Cólicos nefríticos III

          ...Namái llegar, el reñón paez que fiende otra vegada. Pruebo fasta con un cobertor llétricu, pero nun hai remediu que valga. Un pariente m'aconseya que m'allugue en posición fetal. Asitio dende’l fetu al fatu en toles postures del Pendanga Ranga y nenguna m’asolivia. Mal a gustu resisto otros dos díes fasta que nun soi quien a aguantar más. Hai que llamar otra vegada a Urxencies.

     Serenes, serenes... Vien l’ambulancia. Piquen na puerta. El doctor entruga:

—¿Cómo se llama?, ¿cómo se llama?

     Endílgame daqué per vena y anecia en entrugar:

—¿Cómo se llama?, ¿cómo se llama?

    "Yá-y lu dixi, otra vez el mesmo cuentu”.

     Tampoco respuendo al tratamientu de choque y apúrreme de nuevu pal hospital. Ellí, otra mélicu me pregunta:

—¿Cómo se llama?, ¿cómo se llama?

     “¡Rediós!, esto ye un “déjà vu”, toi que muerro y paez que sólo-ys interesa’l mio nome, ¿qué coime estudiaría toa esta xente?”*...

*Nun almite les comines españoles