LLINGUA MATERNA

 Nun me petó asoleyar nada’l Día de la Llingua Materna por culpa que nun hai que festexar el día que te manden ya’l restu l’añu callar…

¡SI QUIES HOMENAXAR DE VERDÁ A LA TO LLINGUA, TIENES QUE FALALA A DIARIU!

En maxín, foto o pallabra,

sobro ella caltenemos,

tierra que sotierra y llabra,

dende’l día en que ñacemos.

 

En maxín, namái recuerdu,

en semeya, nun papel,

la pallabra del alcuerdu

dacuando caye en cairel.

 

Nun xira’l mundiu alredor,

somos malapenes nada,

nun val que teas n’altor,

pos valtarás pela estrada.

 

Si la pallabra ta escrita,

falará por ti en futuru,

magar seya namái cita,

magar nun teas un duru.

 

Nun refugues lo de casa,

la to llingua, la to fala,

mientres la cadarma pasa,

dacuando’l to mensax cala.

 

Pente allegríes y penes

foime andando la rutina,

de lletres, les manes llenes,

la collecha, mui bien ruina.

 

Defendiera l’asturianu,

tamién al que m’inoró,

pegué cola tiesta en vanu

y naide por min lloró.

 

Pero soi abondo neciu,

blinco cola zancadiella,

soi neciu colo qu’aprecio

y l’aprecio munchu a ella.

Muerte del epicenu

      Tuviera borrando fotos col envís de dexar más espaciu llibre na memoria, cuando —ensin querer— me borré a min mesmu, quedando desaniciáu. Foi por culpa d’ello qu’agora nun m’alcuentro nin bien nin mal. Por embargo, caltiénseme esta semeya de la que tuvi “matriculada” nel mio primer colexu: Alcordances del futuru y muerte del epicenu.

¿Desconsideranza?

      El Feisbuc m’ufierta güei una alcordanza d’hai tres años que remanez d’ente toles entraes que me pañaron. Reparo en que foi 28 vegaes compartida, lu que se m’abulta perfeutu; pero namái amuesa'l nome de nueve persones que la compartieron. Compruebo que la felicitación a Tino Casal d’ayeri algama les 21; sicasí, asoleya la identificación de dolce. Pueque vayamos ameyorando, magar que me surde una dulda: ¿Será correutu que, mientres espublizo les mios obres n’abertal, seyan compartíes ensin dexar buelga por dalgunos por cuenta de so configuración de privacidá o quiciabes seya tamién un plizcu de desconsideranza al nun ser yo quien a aportar la debida calidá que da la publicidá, el padrín, la venta, la política o'l puestín?

¡FELICIDAES, TINO!

 

Fai abondo tiempu que vive nun cuentu

del que nun pue yá salir,

vieno del cementu, dormi nun llamentu,

escaeciéndose de rir.

 

Dicen qu’una bruxa,

una ruin curuxa,

collacia de Lucifer,

cunten que foi ella la so mala estrella,

qu’enredó esa vieya fasta facelu morrer.

 

Nun paró la fada,

mala  convidada,

víctima del desamor,

nun xubas  al coche,

qu'al mal−y pon broche

ya anda de mui mal humor.

 

Embruxada vive encadenada

por culpa d’una visión,

chapeta pasada,

cunten qu’agüeyada

por dalgún diañu burllón.

 

Esa que barbuya

t’espeta l’aguya,

la qu’amodo te fai mal,

date priesa envolubra nel oral,

marcha de la capital.

 

Esa ye la fada,

siempre refugada,

la que te produz remor.

 

Esta mala bruxa

que pon como escusa

carecer el desamor.

 

CALIFORNIA WINE

 

Les fueyes are brown,

les fueyes are brown

and the wine is red,

m’afeito con Braun,

mui de cuando en vez.

 

Vomito and stain

polo que chuméi,

California red wine,

bébieralu güei.

 

Entré na capiella,

torné al bon camín,

finqué la rodiella,

rezaron por min.

 

Cura likes mui fríu,

me voi a quedar,

California míu

−y voi convidar.

 

Les fueyes are brown,

les fueyes are brown,

bebí along the way,

valté al primer round

na ermita Pambléi.

¡HASTA LA MOÑA!

 La variante tendrá todas sus vías en abril y la ventilación se espera para marzo de 2022 (El Comercio).

Lleven una década asegurando que furrulará l’añu que vien ya agora nos falen de ventilación pal qu’entra. Lu que tienen que ventilar ye tantu retrasu ensin qu’esbarrumbe esa chambonada.

 

Perfila, perfiladora,

por perfilar que saquesti,

que nin rematen agora,

mira lu qu’adelantesti.

 

San Xulián tará en Porrúa,

La Santilar, en Perea,

La Variante en falcatrúa

ya’l que manda de carea.

 

Teo pan, teo boroña

y nel arca teo nueces,

cola obra la vergoña

la cagaron bien de veces.

 

Ventila, ventiladora,

echái yá la estaya al sucu,

nun echéis culpa a la ñora,

como si−y dixerais trucu.

 

Diez años inaugurando

y nunca llantáis el ramu,

los paisanos van finando

sin que furrule esi tramu.

 

Seique vos traerá más cuenta

pa nun colanos más troles,

dicir pal 2050,

ye por culpa de les goles.

 

Fabula, fabuladora,

cinco años, Guadarrama,

p’acabar a la so hora,

¡nun nos faigáis más la cama!

 

L’estrambote de la güela

amiesta, Madrid, de goña:

En dos hores a Orihuela.

−ASTURIES FASTA LA MOÑA−

Un cuentu que cuento

 

Esto ye un cuentu que cuento,

mentires que son verdá,

de la mio vida que rento,

dende aquella mocedá.

 

Y d’enantes, cuando neñu,

fasta agora, yá de vieyu,

que me caltengo de señu,

dibuxu d’un cartafueyu.

 

Pero foi espurriendo abondo,

de la que diba viviendo,

con un sentimientu fondo,

col que te toi escribiendo.

 

De guah.e yera mui llistu,

dicíen los d’a mio vera,

al medrar nun eché esquistu

ya entós camudó la xera.

 

De mozu yera escoyío,

espetóme una rapaza,

de la ocurrencia me río,

coses de la nuesa raza.

 

Siguí raru de paisanu

y dacuando, repunante,

quiciabes por ser veganu,

por acio ser tolerante.

 

Yá de vieyu nun m’aguanta

nin siquiera la paisana,

magar que seya una santa,

magar que nello s’afana.

 

Ya asina gasto la vida,

soi un infeliz poeta,

que naide torgue o impida,

encoplo lo que me peta.

Nun quixo ver nada

     Hai unos díes que la mio televisión grande nun furrula bien por culpa que tien interferencies.  El téunicu camentóme que ta abegosu d’atopar l’averia, magar que pue ser de l'antena. En reduñes de qu’esta mañana diéronme esta publicidá, llamé al númberu qu’aporten perbaxo entrugando−y al paisanu si sería quien a ver onde ta’l fallu. Foi’l casu que me colingara’l teléfanu ensin retrucame nada. ¡Hai xente rancio mui mal educao!

El muxu coxu

 

     Güei apaeciera otru muxu que nun conocía. Taba coxu y reculaba un plizcu a manzorga. Decatárame que’l desequilibráu−y afeutaba más a la exa d’atrás. Por embargu desplegaba un rabu argutu de galán repolludu. Nin que dicir tien que−y aventé glayando que nel mio refuxu yá s’atendía a abondo personal y que colara pal centru de día. Ta perclaru que ye por culpa que Rufina asoleya un embaranzu permanente. Quien diba a pensar de la que la cebábamos de pequeña que nos diba a salir tan candonga. Ye’l casu qu'a los nuevos yá nun−yos peta trespasar la llinde ya entá nun hai pagues nin gabitos pa esta triba de folgosos. Arriendes, la muyer anda alloriada cola que se nos vien enriba cola gatada qu’entra. Tou entamara cuando emprincipiaron a trespandar los gatos de la vecina a la gueta de más ciñu ya d’un platu’l día más variáu, cuidao que paecíen tar de la comida en pelotes fasta les mesmes. ¡Cómo me zarren otra vegada, estos muxos señoritos van pasales torniaes!  

Metro de Madrid

 

METRO de MADRID / ATENCIÓN al CLIENTE / RECLAMACIÓN del 15-1-2021

Buenos días: Mientras recomiendan con las pegatinas de los andenes que los usuarios mantengan la debida distancia interpersonal, muchos trenes van atiborrados de viajeros, sin que Uds. o el organismo competente aumente la frecuencia en el paso de los convoyes. Ahora ya no hay fiestas y la exponencial subida de los contagios es más que probable que se origine en espacios cerrados tales como los vagones del metro. Da la impresión de que han instaurado el hacer caso omiso a las reclamaciones, como las diversas que pusimos solicitando una justa indemnización cuando mi mujer se rompió los tres maléolos al caer por las escaleras de la estación de Portazgo resbaladizas a causa de la lluvia caída y sin bandas antideslizantes que Uds. rechazaron con la peregrina razón de que no existían cámaras que recogieran el accidente, cuando nos cansamos de aportarles fotografías de dichas cámaras cuyas cintas han podido visionar hasta la saciedad. Por culpa de ese suceso sufrió −como bien saben− tres intervenciones quirúrgicas y otras tantas hospitalizaciones, amén de permanecer semanas en silla de ruedas y tener que desplazarla a numerosas consultas y a la recuperación postoperatoria empeñando nuestras vidas, haciendo frente a cuantiosos gastos por espacio de más de tres años y sobrellevando aún las consecuencias. ¡LAMENTABLE!

1ª desestimación 21.4.2014 a través de ASEVASA 14/137664/CCP Refª 62501 Mercedes García.

IN MEMORIAM

     Esti ye’l mio tíu Domingu Rodríguez Suárez, el meirazu d’un rebañu hermanos, nacíu en L.lugarnes (Partíu de Sierra) y matáu polos rifeños del norte de Marruecos na llaceria d’Annual d’hai un sieglu. Nun asoleya na foto porque por culpa de la ruina condición económica de la familia nun había nin pa semeyes. Por acio d’ello entovía menos pa pagar les 2000 pesetes coles qu’escoyer destín y llibrar d’África a onde foi destináu pa cumplir col serviciu militar. Ellí lu mataron los parientes de los rifeños qu’entran agora n’España ensin nenguna triba de torgues, como tolos que nos aventaron de los sos respeutivos países. Magar que consta como fináu en combate, nun se conoz o nun s’esclaria la mala manera. La so cadarma s’atropa coles d’otra montonera infelices nuna güesera del campusantu de Melilla. Los sangrinos africanos mandaos por Abd el-Krim, qu’estudiara en colexos españoles ya algamó a trabayar de funcionariu públicu, nun facíen prisioneros yá que cortaben el pescuezu fasta a los que pautaben salvar la vida cola so rindición.

     De nada valió’l to sacrificiu, tíu, nin les llarimes de tola nuesa parentela, anguaño hai infinidá de renegaos qu’entá−yos llambe’l culu mientres que los sos cabezaleros anden mercando l’armamentu más avanzáu.

El banzón

https://elpais.com/espana/madrid/2021-01-21/una-roca-procedente-de-un-asteroide-genera-una-gran-bola-de-fuego-sobre-madrid.html?ssm=FB_CC&fbclid=IwAR2_HGVh-hJjuwmLyI8yrnfS67gvWsviCsJMGWIo8-h1xHyl7XHZDvpOQw4

La bola de fueu, qu'amosó delles esplosiones a lo llargo de la so trayectoria, avanzó en direición sureste ya escastióse sobro Madrid, a una altitú d'unos 21 kilómetros, práuticamente na vertical del distritu de la Ponte de Vallecas. Nun mos faltaba más que cayera sobro la superficie pa remate de tanta llaceria, pero como si'l banzón del asteroide gociara d'intelixencia nun s'averó más a los terrícoles. Nin que dicir tien que, si la noticia se produxera n’Asturies, taríamos falando d’un asturoide.

Faza catastrófica

 

“Madrid, faza catastrófica”,

tócame otra vez pagar,

llanto equí una quexa estrófica

d'Arganda o Galapagar.

 

Habrá dalgo más d’un añu

que yá careciera Dana,

tuvi qu’asumir el dañu,

igual que’l de la so hermana.

 

Que−y llamen Filomena,

que vieno col mantu ñeve,

que me la montara buena,

qué mal sumiciu la lleve.

 

Cinco mil euros, de mano,

anguaño a encomalu estrozos,

que pago como paganu

y tamién los d’otros mozos.

 

Nun te lo tomes a pechu,

que siempres cobren los mesmos,

tu, Pin, nun tienes derechu,

sí deber de costiar diezmos.

 

Venga la tercera fola,

haya seca o faiga fríu,

Repsol, Naturgy, Iberdrola,

xuben la lluz pal so avíu.

 

Qu’ocupen una vivienda,

nun la va a pagar el bancu,

cobra’l bancu y la Facienda,

pa robar naide anda mancu.

 

Pago’l coríu del chinu,

la marixuana, la xiba,

el xalé, l’avión, el finu,

váltame l’arcu y l’oliva.

 

Dempués de munchu baldiar,

ensin qu’echen un gabitu

por gala, gala pagar,

y a callar como un benditu.

Morena pasada

Ayeri vi que xubíes

pela escalera primera,

amosando les veríes,

montando la escandalera.

 

Dime onde vas morena,

dime onde vas salada,

dime onde vas morena

cola escomunal ñevada.

 

Voi fasta’l chigre de Pachu,

voi a beber un cacharru,

qu’ando col xeitu mui gachu

por culpa de tantu zarru.

 

Que guapu ye’l blancu

de ñeve a montones,

teo dir al bancu, teo dir al bancu,

putes comisiones.

 

Yes bien alta y delgada,

como la to ma, morena salada,

pero tas mui pasada,

de manera tala, morena salada.

 

Díes y nueches voi,

neña pensando en ti,

mui alloriáu toi,

dende que te vi,

morena pasada.

 

 

El sentir de Ca Sanchu

Per onde quiera que vas,

per au te lleve’l destín,

sintieron falar d’Ambás,

esfrutaron con Camín.

 

Xosé Antón foi indispensable

nel caltener de cantares,

nel remanecer del bable

ya en torgar dellos pelgares.

 

Ye de bulita’l raigañu,

ye la so voz, ye la danza,

ye la fonte nel secañu,

flor del agua so la ganza.

 

Ye l’uxu, ye N’Arba y Tuenda,

guarda la so señaldá,

vive en cantu la lleenda,

allegra la soledá.

 

Ye l’informante del cuentu

rescatáu d’otru informante,

qu’amorrentaba mugrientu

y restalla güei flamante.

 

Ye la gaceta del buelu:

Llavayos, Castru, L’Oureiru,

panderu que trona’l cielu,

chalgueiru ya aguilandeiru.

 

Ye’l conxuru de Salcéu,

sofitu de la cultura,

de la llabor, el preséu,

el villancicu del cura.

 

Ye’l más célebre de Grau,

del tueru ensuchu’l garranchu,

quien estaferia al mio llau,

el sentir de Casa Sanchu.