Todos los paletos fuera de Madrid

Amueso l’alderique recién asoleyáu pola l'AMFP (Asociación de madrilanos fasta los perendengues) escontra los foriatones que nun ponen el mazcaritu nin cumplen les normes. Tamién frente a los reburdien que nun los quieren nos sos pueblos más que cuando tean toos sanos y puedan tornar a gastar les perres nos sos países o provincies, mentanto ellos van a Madrid cuando−yos peta ensin que naide−yos encamiente nada.

El Presi

Al Presi yá-y conocía a mediaos de los 70 dende cuasi mediu sieglu dende que falara colos mios pás en Xixón. Nel conciertu que diera nos pindales de la villa en Madrid dexó de cantar pa da-y un chuchín a la rapaza que yo cortexaba; güei, la mio muyer. Dempués, na Quinta Asturias del Centru Asturianu, coincidíamos casi tolos fines de selmana. Foi un paisanu candial como pocos y la so voz peculiar ya inconfundible encandilaba a la mayor parte la xente, siendo d’aquella’l nuesu cantante más internacional.

 

Fuisti a nacer nun avientu,

fuisti a nacer en Xixón,

tu, Presi del sentimientu

y del cantar de fusión.

 

Per América ya Europa

llevasti'l to son melgueru,

sin reparu, vientu en popa,

como’l paxarín parleru.

 

Sacante’l de los puristes,

por andechar con guitarra,

diversos puntos de vistes

hai nos sones y na farra.

 

Anque esos trescientos discos

aselaron toles voces,

finasti con tolos ciscos

ya afayasti tolos roces.

 

Fuisti a moldiar la tonada,

pero non l’asturianía,

tampoco la vaqueirada,

fasta aquel malditu día

 

en que nos dexasti en xunu,

amigu del corazón,

aporfia’l mio gritu emprunu

con aquel: ¡Presi, grandón! 

Día del Decente

 Por culpa de que m’andó riñendo la muyer porque diz que nun oigo bien, a poco me queden ensin felicitar güei tolos decentes y les decentes nel so día. Amestar que yo tamién siempres fui abondo decente. Sobra dicir qu’a los indecentes, les indecentes, los repunantes y les repunantes nun quiero nin los mentar.

A castañes

      Güei merqué les primeres castañes nun comerciu de la Villa y Corte a 2,29 euros el quilo. Paez qu’entá atopes intermediarios que nun meten la clavada. Mientres, hai paisanos n’Asturies que nun les recueyen mentanto otros les vienden en mercáu a 5 o 6 euros. Dalgunos espeten que les suyes son del terrén, como si les del aniciu fueren tamién del llaboratoriu’l bable. Foi’l casu que me vieno a la memoria la quexa que nel pasáu agostu me tresmitiera una muyer de la parroquia de Santa María Grau de que les del so castañéu pañábenles dellos marroquinos por sacaos ensin que−y valiera pa nada’l reñelos. ¡A esos son a los que más barates−yos salen! Pa la mio idea que'l robu y la vergoña yá tan equí institucionalizaos y corrióse la voz per tol mundiu mundial.

Frente del Jarama

 

Entá ceo, na mio cama,

bien seguru, de velea,

vime nel frente’l Xarama,

en suañando, pa mio idea.

 

Bombardiaba l’aviación,

españaba la fastera,

medraba la esmolición,

afayaba na trinchera.

 

Yo nun diba d’uniforme,

taba vistíu paisanu,

cola guerra nun conforme,

reburdiaba, pero en vanu.

 

Mandó un xefe qu’avanzara,

¿pa ónde? Entrugué al rabiures,

dábame l’esllume en cara,

había polvu per dayures.

 

Punxi les gafes de sol,

empuñé la mio pistola,

tropecé con un perol,

zarapiqué nesa gola.

 

Rebocé pelos caminos,

mientres tornaba les bales

d’un puñáu de marroquinos

azorraos nesos xarales.

 

Por suerte me despertara

con un pote na cabeza

y coles berces na cara,

ablucáu cola rareza.

La guerra Corea

      D’aquel par de colexos graduara col bachiller y con osteopatía severa. Nel de mano, el maestru varexaba a trompa talega cola so guiada máxica de dimir y nel segundu sotripaben hosties d’esmenu y a mamplén, magar que con abondo disimulu yá que'l docente encargáu de la fechoría llamábase Amador. De resultes, ríome güei por mor de que de la qu’afalaguen un rispiu a un guah.e asoleyen el casu fasta na mesma televisión y van reburdiar al centru d’enseñanza los padres, les madres, los güelos, les güeles, l'APA y de cutiu les fuerces d’orde, cuando malapenes−y endilgaron una mocada. Dalgunos tendríen que vivir aquella dómina pa dempués nun quexicar de que’l magüetu−yos saliera atochecíu. Sí, daquella carecimos talamente como na guerra Corea mentanto que bien de xente anda agora enfocicada poles manfloritaes d’anguaño.

Bartuela y Mierdina

 

Bartuela nun algama a media gata y nin siquier a dar media solombra. En resultancia, vive de pura casualidá. Andó selmanes cortexando cola muerte yá que refugaba’l comer ya amenorgaba darréu. Abría solo un güeyu, quiciabes pa nun acolumbrar dafechu’l so repunante destín. Valtaba de les dos pates d’atrás y nun se tenía de les d’alantre. Daba más pena que noxu y la so fin s’abultaba non mui lloñe. Nun mamaba nin ponía procuru nello. Sicasí, d’un día pa otru entamó a espabilar ya agora, magar qu’adulces, espoxiga la cadarma. De resultes, remanez como media gata anque amestara cola otra metá de xeitu camudando aparentemente’l so futuru. Bartuela y Mierdina son la refugaya que se caltién de la cabera camada de Rufina yá que lleváronse a Messi, Nora y Rayón –los más guapos− de la que tuviéramos n’Asturies sepa Dios pa onde. Dase’l casu, como toos sabéis, que nós nun somos los amos d’estos muxinos sinón los usufructuarios, cuidao que trespanden a la nuesa vera de la qu’alvierten que llegamos pa que−yos cebemos, −yos deamos ciñu, facenos zarapicar ya arriendes pa cagar nel nuesu terrén.

Pantomima

 

Poceru del desatrancu:

¿Tantu atascu na cocina

del apoderáu del bancu

tastiando la so cecina?

 

Cola muyer dolce meses,

que la probina nin sabe

qu’al ñacer los siameses

nun fuisti a zarrar la llave.

 

Ansí un día ya otru día,

por remanar na baxante,

xera de fontanería,

trabayu d’un bon mangante.

 

El cañu sigue pingando

por reparar nel bañal

ensin regular el mandu,

el casu yá pinta mal.

 

Mientres l'infeliz bancariu

confíate la paisana,

paga’l to costu diariu

ya apenca cola xarana.

 

Magar mermura la xente

por culpa de la vecina

que te ve salir inxente

ya alvierte la pantomima.

ESCONXURU

Onde nin el gallu canta

nin la pita cacarexa,

onde’l mesmu diañu espanta

pende l’escarión arrexa.

 

Onde l’arador nun ara,

pende’l semador nun sema,

onde arroxara la cara

y badiara aquel que quema.

 

Onde nada hai que nomar

y la vara ye varuda.

au l’escobiu ye a escarmar

mientres l’enchipáu arruda.

 

Onde’l tarangu taraza,

au tarrez y zaramiella,

onde escarranca la faza

ya’l dispuestu taramiella.

 

Onde enfota la cargancia

del repolludo insolente,

ellí nun val l’andromancia

nin ensamar cola xente.

 

Onde la nublina posa

ayuri onde−y peta,

onde’l benditu reposa

y l’utre esnala a la gueta.

 

Onde nun val l’esconxuru

del pardial y l’altaneru,

onde afayarás seguru

si nun yes de mal agüeru.

 

Santa Barbara bendita

que col rezu siempre esmuz,

con papel y agua bendita

al ablugo de la cruz.

 

Salva’l pan para xintar,

llibra casa, llibra horriu

ya al paisanu de la mar

de torbonada y degorriu.

 

Culpable

     Tamos nun tris de rematar la más repunante temporada de primavera branu que recuerdo y nun falo talamente de moda. Foi una dómina de zarru y mazcaritu. De traxedies ya engañifes. Una escomunal llaceria de la que s’escaeció’l so orixe y namái remanecen en maxín partíos de fútbol y manifestamientos. Onde pa finar tola culpa paecen tenela aquellos que viven en Madrid, sían aboríxenes o foriatos. Na qu'al salir de vacaciones a otres autonomíes el refugu te facía sentir culpable dafechu. Mientres s’aneciaba en mercar nos comercios de los chinos (tan célebres ellos) o los mesmos italianos circulaben tan bonamente pel metro de la Villa y Corte en plena pandemia. Sí, faíente sentir tan raru como un llagartu mariellu, magar que tu  –ayén a toa xera bacteriolóxica− nin siquiera comieras esperteyos, ratos, culiebres o pangolinos. Yeres culpable nel to propio país y les miraes de regüeyu espetábense nel to llombu. Mentanto, esos mesmos comecoraes ríen les ocurrencies de la montonera escelebraos qu’estaferiaben de folixa ensin llantar mázcaru nin bozu dalgún.

El Wildlife

      Concediéronme'l Wildlife Photographer por esta semeya, pero nun me dieran el premiu por aciu de que nun espongo en nenguna sala. Yá pasárame cola bibliografía d'autores asturianos que d'aniciu pidiéranme poemes nun par d’ocasiones ya a lo caberu nun resultaron con nada por culpa de que nun espublizo llibros, anque seyan como’l de la Belén. Por mor d’ello, nesti país ye abondo más importante la publicidá que la calidá. De resultes, fasta na mesma TPA falen chapurriáu nos programes que pretenden deprender la nuesa llingua pa escoyone de los renegacionistes. Sicasí, vayamos al megollu la foto que ye un partíu de fútbol de muxos. Estos enfrentamientos asoceden cuando naide ta pendiente d’estos félidos. Arriendes de Messi que desapaeciera enantes de ser trespasáu y del que toi investigando pa onde coime marchara, reparái en Bartuelu –el meyor gatu porteru del mundiu− que ye quien a parar tumbáu a la bartola. Paez ser qu’influyera na eleición el fechu de que ye la primer imaxe d’una d’estes competiciones tan reservaes.

Viva esi tren que va y vien

 

Viva esi tren que va y vien,

el qu’arredola al mio llau

y se detién nel andén

na mesma estación de Grau.

 

El que llega fasta Pravia,

el que va de culu en Trubia,

col que sueño tando en Babia

ya aselo na vera’l Cubia.

 

Ruxe y canta, canta y ruxe,

y xipla’l ferrocarril,

da la vuelta cuando fuxe,

como un molín de rabil.

 

Siempre pasa cada hora,

cruciando’l pasu a nivel;

pues ver la depuradora,

si acaso te montes nél.

 

Nunca cai n’esgoladeru,

sí acarreta a la sablera,

esi tren tan gayoleru

que runfa pela mio vera.

 

Namái gasta dos vagones

pa tresportar los paisanos:

carbayones y moscones,

candaminos y pravianos.

 

Viva ese tren que va vien,

que quieren desaniciar,

escontra, toos al sen,

debemos d’agabitar.

CUATRO GATOS

Sres. Babayos del Feisbuc: Sigo escuclando publicidá a esgaya na so rede social y censuráronme a min qu’escribo de baldre. Eso ye por culpa de la so escomunal inorancia. Los mios poemes tienen calidá abonda pa nun precisar del so sofitu nin del de padrinos ensin conocencia nin del de comenenciosos de muérganos oficiales. Arriendes, cuasi soi a escribir tan apriesa como ustedes desanicien. La diferencia ye que mientres arriquecen yo me caltengo igual de probe. Si asoleyo menos ye por aciu de la so fechoría. Agora voi espublizar una poesía pa neños a un tiempu que nel mio blogue de “Pimpiruladas de Pin” porque me da pola gana. Cuando−yos pete pueden zarrar tamién la mio muria.

Cuatro gatos pente matos,

muxinos de los caminos,

cuatro morros, cuatro olfatos,

gayola de rapacinos.

 

Unu posa, otru reposa,

dos escuclen en pareya,

ayenos, nuna baldosa,

paecen dir a escapiella.

 

El roxu tien meyor llustre

porque tira más del tetu,

bien seguru será ilustre,

que por chuetu escurre a petu.

 

El d’enriba ye Bartuelu,

siempre mira mui sollerte,

camina con pies en suelu

y si nun lu ves t’alvierte.

 

Son los fíos de Rufina,

otru quedara en lluriga

qu’amañó tres la tina

y s’afaya nuna xiga.

 

Comen, fuelguen. Fuelguen, comen,

duermen davezu d’estaya,

cuando duermen nun asomen,

mexen detrás de la valla.

 

Ñacieron nel mio terrén,

nunca monten l’espolín,

por si interesa a daquién:

Pindesierra ye’l padrín.

 

 

 

Sevilla, alcordanza

(Semeya, Nando F. Arias)

 

Cola ese de saleru

saludábamos Sevilla,

cola pe de peluqueru

poníen pelo pela villa.

 

Erre con erre, barril,

cola mesma erre de carru,

col fierro’l ferrocarril

zarro erre na que narro.

 

Caña de zucre de Cuba,

collaciu’l Caribe en Grau,

qu'a la so estantera xuba

lo que mercara en mercáu.

 

Hermanible d’hermandá

de Santiago y de Santa Ana,

que nun festexara yá

anguaño la xarangana.

 

El crucigrama la prensa

naide cubre nel Exprés,

el tiempu ye humana ofiensa,

nun val refalfiar un res.

 

La vida nos va esbastiando,

como un cuentu cuenta’l fin,

recuerda a Sevilla, Nando,

treza l’alcordanza, Pin.

Nel conciertu de Fontoria

Cuentiquinos pa que sueñes,

pa que sueñes col to neñu,

cuentiquinos dende Areñes,

suañu qu’afalaga’l sueñu.

Cuentiquinos de la gloria

qu’afayen l’airón nordés

en cantares de Fontoria,

d’Asturies, como tu yes.

Les dances y la xanina,

la qu’al ríu vivu va,

nun s'escaez a mamina,

pero’l canciu ye al so pá.

Siento a Maxi como soi,

empondero la so xera

d’esi tiempu que nun foi,

que nun hubo primavera.

Naide refugue’l trabayu,

naide acute lo asturiano,

que’l repunante o babayu

nun nos gane pola mano.

Qu'en radio o televisión

suenen sones del país,

que nun mangonie’l castrón,

toos d’andecha nun tris.

El que carez me da pena

cuando esparde asturianía.

¡Llibrái de la so condena!,

magar se caltién la mía.

Nos torgara los abrazos,

esi COVID-19,

enxamás los nuesos llazos,

nuesa cultura se mueve.