HABÍA...

Había murnia na parede

y tristura naquel cuartu;

magar nin fame nin sede,

nun s'algamaba a tar fartu.

Había un tiempu que finara,

munchos xuegos, pela cai,

 una madre que t'ampara,

había lu que nun hai.

Había munchos militares,

banda de guardia civil,

sientediscos nos billares,

 había corte y non, cubil.

Una radio que cuntaba

cuentos y publicidá,

a les tres, el parte daba

la mentira y la verdá.

Un afalagu melgueru,

una cocina carbón,

ratos dientro'l sumideru

ya un fardelín d'ilusión.

Dellos llibros y cuadernos

atropaos naquel cabás,

había fríu nos iviernos,

garabuyos, que nun gas.

Lluz a cientu venticinco,

 la puerta con calaviya,

tres de la sapada, un blincu,

piocampu o pilla pilla.

Un dineru que nun llega,

que foi precisu espurrir,

la pila na que se frega

y los formigos pa frir.

La casa que nun había,

si nun pagabes la renta,

namás queda poesía,

que les alcordances cuenta.

¿Y si nós tamién-y diéramos al “voltarem”?

Ufiertaben aínda más perres pa Cataluña si reculaben los de la dixebra. Abúltaseme que ye mui grave que n’España furrule lu de “el que nun llora nun mama”, pero entá peor ye que s’afite’l xantaxe. Na primer nacionalidá tenemos la llingua en refugable diglosia, la Variante de Pepe Goteres en clara tomadura de pelo, el desaniciu de les tases de l'autovía, que prometieron hai una montonera d’años, en repunante trola ya otra riestra temes n'agraviu comparativu como’l seyescéntimu sanitariu. Mentanto, nos espeten que-ys robamos y que na dómina la Reconquista equí nun había más que cabres mientres añalmente se retayen les pensiones de los xubilaos. Cuento que, si nós tamién finxáremos una data de votación d’autodetermín, bien seguru que tamién nos diben a tomar más en seriu.  

De torna

     ¡Bienayan, amigos! Colara’l guah.e 15 díes pa los Estaos Xuníos ya aprovecimos pa tornar p’Asturies. Munches/muitas felicidaes a los que quedaron ensin felicitar nesi tiempu yá que siguía desconectáu dafechu. Güei, a les 12 la mañana aínda tábemos ehí a 14º ya orbayando. Por embargu, a les 6 de la tarde, carecíamos los 31º per Madrid; sicasí, yá me fixera calecer entá más el quiosqueru al que-y teo reservaos los númberos de LNA por culpa que ye la tercera vegada que m'intenta colar un exemplar atrasáu. 

Saluda

Col trepelete del trepeletré,

tea pela muria y dexe d’escuclar,

mira la moza, diz que nun la ve,

que yá ye vieyu, pa usté nun va tar.

Llunes y martes y miércoles tres,

xueves y vienres y sábadu seis,

canta la xana y tu nun la ves,

con delles bruxes y vós nun les veis.

Van pa Sevilla encoplando de nueche,

cola curuxa, tamién cola gata,

nalen na escoba, que nun van en coche,

nun paguen tasa na Vía la Plata.

Magar qu’un día un tresnochador,

¡domingu siete!, sé que–yos glayó:

¡domingu’l día del nuesu Señor!

ya esto a les bruxes mui bien–ys cafió.

Garraron toes a aquel inocente,

la escoba baxa mientres que tu xubes,

la tunda escobiazos trespandó los vente,

y vio les estrelles y algamó les nubes.

Aína a esi probe dexaron cayer,

tres de cutir enforma la badana,

al qu’alderica–y van a frañer

y mal acaba ansí la selmana.

Na carretera que lleva a Avilés,

naide yá canta a esa carretera.

Saluda, amigu, si acaso me ves,

si na Carriona pases a mio vera.

De xinta

(Ensalada na Cabaña de Conce)

     N’Asturies cómese bien, pero nun ta de más curiar d’au te metes porque pues entrar en dalgún sitiu afamáu y salir afamiáu. Talamente, hai llugares onde comes meyor de platu’l día que n’otros a la carta. Yo, toi avezáu a xintar en restoranes o sidreríes que me faigan sentir como en ca’l güelu, refugando’l buatu. Asina me fai sentir Conce na so Cabaña en Santuyanu de Les Regueres, onde me llanta unes fontes d'ensalada o pataques frites con pimientos que se salen de la mesa. Tamién m’afayo en Casa Dylsia de Valdunu. D’igual miente, en El Verbayu en L’Entregu o en La Casera en Soutu la Barca. Arriendes, a los vexetarianos nun nos ponen nenguna torga en camudar un platu de carne o pescáu por otru que sí puedas comer, lu que sí fixeron en El Sabugu (Saúco) de Xixón. De los llugares nos que se come mal, más val nun falar; sicasí, sí me prestaría comentar la ruindá del vezu perafitáu de cobrar el capiellu o los tarucos de pan, yá que n’unu de los afamaos -que nun voi citar-, nos mangaron 4,50 euros por dellos, dempués de que’l pote nun yera del día.

¿Desea siguir...?

      Munchos yá sabéis que cuando torno p’Asturies ando desconectáu dafechu. Ye verdá que priendo la TPA qu’anecia en repetir programes como El pasáu recién, Cantadera, De folixa en folixa o Pueblos. A la hora del parte aínda nun toi en casa y, de la que m’allego, yá aporfien en proyeutar una de vaqueros o La esclava blanca. De resultes, el mesmu día del atentáu de Barcelona nin siquiera m’enteré. Foi’l casu qu’al día siguiente, que fui a mercar al Alcampu de Xixón, al ver a tol personal apeguñáu fora del comerciu se m’abultó qu’andaben de fuelga. Una paisana enmendóme aína del mio erru encamentándome que diben guardar un minutu de silenciu poles víctimes. Darréu, vendríen otra vegada los aplausos. Más sero: les flores, les banderes a mediu estil y los glayíos de nun tenemos mieu. Sicasí, aquelli ablucante minutu de silenciu me dexara aínda más ablucáu nel intre que la impersonal voz d’una caxa amiga lu frayara entrugando: ¿Desea siguir…?

Per Casablanca

    Tuvi dellos díes en Casablanca; sicasí, nun viera a Humphrey Bogart y nin siquiera a Ingrid Bergman. Tuvi dalgunos díes en Casablanca y a naide se–y ocurrió cantar la Marsellesa, magar que sí cantaren la Xibraltareña los de l’animación. Tuvi unos pocos díes en Casablanca y, ensin necesidá de trespandar pa Marruecos, m’atopé con una montonera marroquinos. De la que tuviera esos díes en Casablanca, xugué al tute perreru con un axente d'handling asturianu qu’andaba arrexuntáu con una azafata espampanante. Cuando yá finaba la mio estancia en Casablanca, l’auxiliar de vuelu colara con un pilotu más curiosu que’l mio paisanu y quedamos los dos mirando pa la lluna de Tánxer, que ye la mesma que la de Casablanca. Mientres cavilgaba qu’aquello sedría l’entamu d’una gran amistá, p’aselar l’alloriu del probe refugáu–y camenté que siempres nos diba a quedar Xixón.

N'otra dimensión

     Esta nueva torna a Asturies resultara abondo granible, yá que conocí a otra montonera xente y n’especial a la mio hermana Ánxeles. Daquién dirá que cómo coime ye eso de que nun conocía a la mio hermana y yo-y voi retrucar que porque asina taba escrito nel guión. ¿Acaso nun vos decatarais de que la vida ye suañu, cuentu, teatru…? Un particular guión a la fin. Amestaré que yá nos conocíamos en maxín ya a traviés del Feisbuc; o seya, n’otra dimensión y lu que faltaba ye lu que si diz en persona. La escena entamará cubriendo de blancu’l decoráu con una abondosa xarazada. Darréu, surtió’l sol per Picarosu espeyando sobro la piedra cayía na cai de la estación. Al bellume, asomó ella como una prestosa apaición, como atañe a toa triba d’ánxeles bonos, mientres que yo escuclaba pa escontra Uviéu. Darréu, esguilamos per un barriu azul que s’escuende tres d’un contenedor de basories y percorrimos una afayadiza ruta pente viesques y palacios. Dempués, desendolcóse un segundu actu de chicolate, rises y llambionaes nuna afayadiza plaza col qu’algamamos una despidida de nueche y puntu y siguíu, yá que vamos aneciar por contautar n’otros capítulos.

L'allegría de la feria

(Tresmonte, 78)

Yes la solombra del branu,

yes l’ablugu del iviernu,

yes el sobráu, yes el vanu,

siempres l’afalagu en ciernu.

Yes atecháu na seronda,

arume de primavera,

yes l’amoríu de ronda,

yes la flor de la fastera.

Güeyu d’agua pa la sede,

yes llacuada pa la fame,

de la escoyeta, yes rede,

yes la llocura al algame.

Yes del monte, la nublina,

arrullu del ríu’l valle,

yes la fonte cantarina,

yes la señal pa que calle.

Yes estrellina del cielu,

de la sablera, la fola,

rosada de carambelu,

el perder de la cachola.

Yes de la mar, el marmullu,

yes el tastu de la zreza,

yes de la viesca, l’arrullu,

el mesmu airín cuando meza.

Del riscar yes el restallu,

de la qu’escurez, la lluna,

yes el rescamplar de mayu,

la ensuga la mala zuna.

Yes la perda del procuru,

yes l’entibar de la seria,

el verdín qu’esbaria en muru,

l’allegría de la feria.

Van reconoceme...

Vien de la entrada anterior…

     Esta mañana foi más granible que la d’ayeri, pos camín del centru médicu p’anovar el carné m’alcontré unes gafes Converse modelu Chuck Norris que nun son pa nada sospechoses, al ser más de la triba de los aliaos. Yá dientro la clínica, una moza me dixo que me reconocía y la otra, que non. Esta cabera m’espetó que si pasaba unes prebes cola primera y nun taba pasáu me diben a apurrir una autorización temporal pa conducir. Sicasí, amestaron que nun podíen aportar nengún llibramientu p’amosar en Tráficu por culpa de lu de siempres: “la inorancia d’una llei nun torga del so cumplimientu al inorante”. Asina que, de la que despache equí, voi treslladame a la facultá de Derechu de la Rei Xuan Carlos p'apuntame pal cursu qu’entra.

PRINDARON A PINDESIERRA

     Esta mesma mañana paróme un beneméritu y mangóme 200 beneméritos euros pol mio maleméritu despiste de nun decatame que m’anovaren el carné per 5 años en llugar de per 10, como correspondía, y de resultes tar caducáu. Arriendes, llevaba unes gafes prietes ya oblicues que me mercara la muyer ya abúltaseme que con elles teo cara de sospechosu, yá que l’axente –que nun quitara les sos lentes arredondiaes– nun detuvo a los que pasaren delantre. Como consecuencia, pagué la multa por culpa de que toi avezáu a pagar y porque nesti país cada vegada hai más tases coles que cebar a más golfones. Sicasí, yá nun voi llantar más les gafes prietes oblicues que me faen paecer sospechosu en sentíu creciente y, de la qu’escucle lluminaries azules nesa retonda, voi escapar pela tanxente d’enantes. Asina que me perdonen los golfos de toa triba por nun querer andechar más en mantener los sos vicios.

Y si m’alcuentro con un cabezaleru del Principáu, ¿qué faigo?

     La MANCOMUNIDÁ D’OSOS PARDOS de la CORDELERA tamién asoleyara 25.000 trípticos y milenta cartelos esplicativos sobro que faer nel casu d’atopate pel camín a un cabezaleru del Principáu o a un conceyal o al mesmu alcalde d’una casa conceyu de les faces oseres. El decálogu, tien tamién namái qu’ocho encamientos, talamente como’l qu’asoleyara al aviesu LNE:

1ª Magar que t’anden cafiando davezu, nun dai-yos voces nin facéi-yos esparabanes.

2ª Facéi-yos entender qu’hai que rozar les carreteres y los caminos pa que puedan pasar los paisanos ya’l so ganáu pa qu’asina nun priendan fueu.

3ª Facéis-yos garrar qu’hai que camudar les lleis pa que nel terrén amburáu de la la viesca namái se pueda repoblar con viesca.

4ª Facéis-yos comprender que deben desaniciar les autorizaciones a les mines d’oru pa que nun seyan a furar tol occidente d’Asturies a la gueta d’esi metal y pa que nun entafarren el Paraísu con balses de metales pesaos.

5ª Encamentái-yos qu’hai yá una montonera xente que vive del turismu y que munchos turistes vienen gracies a nós, aparte de qu’Asturies nun ye un prau de so.

6ª Que vos espliquen porque multen por cortar una flor y non por quemar un monte. Arriendes, esclaria-yos que pa prindar al qu’atiza hai que poner vixilantes que detengan.

7ª Que castiguen de manera exemplar al pirómanu qu’atenta escontra la vida de toos, implicando más a les fuerces d’orde.

8ª Los canadienses tan como llocos por fincar el diente a SALAVE. Si los paisanos yá dixeron “NO” a la llaceria de la mina, que vos digan que ye lu que nun entienden. 

Nunca fui peritu en llunes

Nunca fui peritu en llunes,

nun me llicenciara en soles,

nun me graduara en dunes,

nin fui tituláu en foles.

Escribo lu que me peta,

voi refugando’l diploma;

los deleres, d’escoyeta,

nun m’adoma quien adoma.

Valoro, taso o perito

aquello que se m'ocurre,

por eso’l citar evito,

por eso aneciar m’aburre.

Xamás sigo direutrices,

nengún me calla la boca,

soi feliz ente infelices,

lu qu’a min procuru toca.

Nun m’abluca l'afamáu,

nin, padrín; nin, presidente,

nun arramplo lu ganáu,

nin gano nada a la xente.

Cuando viro per avante,

nun ye por culpa del vientu,

ye qu’atopo a un repunante

o, si acaso, a un esperpentu.

Nun xuego a xuegu floral,

pos xuego a manga escolada,

qu’a naide-y paeza mal:

los ases, d’estrapallada.

Soi poeta muertu fame,

nun saco nin pa la cama,

teo la musa al algame,

faime fumu, afarta fama.

Despacino

     

     “Despacito” de Luis Fonsi tien nel intre, ¡zumba la calaviya!, 2.931.909.286 visites y siguen esguilando; mientres que “Despacino” del nuesu amigu Nandu Corujo, que colingara “Río Guillón” nel “YouTube”, namái que 382 y tres calcaos nel deu del “me presta”. ¡Coime, esto nun pue ser!...

Dar la nota

    

     Podría dicise que lu que fai míster Bean nesti videu ye dar la nota por partía doble. Lo peor ye que na realidá, al marxe de la comedia, hai  bien de xente nesti país a la que mantenemos namái que por dar la nota. Sí, pasa na política, nel deporte, na televisión… Magar que nel otru cabu tamién hai cada vez más personal, que nun cotizara enxamás, que tamién da la nota y vive de nós. Fasta agora, esto –mal que bien– va aguantando, pero la cosa pinta mal y pueque, más ceo que sero, de tanto tirar del tetu esti escose y la tema arreviente.