Baillarina de poza

 

Baillarina de poza,

gota d’orbayu,

 perecedera moza

d’agua de mayu.

 

Blinques, chapoties, saltes

nel to escenariu,

na barraquera valtes

nun tris precariu.

 

Abluquen dende’l ñeru,

les andolines,

pol ximielgu melgueru

de vós, llentines.

 

Al chiscar tan ufanes

nel mediu’l prau,

baxo verdes mazanes,

yerba y segáu.

 

Toca sele la orquesta

en son menor,

címblase la xinesta,

muga’l llabor.

 

Baillarina de lluvia,

del sueñu, ama,

nun rinde si diluvia,

la fresca dama.

Nun escaezas l'esquistu

      ¡Bienllegáu, Poldu!  Afáyate en Madrid colos tos pás y la to parentela, magar que nun escaezas −cuando cuadre− baxanos el barril d’esquistu a la metá n’agradecimientu pa compensar un plizcu los costos de distribución, los márxenes y sobre manera los impuestos colos que nos rustien equí  n’España a los paganos. Arriendes, a los asturianos, nun viaxe d’Asturies a Madrid nos manguen más de 50 euros amestaos poles tases d’un par d’autovíes. Amás, tenemos pendiente otru nuevu diezmu al gasoleu col que nos van llaceriar entá más. D’otra miente ya al respeutive d’ello, una entruga a l’Alministración: si los coches qu'usen esti carburante son tan contaminantes, ¿por qué nos los vendieron ya anecien en siguir vendiéndolos agora?

Alberto Pérez - "Yo te diré" en TVE (1984)

Al mio suegru qu’esfrutaba con Bertu Pérez y a los paisanos muertos en 1898 por culpa de los Estaos Xuníos. De neñu conocí a dalgún sobreviviente.

Yo te diré

por qué'l mio cantar

te llama ensin cesar:

ensin la to risa,

ensin los tos besos,

ensin el to espertar.

Sin la to sorrisa,

ensin los tos besos,

 fáltame'l to espertar.

 

Yo pruyiré

por qué’l  mio cantar

deriva nun clamiar,

col sangre valtando,

en vida naguando

 que tu nun t’alloñes más.

El sangre llatiendo

per vida pidiendo

 que tu nun t’alloñes más.

 

Cada vez que l’aire sopla y se lleva una flor,

albidro qu’enxamás tornará’l mio amor.

Nun m'abandones nunca al atapecer

 que la lluna sal sero y me voi perder.

 

Y ansí sabrás

por qué'l mio cantar

allampa ensin cesar:

los besos na brisa,

cola to sorrisa,

amás del to espertar.

 

Fáltenme los besos,

 fáltame esa risa,

fáltame’l to espertar.

El gatu tendíu de Be

(Semeya de Be García)

 Col tendío pasa’l ratu,

nel cabu’l reyu’l tendal,

ensin pinzar lluz el gatu,

ensuchando l’animal.

 

Sin pinces nin anfileres,

al aire, al albentestate,

pa plasmu de les muyeres,

ensin que Xuan se decate

 

Asoleya con saleru,

afayándose tan panchu,

per debaxo del aleru,

sin esmolición, tan anchu.

 

La foto l’amuesa Be,

la fino de ver agora,

ya'l muxu, polo que sé,

nun llavó na llavadora.

 

La posa ye una pasada

que la espardo con buatu.

Ensin ser de la colada,

cuelga n’equilibriu’l gatu.

 

 

Aventures de Xuanón

      Ayeri, atopéme con Xuanón y púnxome la cabeza como un bombu. D’entamu m’endilgara que taría dafechamente bien que los coleutivos que davezu se forren y qu'agora van recibir aides, de la que tornen a les ganancies tamién socialicen parte d’elles col envís de que nun paguemos el coríu siempres los mesmos paganos –les xentes que nun piden y que tampoco−yos dan−.  Arriendes, entrugóme que si nun sería meyor dexar d’usar los Falcon que penalizar con más tases a los probes propietarios de los coches vieyos de gasoleu. Darréu esplicóme qu’un estudiu de la Universidá de Salamanca valoró que l'impactu ecolóxicu d’un viaxe a Benicasim nesi aparatu ye l’equivalente al de 550 coches diésel y que dos Falcon que vuelen fasta Lanzarote suponen un gastu de 70.000 euros, según fontes preparaes del sector aereu. Aína quixo siguir con nun sé qu’histories, magar que−y dexé cola pallabra na boca al retruca−y: "Tienes que me perdonar, Xuanón, marcho qu'ando apuráu".

Con Caretu

 

Sin que naide ponga vetu,

mientres esti estáu d’alarma,

siento en pasu con Caretu

pa nun valtar pela garma.

 

Él ye caretu de cara,

yo salgo con pinta gochu,

la soledá nos ampara

d’esi virus podre o pochu.

 

Col mentáu, que ye un santín,

y dalguna gata rancia

anda encarceláu Pin

nesta repunante andancia.

 

Él nun muerde, yo nun manco,

vivimos y respetamos,

ante la puerta qu’atranco

de tala miente posamos.

 

El futuru ye más perru,

más perru que’l propiu can,

güei equí, mañana muerro,

dellos vienen ya otros van.

 

Ye siniestru l’universu,

magar too se caltenga,

anque duldo que’l mio versu

seya arenga pal que venga.

 

Pente tanta molición

nun vien novedá de China,

nin siquiera de Cantón,

nin vacuna o melecina.

 

Caretu nun sabe nada,

otros nun quieren saber,

les vides son como estrada

pal que mangonia’l poder.

Las Cruces

 

Tan afitaes Las Cruces

a la solombra El Faéu,

nin qu’allumes con mil lluces

en nengún mapa les veo.

 

Na propia llende Miranda

col moscón conceyu Grau,

pela ruta de la escanda,

col osu pardu al to llau.

 

Ente’l Pedroriu y Meruxa,

Repenerencia y Vigaña,

acuruxa la curuxa

y tasties l’arume a argaña.

 

Onde pues algamar Pandu,

dir a Dolia en carretera

o a Porcabezas andando

pela más guapa fastera.

 

Pende viera una rapaza

melguera como una xana,

que yera de Ponte Seaza

y dexé de mala gana.

 

Tan allugaes Las Cruces

nel mesmu Camín Real,

ellí pela historia esmuces

nesta sienda principal.

 

Todos los paletos fuera de Madrid

Amueso l’alderique recién asoleyáu pola l'AMFP (Asociación de madrilanos fasta los perendengues) escontra los foriatones que nun ponen el mazcaritu nin cumplen les normes. Tamién frente a los reburdien que nun los quieren nos sos pueblos más que cuando tean toos sanos y puedan tornar a gastar les perres nos sos países o provincies, mentanto ellos van a Madrid cuando−yos peta ensin que naide−yos encamiente nada.

El Presi

Al Presi yá-y conocía a mediaos de los 70 dende cuasi mediu sieglu dende que falara colos mios pás en Xixón. Nel conciertu que diera nos pindales de la villa en Madrid dexó de cantar pa da-y un chuchín a la rapaza que yo cortexaba; güei, la mio muyer. Dempués, na Quinta Asturias del Centru Asturianu, coincidíamos casi tolos fines de selmana. Foi un paisanu candial como pocos y la so voz peculiar ya inconfundible encandilaba a la mayor parte la xente, siendo d’aquella’l nuesu cantante más internacional.

 

Fuisti a nacer nun avientu,

fuisti a nacer en Xixón,

tu, Presi del sentimientu

y del cantar de fusión.

 

Per América ya Europa

llevasti'l to son melgueru,

sin reparu, vientu en popa,

como’l paxarín parleru.

 

Sacante’l de los puristes,

por andechar con guitarra,

diversos puntos de vistes

hai nos sones y na farra.

 

Anque esos trescientos discos

aselaron toles voces,

finasti con tolos ciscos

ya afayasti tolos roces.

 

Fuisti a moldiar la tonada,

pero non l’asturianía,

tampoco la vaqueirada,

fasta aquel malditu día

 

en que nos dexasti en xunu,

amigu del corazón,

aporfia’l mio gritu emprunu

con aquel: ¡Presi, grandón! 

Día del Decente

 Por culpa de que m’andó riñendo la muyer porque diz que nun oigo bien, a poco me queden ensin felicitar güei tolos decentes y les decentes nel so día. Amestar que yo tamién siempres fui abondo decente. Sobra dicir qu’a los indecentes, les indecentes, los repunantes y les repunantes nun quiero nin los mentar.

A castañes

      Güei merqué les primeres castañes nun comerciu de la Villa y Corte a 2,29 euros el quilo. Paez qu’entá atopes intermediarios que nun meten la clavada. Mientres, hai paisanos n’Asturies que nun les recueyen mentanto otros les vienden en mercáu a 5 o 6 euros. Dalgunos espeten que les suyes son del terrén, como si les del aniciu fueren tamién del llaboratoriu’l bable. Foi’l casu que me vieno a la memoria la quexa que nel pasáu agostu me tresmitiera una muyer de la parroquia de Santa María Grau de que les del so castañéu pañábenles dellos marroquinos por sacaos ensin que−y valiera pa nada’l reñelos. ¡A esos son a los que más barates−yos salen! Pa la mio idea que'l robu y la vergoña yá tan equí institucionalizaos y corrióse la voz per tol mundiu mundial.

Frente del Jarama

 

Entá ceo, na mio cama,

bien seguru, de velea,

vime nel frente’l Xarama,

en suañando, pa mio idea.

 

Bombardiaba l’aviación,

españaba la fastera,

medraba la esmolición,

afayaba na trinchera.

 

Yo nun diba d’uniforme,

taba vistíu paisanu,

cola guerra nun conforme,

reburdiaba, pero en vanu.

 

Mandó un xefe qu’avanzara,

¿pa ónde? Entrugué al rabiures,

dábame l’esllume en cara,

había polvu per dayures.

 

Punxi les gafes de sol,

empuñé la mio pistola,

tropecé con un perol,

zarapiqué nesa gola.

 

Rebocé pelos caminos,

mientres tornaba les bales

d’un puñáu de marroquinos

azorraos nesos xarales.

 

Por suerte me despertara

con un pote na cabeza

y coles berces na cara,

ablucáu cola rareza.

La guerra Corea

      D’aquel par de colexos graduara col bachiller y con osteopatía severa. Nel de mano, el maestru varexaba a trompa talega cola so guiada máxica de dimir y nel segundu sotripaben hosties d’esmenu y a mamplén, magar que con abondo disimulu yá que'l docente encargáu de la fechoría llamábase Amador. De resultes, ríome güei por mor de que de la qu’afalaguen un rispiu a un guah.e asoleyen el casu fasta na mesma televisión y van reburdiar al centru d’enseñanza los padres, les madres, los güelos, les güeles, l'APA y de cutiu les fuerces d’orde, cuando malapenes−y endilgaron una mocada. Dalgunos tendríen que vivir aquella dómina pa dempués nun quexicar de que’l magüetu−yos saliera atochecíu. Sí, daquella carecimos talamente como na guerra Corea mentanto que bien de xente anda agora enfocicada poles manfloritaes d’anguaño.

Bartuela y Mierdina

 

Bartuela nun algama a media gata y nin siquier a dar media solombra. En resultancia, vive de pura casualidá. Andó selmanes cortexando cola muerte yá que refugaba’l comer ya amenorgaba darréu. Abría solo un güeyu, quiciabes pa nun acolumbrar dafechu’l so repunante destín. Valtaba de les dos pates d’atrás y nun se tenía de les d’alantre. Daba más pena que noxu y la so fin s’abultaba non mui lloñe. Nun mamaba nin ponía procuru nello. Sicasí, d’un día pa otru entamó a espabilar ya agora, magar qu’adulces, espoxiga la cadarma. De resultes, remanez como media gata anque amestara cola otra metá de xeitu camudando aparentemente’l so futuru. Bartuela y Mierdina son la refugaya que se caltién de la cabera camada de Rufina yá que lleváronse a Messi, Nora y Rayón –los más guapos− de la que tuviéramos n’Asturies sepa Dios pa onde. Dase’l casu, como toos sabéis, que nós nun somos los amos d’estos muxinos sinón los usufructuarios, cuidao que trespanden a la nuesa vera de la qu’alvierten que llegamos pa que−yos cebemos, −yos deamos ciñu, facenos zarapicar ya arriendes pa cagar nel nuesu terrén.

Pantomima

 

Poceru del desatrancu:

¿Tantu atascu na cocina

del apoderáu del bancu

tastiando la so cecina?

 

Cola muyer dolce meses,

que la probina nin sabe

qu’al ñacer los siameses

nun fuisti a zarrar la llave.

 

Ansí un día ya otru día,

por remanar na baxante,

xera de fontanería,

trabayu d’un bon mangante.

 

El cañu sigue pingando

por reparar nel bañal

ensin regular el mandu,

el casu yá pinta mal.

 

Mientres l'infeliz bancariu

confíate la paisana,

paga’l to costu diariu

ya apenca cola xarana.

 

Magar mermura la xente

por culpa de la vecina

que te ve salir inxente

ya alvierte la pantomima.