Faltón

 ¡Llei, si sabes lleer, faltón! Porque arriendes d’inorante (nun tien conocencies de lu que ta falando) yes faltón (que trata ensin respetu). Talamente como los otros faltones, cola “f” d'una llingua que foi la oficial del reinu mientres dos sieglos y qu’amuesa nun ser dialectu: Fachendosos, fadiosos, faladeros, falambaldres, falanciosos, falancieros, faldetes, faldoteros, fálicos, falifos, faligotes, falsos, faltosos, fallaos, fallicos, fallíos, falseros, fanáticos, faltriqueros, fandangueros, fandosques, fanegueros, faniegones, fantasiosos, fañagüetos, faragayos, fardeles, farfantones, farfayes, farfullones, fargatientos, fargatones, fargayos, fariellones, fariñones, faroleros, farramplinos, farrapios, farrucos, fartones, farxoletes, farxolos, fatos, faxineros, fayaos, figures, felpeyos, feltrones, ferieros, ferraos, ferres, ferretes, ferrones, ferruñentos, ferruñosos, festeros, fexes, fiascos, fiastros, filanderos, filtrayes, finos, fisgones, fiadores, fiyascos, fiastros, flexes, floxos d'aguyes, flonderos, focetos, focicones, focicudos, fogardines, fuinos, folgazanes, folgones, folguetes, folixeros, fongosos, fónicos, foniles, foranos, foriatos, forfugues, forgaxes, foriones, forres, foscos, fosqueros, frangüesos, fresqueros, frixuelos, fuinos, fuleros, fumiacos, fungones, fuñones, furabollos, furones…

¿Son inventu: Abarca, abeduriu, argaña, árgoma, arroxu, artu, balagar, bálagu, baniella, bidul, berciu bilortu, biruéganu, borona, bouza, brenga, cachiparru, camba, cándanu, carbayu, caspiu, combayar, cotolla, cuetu, embueza, engarabecer, gamayu, gamón, gamonita, ganzu, garabatu, gárabu, garabuyu, guarar, güelga, llamera, llamuerga, llastra, matu, magüetu, touzu, toza, veiga, adobar, angazu, bandón, enaspar, escanciar, esgadañar, esparabán, espetu, esquirpia, gabitu, gabiñón, gadaña, golupa, guarecer, llata, ripia, rueca, sala, triscar…?

Nun te voi mentar pa nun endilgate más fama de la que garres caciplando, magar que curiate de lu que reburdies yá que l’odiu sí pue tar penáu con cárcel.

Todas las reacciones:

82Angeles Rodriguez Perez, Nel Anxel Gonzalez Fuentes y 80 personas más

Xuaquira

¡Ayudáime a alcontrar a Xuaquira!

 

Robáronme la burra,

cola so albarda,

la mio burra tan curra,

tan nidia y parda.

 

Amás de la mio neña,

la cabezada,

nun dexaron nin seña,

buelga nin nada.

 

Si la viera un collaciu

que dea noticia,

que toi perdiendo’l xaciu

por esa picia.

 

Si la viera un paisanu

que me lu cuente,

del oriente llonxanu

o d’occidente.

 

Y, si nun−y conozo,

me val tamién,

porque tien puesto’l bozu,

nun come bien.

 

Que voi da−y premiu abondo

pola pollina,

al dir vender un fondu

de la vecina.

 

Anque nun me factura

nin va de xira,

ye l’ausencia mui dura

de la Xuaquira.

Atila

 Munchu se falara sobre l’orixe de Pelayu y nada se supo exautamente; sicasí, una pista nos la pue aportar la etimoloxía del nome del so fíu Favila. Esta pallabra vien de falwa, faffila…, y según los mios caberos estudios del mesmu rei de los Hunos, Atila. Pue sonar a coña, pero una documentación encriptada qu’atopé cavando perbaxo d’esti cartelu de l’autovía m'amosó lu que yá se m’abultaba. Arriendes, esi mesmu avisu conmemora l’allegada d’esi monarca per esi camín con 66 de los sos homes y el so pariente Rugila a Asturies. Foi’l casu que fui quien a poneme en contautu con una sociedá mui secreta que se caltién dende entós y que me lu esclariara dafechu. Por culpa d’ello, perafítase qu’onde calquen dellos de los nuesos caballos, testerones y machos nun vuelve a espoxigar el yerbáu.

¡MUNCHES FELICIDAES!, ¡MUITAS FELICIDAES!

Punxera yá’l nacimientu,

san Xosé fendió la vara,

la fragua la llevó’l vientu

y el neñu emporcó la cara.

 

Al güei−y cayera un cuernu,

teo escondíu un romanu,

non pol fríu del iviernu,

ye que−y falta una mano.

 

Nun topara al rei Gaspar,

frayó la pata un camellu,

la estrella nun fui a pegar

porque nun m’apega’l cellu.

 

La pita que caltién tiesta,

namái tien una patuca,

nun hai mofu nin xiniesta,

paez urxencies del Huca.

 

Llanté too n’antoxana

y riñóme la muyer:

Nun queda figura sana,

ye meyor nun lu poner.

 

Obedecí por respetu,

yá lu asitié en delles caxes

y fui a mercar un abetu

de plásticu nes rebaxes.

 

Nun sé sí pola seronda,

−y va cayendo la fueya,

la Navidá ye la monda,

pero nun m’afayo nella.

 

Comí un cachu de turrón

y manquéme nuna muela,

nun sé sí escapar pa Ounón

o arrequexar per La Puela.

 

 

 

 

 

 

Vivo ensin vir en min

 Nun algamo’l metaversu

porque soi vieyu y mui neciu,

escribo y vivo nel versu,

por nun tener partu reciu.

Fui quedando desfasáu,

nun me dio por engatar,

afayo col qu’anda al llau,

si nun me vien a cafiar.

Nun gasto móvil nin xoyes,

siempres merco con dineru,

nun teo faza en Margolles,

refugo ser llimosneru.

Vivo cola soledá

y tamién cola Miercedes,

pago d’otros, caridá,

me salgo per sal si puedes.

Teo bien de tatuaxes,

magar que nun son de tinta,

son de firíes ya ultraxes

de xentes de mala pinta.

Teo collacios pollinos

ya amigos que son mui burros,

gusten que−yos pague vinos

o que−yos convide a churros.

Vivo ensin vivir en min,

pero nun aguardo gociu,

faigo pel monte camín,

de papu, nin tuvi bociu.

Pleitesía

 

Siguimos siendo vasallos,

que debemos pleitesía

a llicenciaos y a babayos,

y al xuez, que ye señoría.

Al mélicu, que ye doctor,

al xeneral, por vuecencia,

a tol que vive n’altor

y tamién a la eminencia.

Al que s’afaya estrelláu,

al encargáu, que ye don,

al del Congresu y Senáu,

al rei y al del Perignon.

Al qu’acarreta pistola,

a tol qu’atropa bayura,

al alcalde de La Pola,

al papa, l’obispu y cura.

Magar seyan inorantes

y ¡curiáu col del partíu!,

nun podíes falar antes,

agora ye paecíu.

El paisanu foi llacayu

ya anguaño lu anecia en ser,

de tol qu’enchipa, más gayu,

de tol que tien el poder.

El camín escaecíu

 

Hai un camín escaecíu

nuna lloría de nada

y un molín d’ensuchu ríu

con alcordances na estrada.

Hai un silenciu que fala,

hai un monte que s’abrasa,

baxo un ferre qu’entá esnala

sobro la sabla la basa.

Na viesca sume’l sumiciu,

igual que sume la viesca,

la planta llámase a viciu

y toos quemen como esca.

Hai una tribu paisanos

repartíos pel conceyu,

son los indios asturianos,

si unu vieyu, otru más vieyu.

Yá nun armen la partida,

andechen d’ambulatoriu,

la pelleya ye firida

col sanamientu nel noriu.

Nun hai chigre abenayá,

la chigrera coló al cielu,

l’estragal bien tancáu ta,

la murnia muerre de duelu.

Cuando esi camín abonda

ya’l mozu abandona’l llar,

camines la pena fonda

y pesa más el pesar.

El reló que nun tien priesa

El reló que nun tien priesa

de la estación amariella

afáyase ente la fresa

ya abluca a cualquier reciella.

Da la hora de nenyures

y del tiempu se fai l’amu,

lu fai pa que nun t’apures,

en San Román de Candamu.

Lu vi porque m’avisara,

m’avisara al soconsciente,

sinón nin me decatara,

tenéilu toos presente.

Dempués xubiera a San Tisu,

baxé cuando me petó,

garré’l tren sin previu avisu,

porque dirixe’l reló.

Yá nun te manda una esfera

nin t’alloria un minuteru,

vas llegar a la to xera

tan ceo como’l primeru.

Magar venga con retrasu

el convói de vía estrecha,

yá sabes: nun faigas casu,

anque acarries bien de trecha.

A ventisiete d’altor,

al sele y a la bisueña,

da esa hora ensin remor,

baxo la Cueva la Peña.

Flacu como un arna

 

Yera flacu como un arna,

sin necesidá de placa,

−y estremabes la cadarma,

coles mesmes, tamién flaca.

El so güesu yera estiella,

seique al cimblase runfaba,

pueque envidiara la trueya,

sin buelga, cuando pasaba.

D’igual quexada, Quixote,

siempre papaba a la carta,

nunca chupaba del bote,

nunca algamaba la tarta.

La carta, carta más alta,

sorteada ente afamiaos,

que rematara la malta

tomada ente maltomaos.

Valtaba con airón fuerte,

fíu de la caridá,

de tener, nin tenía suerte,

arriendes, nin tenía allá.

Yera flacu como un arna,

el que lu diz nun te miente,

nin l’ácaru de la sarna

foi quien a clava−y el diente.

Tres pollinos

Trés pollinos, madre, tres de la paré,

trés pollinos, madre, tres de la paré,

tien esa paré, tien esa paré,

como tan posando, foto−yos fairé.

De pie, de pie, tan toos de pie,

de pie, de pie, tan toos de pie,

allugaos de pie, afitaos de pie,

como tan quietinos, foto−yos fairé.

Dábales solombra, enfrescábense,

y mientres moscaben y moscábense,

afayábense, afayábense,

tres semeyes, diantre, sé que−yos tiré.

Abríi la portiella que vos vengo a ver,

abríi la portiella que vos vengo a ver,

vos traigo pan duru, veníi a pacer,

amás d’alcacer, amás d’alcacer.

L'ACEBU

 Santina, la de L'Acebu,

tienes el tronu en natura,

pal más vieyu ya pal nuevu,

tu yes la virxe más pura.

¡Viva esta virxe serrana

y tamién, la Madalena!

Si vies con noxu en mañana,

marches de tarde ensin pena.

Nun hai n’España santina,

santina tan milagrera,

dende la primer mocina,

sanara xente con xera.

De neno, sentáu nun bancu,

contra atrás cayí de llombu,

salvé’l ribayu o barrancu

ya nun aportara combu.

¡Viva L’Acebu y la cruz

ya’l so partíu de Sierra!,

onde la promesa aduz

per esa bendita cerra.

Quiero gritar: Viva Grau

 

Quiero gritar: ¡Viva Grau!,

¡viva Báscones ya Ambás!,

La Mata, con Grau al llau,

Sorribas y Villandás.

¡Viva Berció y Cabruñana!,

¡viva Castañéu y Cuaya!

con Santa María y Sama,

que tán d’Uviéu na raya.

¡Viva El Freisnu y Peñaflor!,

Las Villas y esa Pereda,

¡viva Tolinas, n’altor!,

con Teverga na maeda.

¡Viva Restiellu y Rañeces!,

¡mialma!, ¡viva Rodiles!,

onde xubí bien de veces,

per caminos y carriles.

¡Viva San Xuan y Vigaña!,

y Santianes de Molenes,

ye afamada en toa España

esa panera que tienes.

¡Viva Vayu y Samartín!,

nun escaeceré a Rubianu,

amás de Villamarín

y el despobláu San Adrianu.

Voi a glayar: ¡Viva Grau!,

polas sos guapas parroquias,

la güerta y el so mercáu,

y pola villa, que boquias.

Roberto Carlos La distancia karaoke

Dicen que la distancia ye escaezu. Tamién, l’espaciu o intervalu de llugar o de tiempu que media ente dos coses o acontecimientos. Garra’l karaoke d’esti cantar y canta al unísonu conmigo esta torna al asturianu qu’encoplé a los mios deleres pa terciar esa distancia que nos separta y desabrite de la mesma vida.

Nunca más sentisti tu falar de mi,

mentanto yo siguí pensando en ti

con tola señaldá que me quedó,

munchu tiempu trescurrió

ya enxamás t'escaecí.

Cuántes veces yo pensé volver

y dicite que’l mio amor nun camudó,

pero’l mio xacíu amenorgó

y na distancia día a día muerre’l ser

ensin tu lu saber.

El restu d'esi nuesu amor quedó

bien lloñe, yá escaecíu para ti,

yo vivo nel pasáu que pasó

y, anque tou yá cambió,

nun t’escaeceré ansí.

Cuántes veces yo pensé volver

y dicite que’l mio amor nun camudó,

pero’l mio xacíu amenorgó

y na distancia día a día muerre’l ser

ensin tu lu saber.

Cunté dexar d'amate d'una vez,

fora daqué abegosu que viví,

repara si otra vez pienses en mi,

na alcordanza que te mez,

que nunca t'escaecí.

Cuántes veces yo pensé volver

y dicite que’l mio amor nun camudó,

pero’l mio xacíu amenorgó

y na distancia día a día muerre’l ser

ensin tu lu saber.

El móvil

El móvil t'inmoviliza

y distrái de la to xera,

pues cayer pela escalera

o te xeollocaliza.

Nun sabes per onde andes,

mientres que tríes moñiques,

igual de repla o de piques,

y te puen robar los randes.

Al cabu, fines virolu,

lleendo los bonos díes

de Constantes y Maríes

o del to pariente Nolu.

Coles cites de pazguatos

y semeyes del Caribe,

que t’apurrió la que vive

nuna caxa de zapatos.

Un mensaxe de bondá,

una xinesta o un nardu,

o esi cantar d’un pabardu

en virtual realidá.

De comecocos, un xuegu,

una ruta del Tom Tom,

que te toma por maizón

y te pierde n’Olloniegu.

Ensin escaecer revistes

o proyeutos pal to branu,

anque alvierto n’asturianu

que vas aportando pistes.

¡Protesto!

 El que lleva la razón

y tien meyor argumentu,

magar seya testerón,

ye quien tien más armamentu.

Tea bien o tea mal,

va tar d’alcuerdu a derechu,

derechu internacional,

el que t’apliquen a trechu.

Dizlu l’artículu unu:

que se caltenga la paz,

ayén a tou repunu,

defendiendo a aquel que naz.

Darréu, l’artículu dos,

de les Naciones Xuníes,

esclaria qu’ampara a toos,

nun te va valir que píes.

Sí val l’arma nuclear

y el misil de llargu alcance

que pue llanzar el pelgar,

metiendo per culu’l bance.

Di al neñu que nun s’amarre

y que respete al vecín,

que dempués, de la que cuadre,

nos sotripará’l más ruin.

¡Vaya mierda de xusticia!,

¡yo protesto, señoría!,

porque la balanza vicia

y el más putín nos la llía.