Mariquita, coccinella,
échame un bon badagüeyu
p’andar a la vera d’ella
xuncíos anque ensin reyu.
Mariquita de la suerte,
yá tando los dos xuntinos,
caltennos hasta la muerte
colos nuesos rapacinos.
Mariquita collorada
qu’aportas meyor destín,
que nada nos torgue, nada,
pel abegosu camín.
Llévate la mio malura
d’esi percorríu yermu,
per onde l’andancia ambura
cuando te pones enfermu.
D’igual miente a la mio amada,
posa adulces na so mano,
pa que de recién casada,
el so fíu venga sanu.
Mariquita, catasol,
por acio les pintes prietes,
tan nidies como’l charol,
nin m’apures ni m’encetes.
Resalva la mio collecha,
qu’espurra col mio llabor
y la vida a costafecha
seya fartura d’amor.
No hay comentarios:
Publicar un comentario