

Una maraviya,

la meyor d’España,

Tinéu por villa,

Tinéu por braña.

 

Con melguera vista,

ía la más tranquila,

anicia la llista,

el conde la enfila.

 

Ía la más galana

ya la más prestosa,

s’agüeya la Fana,

la nublina pousa.

 

Ta sobro un cairel,

pero ía una estrella,

arrogante, él,

la más guapa, ella.

 

Tinéu ía historia,

sou home, valiente.

Tinéu, la gloria

del nuesu occidente.

 

Na sienda del cielu,

Camín Xacobéu,

rosada por velu,

l’edén ye Tinéu.

 

Foi dende otra data,

cola cruz por signu,

blasón del pirata

ya esti’l nuesu himnu.

 

Montes, praos ya murias,

col verde a degüellu.

Suerte ser d’Asturias,

más d’esti conceyu.

 

Sensibilidá

 Fixéronme ayeri una endodoncia y la dentista, que yera abondo moza, tuvo qu’espetame tres veces l’aguya pa inyectame otres tantes l’anestesia y de resultes abuitame enforma la quexada. Darréu, la sida de la odontóloga dexóme entá más ablucáu y cavilgando: “Tien que me perdonar, pero ye que nun soi a finar cola so sensibilidá”.

 

Paeza bien o paeza mal,

ensin nenguna elección,

vacúnase nel Zendal

a esgaya de población.

 

Ellí nel mediu de nada

y abondo mal señaláu

llega la xente a porrada

y aparca nel escampáu.

 

Pa torgar la nueva fola

va con paciencia infinita

al Zendal a facer cola,

onde−y mandó la cita.

 

Alredor del so perímetru

hai percorrer un kilómetru,

tres pagar lo del taxímetru

o venir de lloñe en Metru.

 

Pa nun rodiar l’hospital,

meyor eches un pigazu

y vas de nueche al Zendal,

evitando ansí un solazu.